使徒行传 线上收听:中文和合本 现代中文译本修订版 现代台语 台语圣经 台语(长老会传播中心授权） 客语 现代客语 粤语和合本 希腊文(WH-NT) 下载档案 关于语音圣经
22:1 Páu-lô kóng, " Kok-ūi hū-ló hiaⁿ-tī, chhiáⁿ thiaⁿ góa chit-chūn beh ūi kakī piān-kái ê ōe. "
22:2 In thiaⁿ tio̍h Páu-lô ēng Hi-bú-lâi ōe tùi in kóng, chiū koh khah an-chēng lo̍h-.lâi. Páu-lô kóng,
22:3 " Góa to̍h-sī Iô-tá-iah lâng, chhut-sì tī Ki-lí-kiah ê Tà-soh, tī Ê-lú-sa-lèm siâⁿ chò Gâ-má-li-el ê bûn-tô͘ tióng-tōa kah kin-á-ji̍t tī chia ê kok-ūi kāng-khoán, ū siū lán chó͘-sian giâm-keh lu̍t-hoat ê kà-sī, jia̍t-sim ho̍k-sāi Siōng-tè.
22:4 Góa bat pek-hāi chun-siú chit-ê tō-lí ê lâng hō͘ i sí, bô-lūn lâm-lí lóng lia̍h khí-.lâi, kā in koaiⁿ lo̍h kaⁿ.
22:5 Tōa-chè-si kah choân tiúⁿ-ló gī-hōe ê lâng, lóng ē-tàng ūi góa chò-chèng. Góa mā tùi in the̍h tio̍h kià hō͘ Ta-má-su-ko sìn-tô͘ ê phoe. Góa ū khì hia, beh lia̍h tī hia ê sìn-tô͘, kā in ah lâi Ê-lú-sa-lèm siū hêng-hoa̍t. "
22:6 Páu-lô Kóng Ka-kī Kui Chú ê Keng-kòe
( Ht 9: 1-19; 26: 12-18)
" Góa kiâⁿ beh kàu Ta-má-su-ko ê sî, hit sî chha-put-to sī tiong-tàu, hut-jiân ū chin-kiông ê kng tùi thiⁿ chiò-siā tī góa sì-kho͘-ûi.
22:7 Góa poa̍h lo̍h-khì thô͘-kha, thiaⁿ tio̍h ū siaⁿ tùi góa kóng, ' Sàu-lô, Sàu-lô, lí ná ē beh pek-hāi góa? '
22:8 Góa ìn kóng, ' Chú ah, Lí sī siáⁿ lâng? ' I ìn góa kóng, ' Góa to̍h-sī lí teh poek-hāi ê Na-cha-lia̍t lâng I-é-su. '
22:9 Kah góa chò-hóe ê lâng ū khòaⁿ tio̍h hit-ê kng, bô thiaⁿ tio̍h tùi góa kóng ōe hit ūi ê siaⁿ.
22:10 Góa koh mn̄g kóng, ' Chú ah, góa tio̍h án-chóaⁿ chò? ' Chú kā góa kóng, ' Khí-.lâi, ji̍p-khì Ta-má-su-ko, tī hia ū lâng ē kā lí kóng góa beh chí-phài lí khì chò ê tāichì. '
22:11 In-ūi hit-ê kng chin kiông, góa soah piàn chheⁿmê, góa ê tâng-phōaⁿ kā góa khan ji̍p-khì Ta-má-su-ko.
22:12 " Tī hia ū chi̍t-ê miâ kiò-chò A-ná-ni-a ê lâng, sī chi̍t-ê chun-siú Mô͘-se lu̍t-hoat koh kèng-khiân ê lâng, chin siū tòa tī hia ê Iô-tá-iah lâng chun-kèng.
22:13 I lâi chhōe góa, khiā tī góa ê sin piⁿ, kā góa kóng, ' Sàu-lô hiaⁿ-tī, hō͘ lí koh ū khòaⁿ-kìⁿ. ' Góa sûi-sî gia̍h thâu, chiū ū khòaⁿ-kìⁿ i.
22:14 I kóng, ' Lán chó͘-sian ê Siōng-tè í-keng kéng-soán lí, hō͘ lí chai-iáⁿ I ê chí-ì, hō͘ lí khòaⁿ-kìⁿ hit ūi kong-gī ê lô͘-po̍k, koh thiaⁿ tio̍h I ê chhùi só͘ kóng ê ōe,
22:15 In-ūi lí ē kā lí só͘ khòaⁿ tio̍h kah só͘ thiaⁿ-.tio̍h ê, tùi bān-bîn chò kiàn-chèng.
22:16 Taⁿ kóaⁿ-kín khí-lâi niá siū sé-lé, kiû-kiò I ê miâ, lâi sé-chheng lí ê chōe. '"
22:17 Páu-lô Siū Ho͘-tiàu Khì Tùi Gōa-pang lâng Thoân-tō
" Āu-lâi, góa tńg-lâi Ê-lú-sa-lèm, tī sèng-tiān kî-tó ê sî, khòaⁿ-kìⁿ ī-siōng.
22:18 Góa khòaⁿ tio̍h Chú tùi góa kóng, ' Lí tio̍h kóaⁿ-kín lī-khui Ê-lú-sa-lèm, in-ūi chit só͘-chāi ê lâng bô beh chiap-la̍p lí ūi tio̍h góa só͘ chò ê kiàn-chèng. '
22:19 Góa ìn kóng, ' Chú ah, in lóng chai góa í-chêng tī ta̍k-ê hōe-tn̂g kā sìn Lí ê lâng koaiⁿ lo̍h kaⁿ koh kā in phah.
22:20 Lí ê kiàn-chèng-jîn Su-tê-hoa-no͘h hō͘ lâng sat-hāi ê sî, góa mā khiā tī piⁿ-á kā in chàn-tông, koh ūi kā i hāi-sí ê lâng kò͘ gōa-saⁿ. '
22:21 Chú tùi góa kóng, ' Lí khì, góa beh chhe lí khì hn̄g-hn̄g ê gōa-pang lâng hia. '"
22:22 Páu-lô kah Lô-má Iâⁿ-tiúⁿ
Chèng lâng chi̍t-ē thiaⁿ tio̍h Páu-lô kóng chit kù ōe, chiū tōa-siaⁿ kóng, " Chit khoán lâng tio̍h tùi tē-chiūⁿ siau-bia̍t, m̄ thang hō͘ i oa̍h lo̍h-.khì. "
22:23 Kûn-chiòng tōa-siaⁿ jióng, thǹg gōa-saⁿ, ǹg khong-tiong iā thô͘-soa hún ê sî,
22:24 Kun-koaⁿ chiū bēng-lēng kā Páu-lô chhōa ji̍p-khì iâⁿ-pâng, ēng piⁿ kā i phah lâi sím-mn̄g, ài beh chai-iáⁿ ūi siáⁿ-mi̍h Iô-tá-iah lâng ánne kā i jiáng.
22:25 In tú beh ēng phê-tòa kā i pa̍k ê sî, Páu-lô tùi piⁿ-á teh khiā ê kun-koaⁿ kóng, " Tùi chi̍t-ê iáu-bōe siū phòaⁿ-chōe ê Lô-má lâng, lín ēng piⁿ kā i phah, kám thang? "
22:26 Hitê kun-koaⁿ chi̍t-ē thiaⁿ-.tio̍h, chiū khì kìⁿ iâⁿ-tiúⁿ, kóng, " Taⁿ beh án-chóaⁿ chiah hó? Chit-ê lâng sī Lô-má kong-bîn! "
22:27 Iâⁿ-tiúⁿ lâi kìⁿ Páu-lô, mn̄g i kóng, " Kā góa kóng, lí kám sī Lô-má kong-bîn? " Páu-lô kóng, " Sī. "
22:28 Iâⁿ-tiúⁿ ìn kóng, " Góa ēng chin chē gîn chiah bé tio̍h chit-ê kong-bîn-koân. " Páu-lô kóng, " Góa chhut-sì to̍h-sī Lô-má kong-bîn. "
22:29 Hiahê beh sím-mn̄g Páu-lô ê lâng chiū sûi-sî lī-khui. Iâⁿ-tiúⁿ chi̍t ē chai-iáⁿ Páu-lô sī Lô-má kong-bîn, koh in-ūi bat kā i pa̍k, chiū chin kiaⁿ.
22:30 Páu-lô tī Gī-hōe Hông Sím-mn̄g
Keh tńg kang, iâⁿ-tiúⁿ ài beh chai Páu-lô hō͘ Iô-tá-iah lâng kò ê si̍t-chêng, chiū kā i tháu-khui, bēng-lēng hiahê chè-si-tiúⁿ kah choân 议 ē chū-chi̍p, chhōa Páu-lô lo̍h-.lâi, hō͘ i khiā tī in ê bīn-chêng.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。