使徒行传 线上收听:中文和合本 现代中文译本修订版 现代台语 台语圣经 台语(长老会传播中心授权） 客语 现代客语 粤语和合本 希腊文(WH-NT) 下载档案 关于语音圣经
12:1 He-lo̍t Pek-hāi Kàu-hōe
Chha-put-to hit sî, Hi-lu̍t ông hē-chhiú pek-hāi chi̍t-kóa kàu-hōe ê lâng,
12:2 Ēng to thâi-sí Iô-há-neh ê a-hiaⁿ Iâ-kop.
12:3 I khòaⁿ-chhut chit-ê tāichì hō͘ Iô-tá-iah lâng hoaⁿ-hí, chiū koh sòa lo̍h-khì lia̍h Piat-tò͘; chit-ê tāichì tī Tû-kàⁿ-cheh ê kî-kan hoat-seng.
12:4 I lia̍h tio̍h Piat-tò͘ chiū kā i koaiⁿ lo̍h kaⁿ, kau hō͘ sì pan ê peng kò͘-siú, múi pan sì lâng. He-lo̍t àn-sǹg beh tī Pôaⁿ-kòe-cheh āu ah i chhut-.lâi, tī chèng lâng ê bīn-chêng kā i sím-phòaⁿ.
12:5 Piat-tò͘ chiū ánne hō͘ lâng koaiⁿ tī kaⁿ-.ni̍h; kàu-hōe thè i pek-chhiat tùi Siōng-tè kî-tó.
12:6 Piat-tò͘ Hông Kiù Chhut Kaⁿ
He-lo̍t teh beh ah i chhut-lâi sím-phòaⁿ ê chêng chi̍t mê, Piat-tò͘ hō͘ lâng ēng nn̄g tiâu thih-liān-á liān teh, khùn tī nn̄g-ê peng ê tiong-kan, koh ū kéng-ōe tī mn̂g gōa teh kò͘-siú.
12:7 Hut-jiân ū Chú ê thiⁿ-sài khiā tī piⁿ-á, pâng lāi ū kng teh chiò. Thiⁿ-sài tah Piat-tò͘ ê keng-kah-thâu, kā i kiò-chhéⁿ, kóng, " Kín khí-.lâi! " thih-liān-á chiū tùi i ê chhiú lak lo̍h-.khì.
12:8 Thiⁿ-sài kā i kóng, " Tio̍h hâ tòa, chhēng ê. " Piat-tò͘ chiàu ánne chò. Thiⁿ-sài koh kóng, " Moa lí ê gōa-saⁿ, tòe góa lâi! "
12:9 Piat-tò͘ chiū chhut-lâi tòe thiⁿ-sài khì; i m̄-chai thiⁿ-sài teh chò ê sī chin-si̍t ê, lia̍h-chò sī khòaⁿ tio̍h ī-siōng.
12:10 In keng-kòe tē-it koan kah te-jī koan kò͘-siú ê ōe-peng, lâi-kàu chhut siâⁿ ê thih-mn̂g, hit-ê mn̂g chū-tōng khui, in chiū chhut-.khì, kiâⁿ-kòe chi̍t tiâu ke liáu-āu, thiⁿ-sài sûi-sî lī-khui Piat-tò͘.
12:11 Piat-tò͘ chhéⁿ-ngō͘ khí-.lâi, kóng, " Taⁿ góa chin-chiàⁿ chai, Chú chhe I ê thiⁿ-sài kiù góa thoat-lī He-lo̍t ê chhiú kah Iô-tá-iah lâng choân-pō͘ ê kè-bô͘. "
12:12 Piat-tò͘ siūⁿ chheng-chhó chit-ê tāichì liáu-āu, chiū khì mā kiò-chò Má-khó ê Iô-há-neh ê lāu-bú Mâ-lí-ah ê chhù. Tī hia ū chin chē lâng chū-chi̍p teh kî-tó.
12:13 Piat-tò͘ phah gōa-kháu mn̂g ê sî, ū chi̍t-ê miâ kiò-chò Lô-tāi ê chabó͘ gín'á chhut-lâi thiaⁿ khòaⁿ sī siáⁿ-mi̍h lâng.
12:14 I jīn-chhut sī Piat-tò͘ ê siaⁿ, hoaⁿ-hí kah bē kò͘-tit khui mn̂g, cháu ji̍p-khì pò-kò kóng, Piat-tò͘ khiā tī mn̂g-kha-kháu.
12:15 M̄ koh, in tùi i kóng, " Lí teh khí-siáu o͘-pe̍h-kóng! " Cha-bó͘ gín'á kian-chhî kóng ū-iáⁿ. In chiū kóng, " Án-ne, it-tēng sī Piat-tò͘ ê thiⁿ-sài. "
12:16 Piat-tò͘ koh it-ti̍t phah mn̂g. In khui mn̂g khòaⁿ tio̍h Piat-tò͘, tio̍h-kiaⁿ kah gāng-.khì.
12:17 Piat-tò͘ iô chhiú kiò in mài chhut siaⁿ, chiū kā in soat-bêng Chú án-chóaⁿ chhōa i chhut kaⁿ. Koh kóng, " Tio̍h kā chiahê tāichì tùi Iâ-kop kah chèng sìn-tô͘ kóng. " kóng soah chiū lī-khui, khì pa̍t só͘-chāi.
12:18 Kàu thiⁿ-kng ê sî, khòaⁿ-siú ê peng-á m̄-chai Piat-tò͘ cháu-khì tó-ūi, chiū loān chhau-chhau.
12:19 He-lo̍t phài lâng khì chhōe, lóng chhōe bô. I chiū sím-mn̄g kò͘-siú ê peng-á, kiat-kó bēng-lēng kā in thoa chhut-khì thâi. Chit-ê tāichì liáu-āu, He-lo̍t chiū lī-khui Iô-tá-iah, lo̍h-khì Kai-sa-lī-a tòa.
12:20 He-lo̍t ê Sí-bông
He-lo̍t tùi Tu-lô kah Si-tòng ê lâng hui-siông siū-khì, só͘-í, hiahê lâng liân-ha̍p phài lâng khì kìⁿ He-lo̍t. In pài-thok ông-kiong ê chóng-koán Bu-la-su-toh khì kiû hô, in-ūi in ê niû-si̍t tio̍h tùi ông koán-hat ê tē-khu lâi kiòng-èng.
12:21 Tī iok-tēng ê ji̍t-chí, He-lo̍t chhēng ông-ho̍k chē tī ông-ūi, tùi jîn-bîn ián-káng.
12:22 Jîn-bîn hoah, " Che sī Siōng-tè ê siaⁿ, m̄-sī lâng ê siaⁿ. "
12:23 He-lo̍t bô kui êng-kng hō͘ Siōng-tè, Chú ê thiⁿ-sài sûi-sî kā i phah-tó, i chiū hō͘ thâng kā sí-.khì.
12:24 M̄ koh, Siōng-tè ê tō-lí jú thoân jú khoah, jú heng-ōng.
12:25 Ba-ná-ba kah Sàu-lô oân-sêng in ê jīm-bū liáu-āu, chiū tùi Ê-lú-sa-lèm tńg-.khì, chhōa kiò-chò Má-khó ê Iô-há-neh chò-hóe khì.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。