约翰福音 四福音合参 线上收听:中文和合本 现代中文译本修订版 现代台语 台语圣经 台语(长老会传播中心授权） 客语 现代客语 福州话 粤语和合本 希腊文(WH-NT) 下载档案 关于语音圣经
14:1 I-é-su Sī Tō-lō͘, Chin-lí, Oa̍h-miā
I-é-su koh kóng, " Lín ê sim m̄ thang chhau-hoân put-an, lín tio̍h sìn Siōng-tè, mā tio̍h sìn góa.
14:2 Góa ê Thiⁿ-pē ê chhù ū chin chē pâng-keng. Góa khì hia sī beh kā lín chún-pī só͘-chāi. Nā bô, góa bē kā lín kóng chiahê tāichì.
14:3 Góa khì kā lín chún-pī só͘-chāi liáu-āu, ē koh tńg-lâi chhōa lín khì góa hia. Góa tī tó-ūi, lín mā ē tī hia.
14:4 Góa beh khì tó-ūi, lín chai hit tiâu lō͘. "
14:5 Tho-má-suh kā I-é-su kóng, " Chú ah, goán to m̄-chai Lí beh khì ê só͘-chāi, ná ē chai hit tiâu lō͘? "
14:6 I-é-su kā i kóng, " Góa sī tō-lō͘, chin-lí, oa̍h-miā. Nā m̄-sī thong-kòe góa, bô lâng ē-tàng khì-kàu Thiⁿ-pē hia.
14:7 Lín nā bat góa, mā ē bat Thiⁿ-pē. Tùi taⁿ í-āu, lín ē bat I, in-ūi lín í-keng ū khòaⁿ tio̍h I. "
14:8 Hui-li̍p-pò͘ kā I-é-su kóng, " Chú ah, kā Thiⁿ-pē hián-sī hō͘ goán khòaⁿ, goán chiū ē boán-chiok. "
14:9 I-é-su kóng, " Hui-li̍p-pò͘, góa kah lín chò-hóe hiahni̍h kú, lí iáu m̄ bat góa, sī-.bô? Khòaⁿ tio̍h góa to̍h-sī khòaⁿ tio̍h Thiⁿ-pē, lí ná ē kóng, ' Kā Thiⁿ-pē hián-sī hō͘ goán khòaⁿ '?
14:10 Góa tī Thiⁿ-pē ê lāi-bīn, Thiⁿ-pē mā tī góa ê lāi-bīn, lí m̄-sìn, sī-.bô? Góa kā lín kóng ê ōe, m̄-sī chhut tī góa kakī, sī Thiⁿ-pē tiàm tī góa lāi-bīn teh chò I kakī ê kang.
14:11 Lín tio̍h sìn góa tī Thiⁿ-pē lāi-bīn, Thiⁿ-pē tī góa lāi-bīn. Nā bô, mā tio̍h in-ūi góa só͘ chò ê tāichì lâi sìn.
14:12 Góa si̍t-chāi kā lín kóng, sìn góa ê lâng ē chò góa só͘ chò ê tāichì, sīm-chí ē chò koh khah tōa ê tāichì, in-ūi góa beh tńg-khì Thiⁿ-pē hia.
14:13 Lín hōng góa ê miâ bô-lūn kiû siáⁿ-mi̍h, góa lóng ē siúⁿ-sù hō͘ lín, thang hō͘ Thiⁿ-pē tùi Kiáⁿ tit tio̍h êng-kng.
14:14 Lín hōng góa ê miâ bô-lūn kiû siáⁿ-mi̍h, góa lóng ē siúⁿ-sù hō͘ lín. "
14:15 Èng-ín Sù Sèng Sîn
" Lín nā thiàⁿ góa, tio̍h siú góa ê kài-bēng.
14:16 Góa mā ē tùi Thiⁿ-pē kiû, I ē siúⁿ-sù chi̍t ūi Pó-hūi-su hō͘ lín, thang kah lín éng-oán tông-chāi.
14:17 Chit-ê Pó-hūi-su to̍h-sī chin-lí ê Sèng Sîn. Sè-kan bē tàng chiap-la̍p I, in-ūi in bô khòaⁿ tio̍h I, mā m̄ bat I. To̍k-to̍k lín bat I, in-ūi I kah lín tông-chāi, koh ē kè-sio̍k tiàm tī lín lāi-bīn.
14:18 " Góa bē pàng lín chò ko͘-toaⁿ ê lâng, góa ē koh tńg-lâi lín chia.
14:19 Koh bô gōa kú, sè-kan bē koh khòaⁿ tio̍h góa, to̍k-to̍k lín ē khòaⁿ tio̍h góa, in-ūi góa oa̍h-.leh, lín mā ē oa̍h-.leh.
14:20 Kàu hit ji̍t, lín ē chai góa tī góa ê Thiⁿ-pē lāi-bīn, lín tī góa ê lāi-bīn, góa mā tī lín ê lāi-bīn.
14:21 " Chiap-siū góa ê kài-bēng koh chun-siú ê lâng, to̍h-sī thiàⁿ góa; thiàⁿ góa ê lâng ē tit tio̍h góa ê Thiⁿ-pē ê thiàⁿ, góa mā ē thiàⁿ i, koh kā góa pún-sin hián-hiān hō͘ i khòaⁿ. "
14:22 Iô-tah, m̄-sī hit-ê Ka-lio̍k lâng, mn̄g I-é-su kóng, " Chú ah, ūi siáⁿ-mi̍h Lí beh kā pún-sin tùi goán hián-hiān, bô beh tùi sè-kan hián-hiān? "
14:23 I-é-su ìn kóng, " Thiàⁿ góa ê lâng ē chun-siú góa ê tō-lí, góa ê Thiⁿ-pē ē thiàⁿ i, Thiⁿ-pē kah góa ē lâi i hia kah i chò-hóe tòa.
14:24 Bô thiàⁿ góa ê lâng bē chun-siú góa ê tō-lí. Lín só͘ thiaⁿ ê tō-lí m̄-sī góa kakī ê ōe, sī chhe-phài góa lâi ê Thiⁿ-pē ê ōe.
14:25 " Góa iáu kah lín chò-hóe ê sî, ū kā chiahê ōe kā lín kóng.
14:26 M̄ koh, Pó-hūi-su, to̍h-sī Thiⁿ-pē ēng góa ê miâ beh chhe-phài lâi ê Sèng Sîn, ē kā it-chhè ê tāichì kà-sī lín, koh hō͘ lín ē kì-tit góa kā lín kóng ê it-chhè ê ōe.
14:27 " Góa kā pêng-an lâu hō͘ lín, góa kā góa ê pêng-an sù hō͘ lín. Góa hō͘ lín ê kah sè-kan teh hō͘ lâng ê bô kāng-khoán. Lín ê sim m̄ thang chhau-hoân put-an, mā m̄-bián kiaⁿ-hiâⁿ.
14:28 Lín í-keng thiaⁿ tio̍h góa ū kā lín kóng, ' Góa-.khì, ē koh tńg-lâi lín chia. 'Lín nā thiàⁿ góa, chiū ē in-ūi góa beh khì Thiⁿ-pē hia lâi hoaⁿ-hí, in-ūi Thiⁿ-pē pí góa khah tōa.
14:29 Taⁿ tāichì iáu-bōe hoat-seng, góa seng kā lín kóng, hō͘ lín tī tāichì hoat-seng ê sî thang sìn.
14:30 Góa bē koh kah lín kóng chin chē ōe, in-ūi sè-kan ê thóng-tī-chiá teh beh lâi à. I bē tàng tùi góa chò siáⁿ-mi̍h,
14:31 To̍k-to̍k beh hō͘ sè-kan chai-iáⁿ góa ū thiàⁿ Thiⁿ-pē, mā ū chiàu Thiⁿ-pē ê bēng-lēng khì chò. " Khí-.lâi, lán lâi-.khì! "
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。