使徒行传 线上收听:中文和合本 现代中文译本修订版 现代台语 台语圣经 台语(长老会传播中心授权） 客语 现代客语 粤语和合本 希腊文(WH-NT) 下载档案 关于语音圣经
24:1 Páu-lô tī Hoe-lek-su Bīn-chêng Siū Sím-phòaⁿ
Gō͘ ji̍t āu, tōa-chè-si A-ná-ni-a kah kúi-nā-ê tiúⁿ-ló, í-ki̍p chi̍t-ê miâ kiò-chò Tel-tû-lô ê lu̍t-su, lâi-kàu Kai-sa-lī-a. In tùi Hoe-lek-su chóng-tok khòng-kò Páu-lô.
24:2 Páu-lô siū-tiàu chhut-têng, Tel-tû-lô chiū khai-sí khòng-kò, kóng, " Hoe-lek-su tāi-jîn, goán tùi lí ê hiân-bêng tī-lí tit tio̍h thài-pêng, lí koh ū sian-kiàn chi-bêng, hō͘ kok-ka tit tio̍h kái kek kah chìn-pō͘.
24:3 Lí ê tek-chèng hō͘ goán tī ta̍k sî ta̍k ūi lóng kám-siā put-chīn.
24:4 Taⁿ góa m̄-káⁿ tam-gō͘ lí siuⁿ kú, kiû lí khoan-iông lâi thiaⁿ goán kúi-kù ōe.
24:5 Goán ū chhâ-chhut chit-ê lâng ná chhin-chhiūⁿ un-e̍k, tī choân sè-kài ê Iô-tá-iah lâng tiong-kan ín khí jiáu-loān. I sī Na-cha-lia̍t tóng ê thâu-ba̍k,
24:6 Liân sèng-tiān i to beh kā i ù-òe, goán chiū kā i lia̍h khí-.lâi, siūⁿ beh chiàu goán kakī ê lu̍t-hoat kā i sím-phòaⁿ.
24:7 Bô phah-sǹg, iâⁿ-tiúⁿ Lū-si-a lâi kan-sia̍p, kā i tùi goán ê chhiú tiong kiông chhiúⁿ-.khì, bēng-lēng beh kò i ê lâng tio̍h lâi lí chia.
24:8 Chhiáⁿ lí chhin-sin kā i sím-mn̄g, chiū ē bêng-pe̍k goán kò i ê ta̍k hāng tāichì. "
24:9 Chāi-tiûⁿ ê Iô-tá-iah lâng mā lóng chham lo̍h-khì khòng-kò i, kóng, " Tāi-chì khak-si̍t sī ánne. "
24:10 Páu-lô tī Hoe-lek-su Bīn-chêng Ūi Ka-kī Piān-hō͘
Chóng-tok tìm-thâu, kiò Páu-lô tap-piān. I chiū kóng, " Góa chai lí chip-chèng sím-phòaⁿ àn-kiāⁿ chin chē nî, só͘-í, góa hoaⁿ-hí tī lí ê bīn-chêng ūi kakī piān-hō͘.
24:11 Lí nā tiâu-cha chiū ē chai, góa chiūⁿ Ê-lú-sa-lèm kèng-pài, kàu taⁿ chí-put-kò cha̍p-jī ji̍t.
24:12 Iô-tá-iah lâng pēng bô khòaⁿ tio̍h góa tī tiān lāi kah lâng piān-lūn, mā bô khòaⁿ tio̍h góa tī hōe-tn̂g á-.sī siâⁿ lāi siàn-tōng bîn-chiòng.
24:13 In mā bē tàng tùi lí the̍h-chhut chitmá teh kā góa khòng-kò ê chèng-kì.
24:14 To̍k-to̍k góa tio̍h tùi lí sêng-jīn chi̍t hāng tāichì, to̍h-sī góa chiàu in khòaⁿ-chò īⁿ-toan ê tō-lō͘, lâi ho̍k-sāi goán chó͘-sian ê Siōng-tè. Góa mā ū siong-sìn Mô͘-se ê lu̍t-hoat kah tī sian-ti ê chheh só͘ kì-chài ê.
24:15 Góa tùi Siōng-tè ū khǹg kah in kāng-khoán ê ǹg-bāng, to̍h-sī bô-lūn gī lâng á-.sī put-gī ê lâng lóng ē tùi sí koh-oa̍h, che mā sī in kakī só͘ teh him-bō͘ ê tāichì.
24:16 In-ūi ánne, góa tùi Siōng-tè kah tùi lâng, lóng pó-chhî chheng-pe̍h ê liông-sim.
24:17 Góa lī-khui Ê-lú-sa-lèm kúi-nā nî, taⁿ koh tńg-lâi sī beh chín-chè tông-pau, koh hiàn lé-mi̍h.
24:18 In tī sèng-tiān khòaⁿ tio̍h góa ê sî, góa í-keng oân-sêng kiat-chēng-lé. Hit sî, pēng bô kûn-chiòng, mā bô jiáu-loān,
24:19 Kan-taⁿ ū kúi-nā-ê tùi A-si-a séng lâi ê Iô-tá-iah lâng tī hia. In nā beh kò góa, eng-kai kakī lâi lí ê bīn-chêng kò góa chiah tio̍h ah.
24:20 Nā bô, góa khiā tī gī-hōe teh sin-sò͘ ê sî, in tio̍h chí-chhut góa ū siáⁿ-mi̍h m̄ tio̍h ê só͘-chāi.
24:21 In chí ū chi̍t hāng tāichì ē-tàng kā góa khòng-kò, to̍h-sī góa bat khiā tī in tiong-kan tōa-siaⁿ hoah, ' Góa kin-á-ji̍t siū lín sím-phòaⁿ, sī ūi tio̍h sí-lâng koh-oa̍h ê tāichì. '"
24:22 Hoe-lek-su tùi chit-ê tō ê tāichì siong-tong chheng-chhó, chiū soan-pò͘ thè-têng, kóng, " Tán iâⁿ-tiúⁿ Lū-si-a lo̍h-.lâi ê sî, góa chiah lâi phòaⁿ-koat lín ê àn-kiāⁿ. "
24:23 Jiân-āu Hoe-lek-su bēng-lēng liân-tiúⁿ kò͘-siú Páu-lô, mā hō͘ i tām-po̍h-á hêng-tōng ê chū-iû, mā chún i ê pêng-iú sàng i su-iàu ê mi̍h-kiāⁿ lâi hō͘ i.
24:24 Páu-lô Koaiⁿ tī Kaⁿ Ni̍h
Kòe kúi-nā ji̍t liáu-āu, Hoe-lek-su kah i ê bó͘ Tu-lu-si-lah chò-hóe lâi, i sī Iô-tá-iah lâng. I chiū kiò Páu-lô chhut-.lâi, in ài beh thiaⁿ Páu-lô káng-lūn sìn Ki-tok I-é-su ê tō-lí.
24:25 Páu-lô kóng-kàu kong-gī, chiat-chè kah chiong-lâi ê sím-phòaⁿ ê sî, Hoe-lek-su put-chí kiaⁿ, ìn kóng, " Taⁿ lí hó chhut-khì à, ū ki-hōe chiah koh chhiáⁿ lí lâi. "
24:26 Lēng-gōa i mā kî-thāi Páu-lô ē siap gîn hō͘ i, só͘-í, tiāⁿtiāⁿ tiàu Páu-lô lâi kah i tâm-lūn.
24:27 Kòe nn̄g nî, Pho-kiû • Hui-su-to͘ sòa-chiap Hoe-lek-su chò chóng-tok. Hoe-lek-su ūi tio̍h beh hō͘ Iô-tá-iah lâng hoaⁿ-hí, kè-sio̍k kā Páu-lô koaiⁿ tī kaⁿ-.ni̍h.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。