使徒行传 线上收听:中文和合本 现代中文译本修订版 现代台语 台语圣经 台语(长老会传播中心授权） 客语 现代客语 粤语和合本 希腊文(WH-NT) 下载档案 关于语音圣经
3:1 Tī Sèng-tiān ê Mn̂g I-hó Páiⁿ-kha ê Lâng
Ū chi̍t ji̍t ē-po͘ saⁿ tiám, to̍h-sī kî-tó ê sî, Piat-tò͘ kah Iô-há-neh chiūⁿ sèng-tiān.
3:2 Ū chi̍t-ê lâng, tùi chhut-sì chiū nńg-kha, ta̍k ji̍t hō͘ lâng kng lâi hē tī sèng-tiān ê mn̂g, to̍h-sī hit-ê kiò-chò "Súi mn̂g "ê, tī hia beh hiòng ji̍p tiān ê lâng kiû-khit.
3:3 I chi̍t-ē khòaⁿ tio̍h Piat-tò͘ kah Iô-há-neh teh beh ji̍p sèng-tiān, chiū hiòng in kiû-khit.
3:4 Piat-tò͘ kah Iô-há-neh kā i chù-ba̍k khòaⁿ, kóng, " Khòaⁿ goán! "
3:5 I chiū ba̍k-chiu kim-kim kā in khòaⁿ, ǹg-bāng tùi in ē-tàng tit tio̍h siáⁿ-mi̍h.
3:6 M̄ koh, Piat-tò͘ kóng, " Kim kah gîn góa lóng bô, to̍k-to̍k ē-tàng kā góa só͘ ū ê hō͘ lí. Hōng Na-cha-lia̍t lâng I-é-su Ki-tok ê miâ, bēng-lēng lí khí-lâi kiâⁿ. "
3:7 Piat-tò͘ chiū khan i ê chiàⁿ chhiú, hō͘ i khí-.lâi; i ê kha kah kha-ba̍k sûi-sî ióng-kiāⁿ khí-.lâi.
3:8 I chiū thiàu khí-lâi khiā-.leh, koh khai-sí kiâⁿ, jiân-āu kah in chò-hóe ji̍p-khì sèng-tiān, ná kiâⁿ ná thiàu, ná oló Siōng-tè.
3:9 Chèng lâng khòaⁿ tio̍h i iân-lō͘ kiâⁿ, iân-lō͘ oló Siōng-tè,
3:10 Koh jīn-chhut i to̍h-sī pêng-sî chē tī sèng-tiān ê Súi mn̂g teh kiû-khit hit-ê lâng, chiū tùi i sin chiūⁿ só͘ tú-.tio̍h ê tāichì tio̍h-kiaⁿ kah gāng-.khì.
3:11 Piat-tò͘ tī Só͘-lô-móng ê Mn̂g-lông Káng-tō
Tī Só͘-lô-móng ê mn̂g-lông, hit-ê tit tio̍h i hó ê lâng kā Piat-tò͘ kah Iô-há-neh ê chhiú khiú tiâu-tiâu, chèng lâng kám-kak tōa kî-koài, lóng cháu-óa-lâi khòaⁿ.
3:12 Piat-tò͘ khòaⁿ-kìⁿ ánne, chiū tùi hiahê lâng kóng, " I-su-la-el lâng, lín sī án-chóaⁿ tùi chit-ê tāichì kám-kak kî-koài? Ná ē ba̍k-chiu kim-kim lia̍h goán khòaⁿ? Lín siūⁿ kóng goán sī khò kakī ê châi-lêng á-.sī kèng-khiân, hō͘ chit-ê lâng khí-lâi kiâⁿ, sī-.bô?
3:13 A-bu-la-hàm, Í-sak, Iâ-kop ê Siōng-tè, to̍h-sī lán chó͘-sian ê Siōng-tè, í-keng hō͘ I ê lô͘-po̍k I-é-su tit tio̍h êng-iāu. Lín kā chit-ê I-é-su kau hō͘ koaⁿ-hú, sûi-jiân Pí-la̍h-to koat-tēng beh pàng I, lín koh tong-tiûⁿ kī-choa̍t.
3:14 Lín kī-choa̍t hit-ê sîn-sèng koh kong-gī ê I-é-su, tian-tò kiû Pí-la̍h-to pàng chi̍t-ê sat-jîn-hoān hō͘ lín.
3:15 Lín hāi-sí oa̍h-miā ê kin-goân, to̍h-sī Siōng-tè tùi sí-lâng tiong hō͘ I koh-oa̍h hit ūi. Goán sī chit-hāng tāichì ê kiàn-chèng-jîn.
3:16 Lín só͘ khòaⁿ-kìⁿ, lín só͘ bat ê chit-ê pái-kha-.ê, i tùi sìn-khò I-é-su ê miâ lâi tit tio̍h khùi-la̍t. I in-ūi sìn-khò I-é-su ê miâ chiū oân-choân hó khí-.lâi, lín tāi-ke lóng ū khòaⁿ tio̍h chit-hāng tāichì.
3:17 Hiaⁿ-tī, taⁿ góa chai lín kah koaⁿ-hú ánne chò, sī in-ūi lín m̄-chai pòaⁿ-hāng.
3:18 Siōng-tè ū thong-kòe chèng sian-ti ê chhùi ī-giân I ê Ki-tok tio̍h siū-lān, chit-ê tāichì kó-jiân èng-giām ā.
3:19 Só͘-í, lín tio̍h hóe-kái lâi kui-ǹg Siōng-tè, thang hō͘ lín ê chōe tit tio̍h chhat-siau.
3:20 Án-ne Siōng-tè ē siúⁿ-sù hō͘ lín sin ê ji̍t-chí, koh chhe-khián chá to̍h soán-tēng ê Ki-tok I-é-su lâi-kàu lín tiong-kan.
3:21 Chiàu Siōng-tè thong-kòe kó͘-chá sèng sian-ti ê chhùi só͘ soan-pò͘ ê, I it-tēng tio̍h tiàm tī thiⁿ-téng, it-ti̍t kàu bān-mi̍h ōaⁿ sin ê sî-kî.
3:22 Mô͘-se bat kóng, ' Chú — lín ê Siōng-tè ē tī lín tông-pau ê tiong-kan, kā lín siat-li̍p chi̍t-ê chhin-chhiūⁿ góa chit khoán ê sian-ti; I kā lín kóng ê ōe, lín lóng tio̍h thiaⁿ.
3:23 M̄-thiaⁿ chit ūi sian-ti ê lâng, lóng ē tùi chú-bîn ê tiong-kan kā in siau-bia̍t. ' (chù, SBK 18:15,19)
3:24 Tùi Sa-mu-el í-āu, só͘-ū thoân-káng sìn-sit ê sian-ti lóng ū kóng-khí chiahê ji̍t-chí.
3:25 Lín sī sian-ti ê kiáⁿ-sun, mā ū sêng-chiap Siōng-tè kah lín chó͘-sian só͘ li̍p ê iok. Siōng-tè bat kā A-bu-la-hàm kóng, ' Thian-hā bān-cho̍k lóng ē tùi lí ê kiáⁿ-sun tit tio̍h hok-khì. ' (chù, CSK 22:18;26:4)
3:26 Siōng-tè í-keng siat-li̍p I ê lô͘-po̍k, seng chhe I lâi kā lín sù-hok, hō͘ lín ta̍k lâng oa̍t tńg-sin, lī-khui siâ-ok. "
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。