使徒行传 线上收听:中文和合本 现代中文译本修订版 现代台语 台语圣经 台语(长老会传播中心授权） 客语 现代客语 粤语和合本 希腊文(WH-NT) 下载档案 关于语音圣经
14:1 Páu-lô kah Ba-ná-ba tī Í-ko-ni-óng
Páu-lô kah Ba-ná-ba tī Í-ko-ni-óng, chò-hóe ji̍p-khì Iô-tá-iah lâng ê hōe-tn̂g káng-tō, kiat-kó ū chin chē Iô-tá-iah lâng kah Hi-la̍h lâng lâi sìn.
14:2 M̄ koh, hiahê m̄-sìn ê Iô-tá-iah lâng siàn-tōng gōa-pang lâng, hō͘ in oàn-hūn sìn-tô͘.
14:3 Chit nn̄g-ūi sù-tô͘ chiū tiàm hia chin kú, óa-khò Chú hó-táⁿ soan-káng hok-im. Chú siúⁿ-sù hō͘ in ū lêng-le̍k kiâⁿ sîn-jiah kî-sū, lâi kiàn-chèng in só͘ thoân un-tián ê tō-lí.
14:4 Siâⁿ lāi ê kûn-chiòng chiū ánne pun-chò nn̄g pêng; ū ê tòe Iô-tá-iah lâng, ū ê tòe sù-tô͘.
14:5 Hit sî, gōa-pang lâng, Iô-tá-iah lâng kah in ê koaⁿ-tiúⁿ kè-bô͘ lêng-jio̍k sù-tô͘, beh ēng chio̍h-thâu kā in tìm.
14:6 Sù-tô͘ chai chit-ê tāichì, chiū tô-cháu khì Lū-káu-nî-a ê Lú-su-toh kah Tel-bé nn̄g-ê siâⁿ, í-ki̍p sì-kho͘-ûi ê só͘-chāi,
14:7 Tī hia kè-sio̍k thoân hok-im.
14:8 Páu-lô kah Ba-ná-ba tī Lú-su-toh
Tī Lú-su-toh ū chi̍t-ê pái-kha-.ê, put-sî chē-.leh, sī tùi chhut-sì chiū nńg-kha, lóng bē kiâⁿ.
14:9 I lâi thiaⁿ Páu-lô káng tō-lí, Páu-lô lia̍h i kim-kim khòaⁿ, khòaⁿ tio̍h i ū sìn-sim thang tit tio̍h hó,
14:10 Chiū tōa-siaⁿ kóng, " Khiā khí-.lâi! Siang-kha khiā hō͘ ti̍t-ti̍t. " Hitê lâng chiū thiàu khí-lâi kiâⁿ.
14:11 Chèng lâng khòaⁿ tio̍h Páu-lô só͘ chò ê, chiū ēng Lū-káu-nî-a ōe tōa-siaⁿ kóng, " Ū sîn-bêng hòa-sin chò lâng, lîm-kàu lán tiong-kan ā. "
14:12 In chheng-ho͘ Ba-ná-ba chò " Che-ú-su " (chù, Hi-la̍h sîn-ōe tiong ê chiòng-sîn chi ông, Zeus), chheng-ho͘ Páu-lô chò " Hel-mé-su " (chù, Hi-la̍h sîn-ōe tiong kháu-châi chi sîn, Hermes), in-ūi lóng sī i teh chhōa-thâu kóng-ōe.
14:13 Siâⁿ gōa ū chi̍t-ê Che-ú-su biō ê chè-si, i khan gû-á, the̍h hoe-khoân, lâi-kàu siâⁿ mn̂g-kháu, beh kah chèng lâng chò-hóe tùi in hiàn chè.
14:14 Ba-ná-ba kah Páu-lô thiaⁿ-.tio̍h, chiū thiah-li̍h saⁿ, chông ji̍p-khì kûn-chiòng lāi-bīn, tōa-siaⁿ hoah,
14:15 " Lín tāi-ke ná ē ánne chò? Goán mā sī lâng kah lín lóng kāng-khoán. Goán lâi chia thoân hok-im, sī beh hō͘ lín lī-khui chiahê hi-ké ê ngó͘-siōng, lâi kui-ǹg hit ūi éng-oán oa̍h ê Siōng-tè, I sī thiⁿ, tē, hái kah kî-tiong bān-mi̍h ê chhòng-chō chiá. (chù, SPh 146:6)
14:16 Siōng-tè chá-chêng iông-ín bān-pang kiâⁿ in kakī ê lō͘.
14:17 M̄ koh, Siōng-tè it-ti̍t thong-kòe só͘ chò ê hó sū lâi hián-bêng pún-sin; to̍h-sī tùi thiⁿ lo̍h hō͘, chiàu-sî siu-sêng, hō͘ lín chia̍h-mi̍h chhiong-chiok koh sim-lāi chhiong-móa hí-lo̍k.
14:18 Sù-tô͘ sûi-jiân ū kóng chiahê ōe, iáu koh bô hoat-tō͘ chó͘-chí kûn-chiòng tùi in hiàn chè.
14:19 Chóng-.sī, ū chi̍t-kóa tùi An-ti-o-khè kah Í-ko-ni-óng-lâi ê Iô-tá-iah lâng, siàn-tōng kûn-chiòng, ēng chio̍h-thâu tìm Páu-lô, siūⁿ kóng i í-keng sí, chiū kā i thoa chhut-khì siâⁿ gōa.
14:20 Bûn-tô͘ ûi óa-.lâi, i chiū khí-.lâi, ji̍p-khì siâⁿ lāi. Keh tńg kang, i kah Ba-ná-ba lī-khui hia khì Tel-bé.
14:21 Tńg Khì Ai-ti-o-khè
Páu-lô kah Ba-ná-ba tī Tel-bé thoân hok-im, hō͘ chin chē lâng chiâⁿ-chò sìn-tô͘. Āu-lâi, in tńg-khì Lú-su-toh, Í-ko-ni-óng kah Ai-ti-o-khè,
14:22 Iân-lō͘ kian-kò͘ sìn-tô͘ ê sìn-sim, kó͘-lē in kian-chhî sìn-sim, koh kóng, " Lán tio̍h tùi chin chē kan-khó͘ lâi chìn-ji̍p Siōng-tè kok-tō͘. "
14:23 In nn̄g lâng tī ta̍k-ê kàu-hē kā in siat-li̍p tiúⁿ-ló, kìm-chia̍h kî-tó, kā in kau-thok tī in só͘ sìn ê Chú.
14:24 In keng-kòe Pí-si-tia lâi-kàu Pam-hu-lí-ah.
14:25 In tī Pek-gē káng tō-lí liáu-āu, chiū lo̍h-khì A-ta-liah.
14:26 In tùi hia chē chûn lâi-kàu Ai-ti-o-khè, to̍h-sī in bat tī hia siū kau-thok tī Siōng-tè ê un-tián tiong, lâi oân-sêng bí-hó ê kang.
14:27 In chi̍t-ē kàu-ūi, chiū chū-chi̍p kàu-hōe ê sìn-tô͘, kā in kah Siōng-tè tâng-kang it-chhè só͘ chò ê, í-ki̍p Siōng-tè kā gōa-pang lâng khui sìn-gióng ê mn̂g ê tāichì, lóng kā in pò-kò.
14:28 Āu-lâi, in kah bûn-tô͘ chò-hóe tòa siong-tong kú.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。