使徒行传 线上收听:中文和合本 现代中文译本修订版 现代台语 台语圣经 台语(长老会传播中心授权） 客语 现代客语 粤语和合本 希腊文(WH-NT) 下载档案 关于语音圣经
7:1 Su-tê-hoa-no͘h ê Tap-piān
Tōa-chè-si chiū kóng, " Chiahê tāichì kám sī ánne? "
7:2 Su-tê-hoa-no͘h kóng, " Kok-ūi hū-ló hiaⁿ-tī, chhiáⁿ thiaⁿ, lán ê chó͘-sian A-bu-la-hàm iáu-bōe sóa khì Khal-lân í-chêng, iáu tòa tī Mê-só͘-po-ta-miah ê sî, êng-kng ê Siōng-tè tùi i hián-hiān,
7:3 Kā i kóng, ' Lī-khui lí ê kò͘-hiong kah chhin-cho̍k, khì góa beh kā lí chí-sī ê só͘-chāi. ' (chù, CSK 12:1)
7:4 A-bu-la-hàm chiū lī-khui Kal-tí-ah lâng ê só͘-chāi, khì tòa tī Khal-lân. I ê lāu-pē sí liáu-āu, Siōng-tè hō͘ i tùi hia sóa kàu lín chitmá teh tòa ê só͘-chāi.
7:5 Tī chia, Siōng-tè pēng bô hō͘ i sán-gia̍p, liân khiā kha ê só͘-chāi to bô. Sûi-jiân hit sî i iáu-bōe ū kiáⁿ, Siōng-tè èng-ín beh sù hō͘ i chit-ê thó͘-tē, thang chò i kah kiáⁿ-sun ê sán-gia̍p.
7:6 Siōng-tè ū ánne kā i kóng, ' Lí ê kiáⁿ-sun ē chhut-gōa khì tī gōa-kok, chò lâng ê lô͘-lē siū pháiⁿ khoán-thāi sì-pah nî. ' (chù, CSK 15:13)
7:7 Siōng-tè koh kóng, ' Góa beh sím-phòaⁿ hit-ê hō͘ in chò lô͘-lē ê kok-ka. Āu-lâi, góa ē hō͘ in chhut-.lâi, tī chit-ê só͘-chāi kèng-pài góa. ' (chù, CSK 15:14)
7:8 Jiân-āu Siōng-tè kah i li̍p-iok, ēng kat-lé chò kì-hō. In-ūi ánne, i seⁿ Í-sak liáu-āu tē-peh ji̍t, chiū kā i kiâⁿ kat-lé. Āu-lâi, Í-sak seⁿ Iâ-kop, Iâ-kop seⁿ lán cha̍p-jī-ê cho̍k-tiúⁿ.
7:9 " Chiahê cho̍k-tiúⁿ oàn-tò͘ Iô-sé-huh, kā i bē khì Ai-gi̍p; m̄ koh, Siōng-tè kah i tông-chāi,
7:10 Kiù i thoat-lī it-chhè ê khó͘-lān, hō͘ i tī Ai-gi̍p ông Hôa-láu ê bīn-chêng tit tio̍h un-tián kah tì-hūi, hō͘ Hôa-láu kā i siat-li̍p chò Ai-gi̍p ê cháiⁿ-siòng kah ông-kiong ê chóng-koán.
7:11 Āu-lâi, Ai-gi̍p kah Ka-nân choân tē hoat-seng ki-hng, ín-khí tōa chai-lān; lán ê chó͘-sian bô bí-niûⁿ thang chia̍h.
7:12 Iâ-kop thiaⁿ-kóng Ai-gi̍p ū niû-si̍t, chiū chhe lán ê chó͘-sian khì hia. Che sī thâu chi̍t pái.
7:13 Tē-jī pái koh khì ê sî, Iô-sé-huh hō͘ hiaⁿ-tī jīn-chhut i ê sin-hūn; in-ūi ánne, Hôa-láu bat Iô-sé-huh ê ka-cho̍k.
7:14 Iô-sé-huh chhe lâng khì chhiáⁿ i ê lāu-pē Iâ-kop kah choân ka-cho̍k, chóng-kiōng chhit-cha̍p-gō͘ lâng khì Ai-gi̍p.
7:15 Iâ-kop chiū lo̍h-khì Ai-gi̍p, āu-lâi i kah lán ê chó͘-sian lóng sí tī hia.
7:16 In ê si-thé āu-lâi ūn tńg-lâi Sī-khiàm, bâi-chòng tī A-bu-la-hàm ēng chîⁿ tùi Ha-mo͘l ê kiáⁿ-sun bé-.lâi ê hit tè bōng-tē.
7:17 Siōng-tè tùi A-bu-la-hàm èng-ín ê hit-ê kî ná kīn, I-su-la-el lâng tī Ai-gi̍p seⁿ-thòaⁿ ná heng-ōng.
7:18 Āu-lâi, lēng-gōa chi̍t-ê m̄ bat Iô-sé-huh ê ông khí-lâi thóng-tī Ai-gi̍p. (chù, CAG 1:8)
7:19 I ēng kúi-kè lâi tùi-hù lán ê bîn-cho̍k, ge̍k-thāi lán ê chó͘-sian, bēng-lēng in tio̍h kā in ê eⁿ-á tàn tòa gōa-bīn, hō͘ in sí.
7:20 Hit sî, Mô͘-se tú chhut-sì, sī chi̍t-ê hui-siông chheng-siù ê eⁿ-á, tī lāu-pē ê chhù iúⁿ-chhī saⁿ kò-goe̍h.
7:21 I siū khì-sak ê sî, Hôa-láu ê chabó͘ kiáⁿ kā i khioh-khì tòng-chò kakī ê kiáⁿ iúⁿ-chhī.
7:22 Mô͘-se ha̍k-si̍p Ai-gi̍p lâng só͘-ū ê ha̍k-būn, kóng-ōe kah chò tāichì lóng ū châi-lêng.
7:23 " Mô͘-se sì-cha̍p hòe ê sî, siūⁿ beh khì khòaⁿ kakī ê hiaⁿ-tī — I-su-la-el ê tông-pau.
7:24 I khòaⁿ tio̍h chi̍t-ê hiaⁿ-tī hō͘ Ai-gi̍p lâng khi-hū, chiū kā i pó-hō͘, phah-sí hit-ê Ai-gi̍p lâng, thè siū úi-khut ê lâng pò-siû.
7:25 I siūⁿ kóng kakī ê hiaⁿ-tī ē liáu-kái che sī Siōng-tè ēng i ê chhiú lâi kiù in; m̄ koh, in bô liáu-kái.
7:26 Keh tńg kang, i khòaⁿ tio̍h nn̄g-ê I-su-la-el lâng teh sio-phah, siūⁿ beh kā in tiâu-kái, kóng, " Lín sī hiaⁿ-tī, ná ē teh hō͘-siong siong-hāi? "
7:27 Hitê teh khi-hū ê lâng kā Mô͘-se sak-khui, kóng, " Siáⁿ lâng siat-li̍p lí chò goán ê thâu-lâng, chò goán ê phòaⁿ-koaⁿ?
7:28 Lí ài beh chhin-chhiūⁿ cha-hng thâi-sí hit-ê Ai-gi̍p lâng ánne, lâi kā góa thâi-sí, sī-.bô? " (chù, CAG 2:14)
7:29 Mô͘-se chi̍t-ē thiaⁿ tio̍h chit kù ōe chiū tô-cháu, khì tòa Mí-tiân lâng ê só͘-chāi, tī hia seⁿ nn̄g-ê kiáⁿ.
7:30 " Sì-cha̍p-nî āu, tī Si-nái soaⁿ ê khòng-iá, ū thiⁿ-sài tī chhì-phè ê hóe-iām tiong, tùi Mô͘-se hián-hiān.
7:31 Mô͘-se khòaⁿ tio̍h chit-ê kéng-siōng, kám-kak chin hi-kî, kiâⁿ óa khì siūⁿ beh khòaⁿ khah siông-sè ê sî, chiū thiaⁿ tio̍h Chú ê siaⁿ kóng,
7:32 Góa sī lín chó͘-sian ê Siōng-tè, to̍h-sī A-bu-la-hàm, Í-sak, Iâ-kop ê Siōng-tè. ' (chù, CAG 3:6) Mô͘-se kiaⁿ kah phi̍h-phi̍h chhoah, m̄-káⁿ khòaⁿ.
7:33 Chú kā i kóng, ' Lí ê ê tio̍h thǹg khí-.lâi, in-ūi lí khiā ê só͘-chāi sī sèng-tē.
7:34 Góa khak-si̍t ū khòaⁿ tio̍h Góa ê chú-bîn tī Ai-gi̍p teh siū khó͘, mā ū thiaⁿ tio̍h in teh kiò-khó͘ ê siaⁿ. Góa kàng-lîm lâi beh kā in chín-kiù. Taⁿ lí lâi, góa beh chhe lí khì Ai-gi̍p. ' (chù, CAG 3:5,7)
7:35 " Chit-ê Mô͘-se to̍h-sī I-su-la-el lâng bat kā i kī-choa̍t, mn̄g i kóng, ' Siáⁿ lâng siat-li̍p lí chò goán ê thâu-lâng, chò goán ê phòaⁿ-koaⁿ? 'ê hit-ūi, Siōng-tè khiok thong-kòe tī chhì-phè tiong tùi i hián-hiān ê thiⁿ-sài, chhe-phài i chò léng-siù, chò chín-kiù-chiá.
7:36 Mô͘-se chhōa in chhut Ai-gi̍p, tòa tī Ai-gi̍p, Âng-hái kah khòng-iá sì-cha̍p nî, kiâⁿ chin chē kî-sū sîn-jiah.
7:37 Chit-ê Mô͘-se bat tùi I-su-la-el ê kiáⁿ-sun kóng, ' Siōng-tè beh tùi lín hiaⁿ-tī tiong-kan, ūi lín heng-khí chi̍t-ê chhin-chhiūⁿ góa chit khoán ê sian-ti. ' (chù, SBK 18:15)
7:38 Mô͘-se mā bat kah tī Si-nái soaⁿ tùi i kóng-ōe ê thiⁿ-sài í-ki̍p lán ê chó͘-sian, tī khòng-iá chò-hóe kìⁿ-bīn, i mā ū tit tio̍h oa̍h-oa̍h ê sìn-sit lâi thoân hō͘ lán.
7:39 Lán ê chó͘-sian m̄-khéng thiaⁿ i ê ōe, tian-tò kā i kī-choa̍t, siūⁿ beh tò tńg-khì Ai-gi̍p.
7:40 In kā A-lông kóng, ' Lí tio̍h kā goán chō sîn-bêng lâi chò thâu chhōa goán, in-ūi chit-ê chhōa goán chhut Ai-gi̍p ê Mô͘-se m̄-chai tú tio̍h siáⁿ-mi̍h tāichì. ' (chù, CAG 32:1)
7:41 Hit sî, in chiū chō gû-á kiáⁿ ê siōng, tùi hit-ê ngó͘-siōng hiàn chè, hoaⁿ-hí in kakī ê chhiú só͘ chò ê ngó͘-siōng.
7:42 Siōng-tè oa̍t thâu bô ài chhap, chhut-chāi in khì kèng-pài thian-siōng. Tú chhin-chhiūⁿ sian-ti ê chheh só͘ kì-chài, I-su-la-el ê chú-bîn, lín tī khòng-iá sì-cha̍p nî, kám bat hiàn seng-lé á-.sī chè-mi̍h hō͘ góa?
7:43 Lín kng Mô͘-lo̍k ê pò͘-pêⁿ, kah Lāi-hán sîn ê chheⁿ, to̍h-sī lín chō lâi pài ê ngó͘-siōng; góa beh kā lín chhian-sóa khì Ba-bú-lông hit pêng! (chù, AMS 5:25-27)
7:44 " Lán chó͘-sian tī khòng-iá ū thang chò kiàn-chèng ê hōe-bō͘, to̍h-sī Siōng-tè tùi Mô͘-se ê chí-sī, chiàu i só͘ khòaⁿ-.tio̍h ê khoán-sit lâi khí-chō ê.
7:45 Āu-lâi, lán ê chó͘-sian kì-jiân sêng-chiap chit-ê hōe-bō͘, Siōng-tè chiū tùi in ê bīn-chêng kā gōa-cho̍k kóaⁿ-cháu. In chiàm-niá hit-ê thó͘-tē liáu-āu, chiū kah Io-siú-ah kā hōe-bō͘ sóa khì hia, it-ti̍t kàu Ta-bi̍t ê sî-tāi.
7:46 Ta-bi̍t ū tit tio̍h Siōng-tè ê un-tián, kiû Siōng-tè ín-chún in kā Iâ-kop ê Siōng-tè chhōe chi̍t-ê tòa ê só͘-chāi.
7:47 M̄ koh, āu-lâi ūi Siōng-tè khí sèng-tiān ê sī Só͘-lô-móng.
7:48 " Kî-si̍t chì-koân Siōng-tè pēng bô tòa tī lâng ê chhiú só͘ khí ê chhù, chhin-chhiūⁿ sian-ti só͘ kóng,
7:49 ' Chú kóng, thiⁿ sī góa ê pó-chō, tē sī góa ê kha-ta̍h. Lín beh kā góa khí siáⁿ-mi̍h khoán ê chhù? góa an-hioh ê só͘-chāi tī tó-ūi?
7:50 Che it-chhè kám m̄-sī góa chhin-chhiú chhòng-chō ê? " (chù, ISI 66:1-2)
7:51 " Lín ná ē chiahni̍h kò͘-chi̍p! Lín ê sim ngē, hīⁿ-khang m̄-thiaⁿ ōe kah lín ê chó͘-sian kāng-khoán, tiāⁿtiāⁿ pōe-ge̍k Sèng Sîn!
7:52 Tó chi̍t-ê sian-ti bô siū tio̍h lín chó͘-sian ê pek-hāi? Ī-giân hit-ê kong-gī ê lô͘-po̍k teh beh lâi-lîm ê lâng, lóng hō͘ lín hāi-sí. Taⁿ lín chiâⁿ-chò chhut-bē koh thâi-sí chit-ê lô͘-po̍k ê lâng.
7:53 Lín sī tùi thiⁿ-sài niá-siū Siōng-tè ê lu̍t-hoat, kèng-jiân bô teh chun-siú! "
7:54 Su-tê-hoa-no͘h Hông Tìm Sí
In thiaⁿ tio̍h Su-tê-hoa-no͘h chiahê ōe, sim-lāi hui-siông siū-khì, tùi i kā-gê chhiat-khí.
7:55 To̍k-to̍k Su-tê-hoa-no͘h hō͘ Sèng Sîn chhiong-móa, gia̍h thâu khòaⁿ thiⁿ, khòaⁿ tio̍h Siōng-tè ê êng-kng, mā khòaⁿ tio̍h I-é-su khiā tī Siōng-tè ê chiàⁿ pêng.
7:56 I kóng, " Lí khòaⁿ! Góa khòaⁿ tio̍h thiⁿ khui, Jîn-chú khiā tī Siōng-tè ê chiàⁿ pêng! "
7:57 Chèng lâng hīⁿ-khang am-teh, tōa-siaⁿ hoah, chò chi̍t-ê chhi̍h óa-.khì,
7:58 Kā Su-tê-hoa-no͘h kóaⁿ chhut-.khì siâⁿ gōa, ēng chio̍h-thâu kā i tìm. Chò kiàn-chèng ê lâng kā in ê gōa-saⁿ kau hō͘ chi̍t-ê miâ kiò-chò Sàu-lô ê siàu-liân lâng khì kò͘.
7:59 In ēng chio̍h-thâu tìm Su-tê-hoa-no͘h ê sî, Su-tê-hoa-no͘h kî-kiû kóng, " Chú I-é-su ah, kiû Lí chiap-la̍p góa ê lêng-hûn! "
7:60 I kūi lo̍h-.khì, tōa-siaⁿ kiò, kóng, " Chú ah, m̄ thang ēng chit-ê chōe kui hō͘ in! " I kóng soah chiū sí-.khì.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。