使徒行传 线上收听:中文和合本 现代中文译本修订版 现代台语 台语圣经 台语(长老会传播中心授权） 客语 现代客语 粤语和合本 希腊文(WH-NT) 下载档案 关于语音圣经
15:1 Ê-lú-sa-lèm Hōe-gī
Ū kúi-nā-ê lâng tùi Iô-tá-iah lo̍h-lâi An-ti-o-khè teh kà-sī sìn-tô͘, kóng, " Nā bô chun-siú Mô͘-se ê lu̍t-lē lâi siū kat-lé, chiū bē tàng tit tio̍h kiù. "
15:2 Páu-lô kah Ba-ná-ba hām in ū tōa cheng-lūn, tāi-ke chiū phài Páu-lô kah Ba-ná-ba, í-ki̍p in tiong-kan lēng-gōa kúi-nā-ê lâng, chiūⁿ Ê-lú-sa-lèm khì kìⁿ sù-tô͘ kah tiúⁿ-ló, kā só͘ piān-lūn ê tāichì kah in thó-lūn.
15:3 Kàu-hōe ê lâng sàng in chhut-hoat. In keng-kòe Hoe-ní-ke kah Sa-má-lī-a, kóng-khí gōa-pang lâng kui Chú ê tāichì, hō͘ chèng hōe-iú thiaⁿ-liáu chin hoaⁿ-hí.
15:4 In lâi-kàu Ê-lú-sa-lèm, siū tio̍h kàu-hōe kah sù-tô͘ í-ki̍p tiúⁿ-ló ê hoan-gêng, in chiū kóng-khí Siōng-tè kah in tông-chāi só͘ chò it-chhè ê tāichì.
15:5 M̄ koh, ū kúi-nā-ê sio̍k Hoa-lí-sái phài ê sìn-tô͘ khí-lâi kóng, " Tek-khak tio̍h kā hiahê gōa-pang lâng ê sìn-tô͘ kiâⁿ kat-lé, bēng-lēng in tio̍h chun-siú Mô͘-se ê lu̍t-hoat. "
15:6 Sù-tô͘ kah tiúⁿ-ló chū-chi̍p chham-siông chit-hāng tāichì.
15:7 Chham-siông chin kú liáu-āu, Piat-tò͘ chiū khí-lâi tùi in kóng, " Kok-ūi hiaⁿ-tī, lín lóng chai, Siōng-tè chá to̍h tī lín tiong-kan kéng-soán góa, hō͘ gōa-pang lâng tùi góa ê chhùi thiaⁿ tio̍h hok-im ê tō-lí lâi sìn.
15:8 Chai-iáⁿ lâng lāi-sim ê Siōng-tè kah tùi-thāi lán kāng-khoán, mā ū siúⁿ-sù Sèng Sîn hō͘ gōa-pang lâng, lâi chèng-bêng Siōng-tè ū chiap-la̍p in.
15:9 Tùi sìn, Siōng-tè ēng Sèng Sîn kā in ê sim sé chheng-khì, I tùi-thāi lán kah in lóng bô chha-pia̍t.
15:10 Kì-jiân sī ánne, lín ná ē iáu teh chhì-thàm Siōng-tè, ēng lán ê chó͘-sian kah lán só͘ taⁿ bē khí ê tàⁿ, hē tī hiahê bûn-tô͘ ê keng-kah-thâu?
15:11 Lán siong-sìn tùi Chú I-é-su ê un-tián lâi tit-kiù, in mā sī ánne teh sìn. "
15:12 Tāi-ke lóng tiām-tiām-thiaⁿ Ba-ná-ba kah Páu-lô kóng-khí Siōng-tè ēng in tī gōa-pang lâng tiong-kan só͘ kiâⁿ it-chhè ê sîn-jiah kî-sū.
15:13 In kóng soah, Iâ-kop chiū ìn kóng, " Kok-ūi hiaⁿ-tī, chhiáⁿ thiaⁿ góa kóng.
15:14 Tú-chiah Sí-mòng kóng-khí Siōng-tè khí-thâu án-chóaⁿ chiàu-kò͘ gōa-pang lâng, tùi in tiong-kan kéng-soán lâng lâi kui I kakī.
15:15 Sian-ti mā ū kóng-khí kah chit-ê tāichì kāng-khoán ì-sù ê ōe.
15:16 Chiàu kì-chài, Chiahê tāichì liáu-āu, góa beh tò tńg-.lâi, tiông-kiàn Ta-bi̍t tó lo̍h-.khì ê pò͘-pêⁿ, góa beh koh kā hiahê tó-hoāi ê khí-chō, kā i tiông-sin kiàn-li̍p khí-.lâi,
15:17 Thang hō͘ chhun lo̍h-.lâi ê lâng kah só͘-ū hōng góa ê miâ ê gōa-pang lâng, lóng lâi cháu-chhōe Chú. ' (chù, AMS 9:11-12)
15:18 hit ūi tùi sè-kan ê khí-thâu to̍h hián-bêng chiahê tāichì ê Siōng-tè ánne kóng ê. "
15:19 " Só͘-í, góa siūⁿ kóng, tùi kui Chú ê gōa-pang lâng, lán m̄ thang kā in ûi-lân.
15:20 To̍k-to̍k lán tio̍h siá phoe kā in hoan-hù, m̄ thang chia̍h pài ngó͘-siōng bô chheng-khì ê mi̍h, m̄ thang îm-loān, m̄ thang chia̍h ni̍h-sí ê mi̍h kah hoeh.
15:21 In-ūi chū kó͘ í-lâi, tī ta̍k-ê siâⁿ-chhī ū thoân-káng Mô͘-se ê lu̍t-hoat, to̍h-sī ta̍k-ê An-hioh-ji̍t tī hōe-tn̂g só͘ tha̍k ê. "
15:22 Hō͘ Gōa-pang lâng Sìn-tô͘ ê Phoe
Hit sî, sù-tô͘, tiúⁿ-ló kah choân kàu-hōe koat-tēng, beh tùi in tiong-kan kéng-soán tāi-piáu, to̍h-sī kiò-chò Ba-sà-bah ê Iô-tah kah Se-la̍h, chit nn̄g-ê lâng sī hiaⁿ-tī tiong ê kia̍t-chhut jîn-bu̍t.
15:23 In chiū chhe-phài chit nn̄g-ê lâng kah Páu-lô í-ki̍p Ba-ná-ba chò-hóe khì Ai-ti-o-khè. Kau-tài in tòa-.khì ê phoe ánne kóng, " Goán chiahê chò sù-tô͘ kah tiúⁿ-ló ê hiaⁿ-tī, kā tòa tī Ai-ti-o-khè, Su-lī-a kah Ki-lí-kiah ê hiaⁿ-tī chhéng-an!
15:24 Thiaⁿ-kóng kúi-nā-ê lâng tùi goán chia chhut-.khì, ēng m̄-sī goán kau-tài ê ōe kā lín kiáu-jiáu, jiáu-loān lín ê sim.
15:25 Ūi tio̍h ánne, goán tâng-sim ha̍p-ì koat-tēng kéng-soán tāi-piáu, chhe-phài in kah goán só͘ thiàⁿ ê Ba-ná-ba í-ki̍p Páu-lô khì lín hia;
15:26 Chit nn̄g-ê lâng ūi tio̍h lán ê Chú I-é-su Ki-tok ê miâ, kam-goān hi-seam in ê sèⁿ-miā.
15:27 Só͘-í, goán chhe-phài Iô-tah kah Se-la̍h, in ē tùi lín kóng-khí kah poe lāi só͘ siá kāng-khoán ê tāichì.
15:28 In-ūi Sèng Sîn kah goán koat-tēng, tû-liáu chit kúi hāng iàu-kín ê tāichì í-gōa, bô ài ke-thiⁿ tāng-tàⁿ tī lín ê sìn-gióng seng-oa̍h.
15:29 Lín m̄ thang chia̍h chè-kòe ngó͘-siōng ê mi̍h, m̄ thang chia̍h ni̍h-sí ê chengseⁿ kah hoeh, m̄ thang îm-loān. Lín nā bô hoān tio̍h chiahê kài-bēng chiū hó. Goān lín pêng-an. "
15:30 In hōng chhe-phài, chiū lo̍h-khì Ai-ti-o-khè, tī hia chū-chi̍p choân-thé sìn-tô͘, kā phoe kau hō͘ in.
15:31 Chèng lâng tha̍k hit-tiuⁿ phoe liáu-āu, siū tio̍h kó͘-lē, chiū tōa hoaⁿ-hí.
15:32 Iô-tah kah Se-la̍h pún-sin mā sī sian-ti, in ēng chin chē ōe an-ùi sìn-tô͘, lâi kian-kò͘ in ê sìn-sim.
15:33 In tòa hia ū chi̍t tōaⁿ sî-kan liáu-āu, siū tio̍h sìn-tô͘ ê hoan-sàng, pêng-an tńg-khì chhe-phài in lâi ê lâng hia.
15:34 M̄ koh, Se-la̍h koat-tēng lâu tòa hia. (chù, goân pán-pún bô chit chat, ū ê chhau-pún ke chit chat. )
15:35 Páu-lô kah Ba-ná-ba kè-sio̍k tī An-ti-o-khè kah chin chē kî-tha ê lâng chò-hóe kà-sī lâng, thoân Siōng-tè hok-im ê tō-lí.
15:36 Páu-lô kah Ba-ná-ba Hun-khui
Kòe kúi-nā ji̍t āu, Páu-lô tùi Ba-ná-ba kóng, " Lán tio̍h koh khì chá-chêng thoân Siōng-tè ê tō-lí ê siâⁿ-chhī thàm-hóng sìn-tô͘, khòaⁿ in ê chêng-hêng. "
15:37 Ba-ná-ba ài beh chhōa kiò-chò Má-khó ê Iô-há-neh chò-hóe khì.
15:38 To̍k-to̍k Páu-lô siūⁿ kóng ánne bô sek-ha̍p, in-ūi chit-ê Iô-há-neh tī Pam-hu-lí-ah bat lī-khui in, bô kè-sio̍k kah in chò-kang.
15:39 Nn̄g lâng ì-kiàn ke̍k-le̍k chhiong-tu̍t, tì-sú tio̍h hun-khui. Ba-ná-ba tòa Má-khó chē chûn khì Ku-pu-liò;
15:40 Páu-lô kéng Se-la̍h chò-hóe lī-khui, sìn-tô͘ kā in kau-thok tī Chú ê un-tián.
15:41 In kā Su-lī-a kah Ki-lí-kiah kiâⁿ thàu-thàu, kian-kò͘ ta̍k kàu-hōe ê sìn-sim.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。