罗马书 线上收听:中文和合本 现代中文译本修订版 现代台语 台语圣经 台语(长老会传播中心授权） 客语 现代客语 福州话 粤语和合本 希腊文(WH-NT) 下载档案 关于语音圣经
13:1 Ho̍k-chiông Chèng-hú
Ta̍k lâng lóng tio̍h khut-ho̍k chèng-hú ê koân-pèng, in-ūi koân-pèng lóng sī tùi Siōng-tè lâi ê; chiáng-koân-chiá ê koân-pèng lóng sī Siōng-tè siat-li̍p ê.
13:2 Só͘-í, hoán-khòng koân-pèng sī ûi-pōe Siōng-tè ê kài-bēng, ûi-pōe ê lâng ē siū sím-phòaⁿ.
13:3 Lí nā chò hó, to̍h m̄-bián kiaⁿ chiáng-koân-chiá; chí ū chò pháiⁿ ê lâng chiah tio̍h-kiaⁿ in. Lí ài chò chi̍t-ê m̄-kiaⁿ chiáng-koân-chiá ê lâng á-bô? Nā ài, tio̍h chò hó, lí chiū ē tit tio̍h po-chióng;
13:4 In-ūi i sī Siōng-tè ê chhe-ēng, beh hō͘ lí tit tio̍h lī-ek. M̄ koh, lí nā chò pháiⁿ, to̍h ē kiaⁿ i. I tòa kiàm m̄-sī bô bo̍k-tek, i sī Siōng-tè ê chhe-ēng, sī sin-oan chiá, beh hō͘ pháiⁿ lâng tú tio̍h hêng-hoa̍t.
13:5 Só͘-í, lín tio̍h ho̍k-chiông chiáng-koân-chiá, m̄ nā ūi tio̍h kiaⁿ Siōng-tè siū-khì, mā sī ūi tio̍h liông-sim ê iân-kò͘.
13:6 In-ūi ánne, lín mā teh la̍p-sòe, in-ūi in sī Siōng-tè ê chhe-ēng, ūi tio̍h I teh chip-hêng chit-ê chit-bū.
13:7 Tio̍h tùi chèng lâng chīn lín ê gī-bū; lín khiàm lâng ê tio̍h hêng chheng; eng-kai la̍p ê sòe tio̍h la̍p; eng-kai kiaⁿ-ùi ê tio̍h kiaⁿ-ùi; eng-kai chun-kèng ê tio̍h chun-kèng.
13:8 Thiàⁿ-sim Sêng-choân Lu̍t-hoat
Tû-liáu hō͘-siong sio-thiàⁿ sī khiàm lâng ê chè í-gōa, m̄ thang khiàm lâng ê chè; tùi pa̍t lâng ū thiàⁿ-sim, chiū í-keng oân-sêng lu̍t-hoat ê iau-kiû.
13:9 Lu̍t-hoat ê iau-kiû sī, M̄-thang kan-îm, m̄ thang thâi lâng, m̄ thang thau-the̍h, m̄ thang tham-sim. （ Chù, CAG 20:13-15,17; SBK 5:17-19,21) Chiahê kah kî-tha ê iau-kiû lóng pau-hâm tī " Tio̍h thiàⁿ chhù-piⁿ chhin-chhiūⁿ thiàⁿ kakī "（ Chù, LBK 19:18) chit kù ōe lāi-té.
13:10 Thiàⁿ chhù-piⁿ ê lâng bē chò siong-hāi pa̍t lâng ê tāichì, só͘-í, thiàⁿ sī sêng-choân lu̍t-hoat.
13:11 Siōng-tè kok-tō͘ kīn loh
Lín tio̍h ánne chò í-gōa, tio̍h ē kì-tit chitmá sī kak-chhéⁿ ê sî-chūn, in-ūi chitmá lán pí tútú chiâⁿ-chò sìn-tô͘ ê sî koh khah chiap-kīn Siōng-tè ê chín-kiù.
13:12 O͘-àm-mê teh beh kòe-.khì, thiⁿ teh beh kng ā, só͘-í, lán tio̍h thoat-lī o͘-àm ê hêng-ûi, chhēng kng-bêng ê bú-chong.
13:13 Lán ê hêng-ûi tio̍h toan-chiàⁿ, chhin-chhiūⁿ seng-oa̍h tī ji̍t-kng tiong. M̄-thang hòng-chhiòng, chiú-chùi; m̄ thang hò͘ⁿ-sek, hòng-tōng; m̄ thang sio-cheⁿ, oàn-tò͘.
13:14 Tio̍h ēng Chú I-é-su Ki-tok lâi chong-pī kakī, m̄ thang ūi tio̍h boán-chiok su-io̍k, lâi tô͘-bô͘ jio̍k-thé ê tāichì.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。