约翰福音 四福音合参 线上收听:中文和合本 现代中文译本修订版 现代台语 台语圣经 台语(长老会传播中心授权） 客语 现代客语 福州话 粤语和合本 希腊文(WH-NT) 下载档案 关于语音圣经
10:1 Iûⁿ-tiâu ê Phì-jū
" Góa si̍t-chāi kā lín kóng, beh ji̍p-khì iûⁿ-tiâu nā bô tùi hit-ê mn̂g, tùi pa̍t só͘-chāi pôaⁿ kòe-.khì ê sī chha̍t, sī kiông-tō.
10:2 Tùi mn̂g ji̍p-khì ê chiah sī iûⁿ ê bo̍k-chiá.
10:3 Kò͘-mn̂g ê kā bo̍k-chiá khui mn̂g, iûⁿ ē jīn-tit bo̍k-chiá ê siaⁿ. Bo̍k-chiá chiū kā kakī ê iûⁿ chi̍t chiah chi̍t chiah kiò-miâ, kā in chhōa chhut-.lâi.
10:4 Bo̍k-chiá kā kakī ê iûⁿ lóng pàng chhut-khì liáu-āu, kiâⁿ tī iûⁿ-kûn ê thâu-chêng, iûⁿ chiū tòe bo̍k-chiá kiâⁿ, in-ūi in ē jīn-tit i ê siaⁿ.
10:5 Iûⁿ it-tēng bē tòe chheⁿ-hūn lâng khì, tian-tò ē siám-phiah, in-ūi in bē jīn-tit chheⁿ-hūn lâng ê siaⁿ. "
10:6 I-é-su kā in kóng chit-ê phì-jū, in m̄-chai I teh kóng siáⁿ-mi̍h.
10:7 I-é-su sī hó Bo̍k-chiá
Só͘-í, I-é-su koh kā in kóng, " Góa si̍t-chāi kā lín kóng, góa sī iûⁿ-tiâu ê mn̂g.
10:8 Só͘-ū pí góa khah tāi-seng lâi ê sī chha̍t, sī kiông-tō; m̄ koh, iûⁿ bô thiaⁿ in.
10:9 Góa sī mn̂g, tùi góa chit-ê mn̂g ji̍p-.lâi ê ē tit tio̍h kiù, ē-tàng chhut-chhut ji̍p-ji̍p, mā ē chhōe tio̍h bo̍k-chháu.
10:10 Chha̍t lâi, it-tēng sī beh thau-the̍h, beh thâi, beh húi-bia̍t; góa lâi sī beh hō͘ in tit tio̍h hong-sēng ê oa̍h-miā.
10:11 " Góa sī hó ê bo̍k-chiá. Hó bo̍k-chiá ūi tio̍h iûⁿ lâi pàng-sak sèⁿ-miā.
10:12 Hō͘ lâng chhiàⁿ chò-kang ê lâng m̄-sī bo̍k-chiá, iûⁿ mā m̄-sī kakī ê iûⁿ; i khòaⁿ tio̍h chhâi-lông lâi, chiū kā iûⁿ pàng-sak, kakī khì tô-cháu; chhâi-lông kā hiahê iûⁿ, koh kā in kóaⁿ-sòaⁿ.
10:13 I ē ánne tô-cháu, in-ūi i sī hō͘ lâng chhiàⁿ ê kang-lâng, tùi iûⁿ lóng bô koan-sim.
10:14 Góa sī hó ê bo̍k-chiá, góa bat kakī ê iûⁿ, hiahê iûⁿ mā bat góa;
10:15 Chhin-chhiūⁿ Thiⁿ-pē bat góa, góa mā bat Thiⁿ-pē. Góa koh ūi tio̍h iûⁿ pàng-sak sèⁿ-miā.
10:16 Góa iáu ū kî-tha bô sio̍k chit-ê iûⁿ-tiâu ê iûⁿ, góa it-tēng tio̍h khì kā in chhōa-.lâi. In mā ē thiaⁿ góa ê siaⁿ lâi chiâⁿ-chò chi̍t kûn, kui-sio̍k chi̍t-ê bo̍k-chiá.
10:17 " Só͘-í, Thiⁿ-pē thiàⁿ góa, in-ūi góa pàng-sak kakī ê sèⁿ-miā, thang koh tit tio̍h sèng-miā.
10:18 Bô lâng chhiúⁿ góa ê sèⁿ-miā, sī góa kakī chū-goān pàng-sak. Góa ū koân thang pàng-sak, mā ū koân thang koh tit tio̍h. Che sī góa tùi Thiⁿ-pē niá-siū ê bēng-lēng. "
10:19 In-ūi I-é-su kóng chiahê ōe, Iô-tá-iah lâng koh khí hun-lia̍t.
10:20 Kî-tiong chin chē lâng kóng, " I hō͘ siâ-sîn hū-sin teh khí-kông, ná tio̍h thiaⁿ I ê ōe? "
10:21 Koh ū lâng kóng, " Che m̄-sī hō͘ siâ-sîn hū-sin ê lâng só͘ kóng ê ōe, kám kóng kúi ē khui chheⁿmê lâng ê ba̍k-chiu? "
10:22 I-é-su hō͘ Iô-tá-iah Lâng Khì-sak
Tī kôaⁿ-thiⁿ sî, Ê-lú-sa-lèm ū teh khèng-chiok hiàn-tiān ê cheh.
10:23 I-é-su tī sèng-tiān Só͘-lô-móng ê mn̂g-lông teh kiâⁿ.
10:24 Iô-tá-iah lâng ûi óa-lâi kā I kóng, " Lí beh hō͘ goán ê sim giâu-gî kàu tang-sî? Lí nā-sī Ki-tok, tio̍h chiàu-si̍t kā goán kóng. "
10:25 I-é-su ìn kóng, " Góa bat kā lín kóng, m̄ koh, lín m̄-sìn. Góa hōng góa ê Thiⁿ-pē ê miâ só͘ chò ê tāichì, lóng sī teh ūi góa chò kiàn-chèng.
10:26 M̄ koh, lín m̄-sìn, in-ūi lín m̄-sī góa ê iûⁿ.
10:27 Góa ê iûⁿ thiaⁿ góa ê siaⁿ, góa bat in, in mā tòe góa.
10:28 Góa koh siúⁿ-sù hō͘ in ū éng-oán ê oa̍h-miā, hō͘ in éng-oán bē tîm-lûn, bô lâng ē tùi góa ê chhiú kā in chhiúⁿ-.khì.
10:29 Kā hiahê iûⁿ siúⁿ-sù hō͘ góa ê Thiⁿ-pē, pí it-chhè lóng khah úi-tāi, bô lâng ē-tàng kā in tùi Thiⁿ-pē ê chhiú chhiúⁿ-.khì.
10:30 Góa kah Thiⁿ-pē chiâⁿ-chò chi̍t thé. "
10:31 Iô-tá-iah lâng koh the̍h chio̍h-thâu beh tìm I-é-su.
10:32 I-é-su ìn kóng, " Thiⁿ-pē ài góa chò ê chin chē hó sū, góa lóng ū chò hō͘ lín khòaⁿ. Lín sī ūi tio̍h tó chi̍t hāng tāichì, beh ēng chio̍h-thâu kā góa tìm? "
10:33 Hiahê Iô-tá-iah lâng ìn kóng, " Goán ēng chio̍h-thâu kā Lí tìm, m̄-sī ūi tio̍h Lí chò hó sū, sī in-ūi Lí siat-to̍k Siōng-tè. Lí put-kò sī chi̍t-ê lâng, iáu koh kakī chū-chheng chò Siōng-tè. "
10:34 I-é-su ìn kóng, " Lín ê lu̍t-hoat kám bô kì-chài, Siōng-tè kóng, ' Góa kóng lín sī sîn-bêng '? (chù, SPh 82:6)
10:35 Keng-tián ê ōe éng-oán bē kái-piàn. Kì-jiân Siōng-tè chheng-ho͘ hiahê chiap-siū Siōng-tè ê ōe ê lâng chò sîn-bêng,
10:36 Taⁿ Thiⁿ-pē kā góa hun-pia̍t chò sèng, koh chhe-phài góa ji̍p sè-kan, sī án-chóaⁿ góa kóng, góa sī Siōng-tè ê Kiáⁿ, lín chiū kóng góa teh siat-to̍k Siōng-tè?
10:37 Góa nā m̄-sī teh chò Thiⁿ-pē ê tāichì, lín m̄-bián sìn góa.
10:38 Góa nā teh chò Siōng-tè ê kang, lín sûi-jiân m̄-sìn góa, mā tio̍h sìn góa só͘ chò ê tāichì; ánne thang hō͘ lín chai, Thiⁿ-pē tī góa ê lāi-bīn, góa mā tī Thiⁿ-pē ê lāi-bīn. "
10:39 In koh-chài siūⁿ beh lia̍h I-é-su, m̄ koh I thoat-lī in ê chhiú lī-khui hia.
10:40 I-é-su koh khì Iol-tàn hô ê tùi-hōaⁿ, kàu Iô-há-neh chá-chêng kā lâng sé-lé ê só͘-chāi, chiū tòa tī hia.
10:41 Ū chin chē lâng koh lâi kìⁿ I-é-su, kóng, " Iô-há-neh lóng bô kiâⁿ sîn-jiah, to̍k-to̍k i só͘ kóng koan-hē chit-ê lâng ê tāichì lóng sī chin-si̍t. "
10:42 Tī hia ū chin chē lâng sìn I-é-su.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。