约翰福音 四福音合参 线上收听:中文和合本 现代中文译本修订版 现代台语 台语圣经 台语(长老会传播中心授权） 客语 现代客语 福州话 粤语和合本 希腊文(WH-NT) 下载档案 关于语音圣经
1:1 Tō Chiâⁿ Jio̍k-thé
Siōng-tè chhòng-chō í-chêng to̍h ū tō, tō kah Siōng-tè tông-chāi, tō to̍h-sī Siōng-tè.
1:2 Tùi goân-khí-thâu, chit-ê tō chiū kah Siōng-tè tông-chāi.
1:3 Siōng-tè thong-kòe tō lâi chhòng-chō bān-mi̍h, it-chhè siū chhòng-chō ê lóng sī thong-kòe tō lâi chhòng-chō.
1:4 Tō pún-sin ū oa̍h-miā, chit-ê oa̍h-miā sī jîn-lūi ê kng.
1:5 Chit-ê kng chiò tī o͘-àm tiong, m̄ koh, o͘-àm m̄ chiap-la̍p kng.
1:6 Siōng-tè chhe-phài chi̍t-ê lâng lâi, i ê miâ kiò-chò Iô-há-neh.
1:7 Chit-ê lâng lâi beh ūi kng chò kiàn-chèng, thang hō͘ choân jîn-lūi thiaⁿ i ê ōe lâi sìn.
1:8 I pún-sin m̄-sī hit-ê kng, kan-taⁿ sī beh ūi hit-ê kng chò kiàn-chèng.
1:9 Hit-ê sī chin ê kng, beh lâi chit-ê sè-kan kā choân jîn-lūi chiò kng.
1:10 Tō í-keng tī sè-kan, sè-kan thong-kòe tō lâi chhòng-chō, m̄ koh, sè-kan m̄ bat chit-ê tō.
1:11 Tō lâi-kàu kakī ê pún só͘-chāi, kakī ê lâng mā bô chiap-la̍p I.
1:12 Hiah-ê chiap-la̍p I ê, to̍h-sī sìn I ê lâng, I chiū siúⁿ-sù hō͘ in ū koân chiâⁿ-chò Siōng-tè ê kiáⁿ-jî.
1:13 In m̄-sī tùi hiat-thóng, m̄-sī tùi jio̍k-thé, mā m̄-sī tùi lâng ê ì-sù lâi chhut-sì ê, in sī Siōng-tè seⁿ ê.
1:14 Tō chiâⁿ jio̍k-thé, tiàm tī lán tiong-kan, chhiong-móa un-tián kah chin-lí. Lán ū khòaⁿ tio̍h I ê êng-iāu, he sī Thiⁿ-pē ê to̍k-seⁿ Kiáⁿ chiah ū ê êng-iāu.
1:15 Iô-há-neh ūi tio̍h I chò kiàn-chèng, tōa-siaⁿ hoah, " Chit-ê to̍h-sī góa só͘ kóng ê, I tòe góa āu-bīn lâi, khiok pí góa khah úi-tāi, in-ūi góa iáu-bōe chhut-sì, I to̍h chûn-chāi. "
1:16 I í-keng ēng hong-sēng ê un-tián chiok-hok lán tāi-ke, hō͘ lán un-siōng ka-un.
1:17 Lu̍t-hoat sī Siōng-tè thong-kòe Mô͘-se lâi pan-pò͘; un-tián kah chin-lí sī thong-kòe I-é-su Ki-tok lâi ê.
1:18 Bô lâng bat khòaⁿ-kìⁿ Siōng-tè, kantaⁿ tī Thiⁿ-pē sim-hoâi tiong ê to̍k-seⁿ Kiáⁿ ū kā I hián-bêng chhut-.lâi.
1:19 Kiâⁿ Sé-lé Iô-há-neh ê Kiàn-chèng
( Mt 3: 1-12; Mk 1: 2-8; Lk 3: 15-17)
Ē-bīn sī Iô-há-neh ê kiàn-chèng, Ê-lú-sa-lèm ê Iô-tá-iah lâng ê chong-kàu tong-kio̍k, chhe-phài chè-si kah Lē-bī lâng lâi mn̄g Iô-há-neh kóng, " Lí sī siáⁿ lâng? "
1:20 Hit sî, Iô-há-neh thán-pe̍k kong-khai sêng-jīn kóng, " Góa m̄-sī Ki-tok. "
1:21 Hiahê lâng koh mn̄g i kóng, " Án-ne, lí sī E-li-iah, sī-.bô? " Iô-há-neh ìn kóng, " M̄-sī. " In koh mn̄g i kóng, " Lí sī hit-ê sian-ti, sī-.bô? " Iô-há-neh ìn kóng, " M̄-sī. "
1:22 In chiū kā i kóng, " Lí sī siáⁿ lâng? Chhiáⁿ lí kā goán kóng, thang hō͘ goán hôe-hok chhe-phài goán lâi ê lâng. Lí kakī kóng lí sī siáⁿ lâng? "
1:23 Iô-há-neh ín-iōng I-sá-iah sian-ti ê ōe, kóng, " Góa to̍h-sī tī khòng-iá teh hoah ê siaⁿ, Tio̍h ūi Chú siu-ti̍t tō-lō͘. " (chù, ISI 40:3)
1:24 Hiahê lâng to̍h-sī Hoa-lí-sái phài ê lâng chhe-phài ê.
1:25 In koh mn̄g Iô-há-neh, kóng, " Lí nā m̄-sī Ki-tok, mā m̄-sī E-li-iah, mā m̄-sī hit-ê sian-ti, lí ná ē kā lâng sé-lé? "
1:26 Iô-há-neh ìn kóng, " Góa sī ēng chúi kā lâng sé-lé, ū chi̍t ūi lín m̄ bat ê khiā tī lín tiong-kan.
1:27 I tī góa ê āu-bīn teh lâi, góa liân kā I thǹg ê to bē kham-tit. "
1:28 Chiahê tāichì tī Iol-tàn hô tang hōaⁿ ê Bē-tha-niah hoat-seng; Iol-tàn hô to̍h-sī Iô-há-neh kā lâng sé-lé ê só͘-chāi.
1:29 Siōng-tè ê Iûⁿ-ko
Keh tńg kang, Iô-há-neh khòaⁿ tio̍h I-é-su kiâⁿ óa-.lâi, chiū kóng, " Lí khòaⁿ, Siōng-tè ê iûⁿ-ko, I beh lâi siau-tû sè-kan ê chōe.
1:30 Koan-hē I ê tāichì góa bat kā lín kóng, I pí góa khah bān lâi, I pí góa khah úi-tāi, in-ūi góa iáu-bōe chhut-sì, I to̍h chûn-chāi.
1:31 Góa kakī mā m̄ bat I, to̍k-to̍k góa lâi ēng chúi kā lâng sé-lé, sī beh hō͘ I-su-la-el lâng jīn-bat I. "
1:32 Iô-há-neh koh kiàn-chèng kóng, " Góa bat khòaⁿ tio̍h Sèng Sîn chhin-chhiūⁿ hún-chiáu tùi thiⁿ kàng lo̍h-lâi hioh tī I téng-bīn.
1:33 Góa kakī mā m̄ bat I, to̍k-to̍k chhe góa lâi ēng chúi kā lâng sé-lé ê hit ūi Siōng-tè ū kā góa kóng, ' Lí khòaⁿ, Sèng Sîn kàng-lîm hioh tī I téng-bīn, I to̍h-sī beh ēng Sèng Sîn kā lâng sé-lé ê hit ūi. '
1:34 Góa ū chhin-ba̍k khòaⁿ-.tio̍h, só͘-í, góa lâi kiàn-chèng chit ūi to̍h-sī Siōng-tè ê Kiáⁿ. "
1:35 I-é-su Ho͘-tiàu Tē-it Phoe Bûn-tô͘
Keh tńg kang, Iô-há-neh kah nn̄g-ê bûn-tô͘ koh khiā tī hia.
1:36 Iô-há-neh khòaⁿ tio̍h I-é-su teh kiâⁿ, chiū kóng, " Lí khòaⁿ, Siōng-tè ê iûⁿ-ko! "
1:37 Hit nn̄g-ê bûn-tô͘ thiaⁿ tio̍h i ánne kóng, chiū khì tòe I-é-su.
1:38 I-é-su oa̍t tńg-sin khòaⁿ tio̍h in teh tòe I, chiū kā in kóng, " Lín teh chhōe siáⁿ-mi̍h? " In ìn kóng, " La̍h-bí, Lí tòa tī tó-ūi? "( La̍h-bí to̍h-sī lāu-su ê ì-sù ).
1:39 I-é-su kā in kóng, " Lín tòe góa lâi-khì khòaⁿ. " In khì khòaⁿ I-é-su tòa ê só͘-chāi, hit ji̍t chiū kah I chò-hóe tòa, hit sî chha-put-to sī ē-po͘ sì-tiám.
1:40 Thiaⁿ Iô-há-neh ê ōe lâi tòe I-é-su hit nn̄g-ê lâng, chi̍t-ê sī Sí-mòng Piat-tò͘ ê sió-tī An-to-le̍h.
1:41 I seng khì chhōe i ê a-hiaⁿ Sí-mòng, kā i kóng, " Goán í-keng tú tio̍h Ki-tok. "
1:42 I chiū chhōa Sí-mòng lâi kìⁿ I-é-su. I-é-su chù-ba̍k kā i khòaⁿ, kóng, " Lí sī Iô-há-neh ê kiáⁿ Sí-mòng. Góa beh kā lí kiò-chò Ke-hoat. "( Ke-hoat kah Piat-tò͘ kāng-khoán ì-sù, to̍h-sī chio̍h-pôaⁿ ).
1:43 I-é-su ho͘-tiàu Hui-li̍p-pò͘ kah Nâ-than-nâ-el
Keh tńg kang, I-é-su beh khì Ga-lí-la-iah séng, tú tio̍h Hui-li̍p-pò͘, chiū kā i kóng, " Lâi tòe góa. "
1:44 Hui-li̍p-pò͘ sī Bia̍t-sái-tah lâng, sī An-to-le̍h kah Piat-tò͘ ê tông-hiong.
1:45 Hui-li̍p-pò͘ tú tio̍h Nâ-than-nâ-el, chiū kā i kóng, " Mô͘-se tī lu̍t-hoat-su só͘ siá kah chèng sian-ti-su só͘ kì-chài ê hit ūi, goán í-keng ū tú-.tio̍h, to̍h-sī Iô-sé-huh ê kiáⁿ, na-cha-lia̍t lâng I-é-su. "
1:46 Nâ-than-nâ-el kā i kóng, " Na-cha-lia̍t hit khoán só͘-chāi kám ē chhut siáⁿ-mi̍h hó mi̍h? " Hui-li̍p-pò͘ kóng, " Lí lâi khòaⁿ! "
1:47 I-é-su khòaⁿ tio̍h nâ-than-nâ-el kiâⁿ óa-.lâi, chiū kóng, " Lí khòaⁿ, i sī chin-chiàⁿ ê I-su-la-el lâng, sī sim bô hi-ké ê lâng. "
1:48 Nâ-than-nâ-el mn̄g I-é-su kóng, " Lí ná ē bat góa? " I-é-su ìn kóng, " Hui-li̍p-pò͘ iáu-bōe kiò lí, góa chiū khòaⁿ tio̍h lí tī bû-hoa-kó chhiū kha. "
1:49 Nâ-than-nâ-el ìn kóng, " Lāu-su, Lí to̍h-sī Siōng-tè ê Kiáⁿ, Lí to̍h-sī I-su-la-el ê ông. "
1:50 I-é-su ìn kóng, " In-ūi góa kā lí kóng, góa ū khòaⁿ tio̍h lí tī bû-hoa-kó chhiū kha, lí chiū sìn góa, sī-.bô? Lí ē khòaⁿ-kìⁿ pí che koh khah tōa ê tāichì. "
1:51 I-é-su koh kā in kóng, " Góa si̍t-chāi kā lín kóng, lín ē khòaⁿ-kìⁿ thiⁿ khui, Siōng-tè ê thiⁿ-sài tī Jîn-chú ê téng-bīn teh khí-khí lo̍h-lo̍h. "
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。