路加福音 四福音合参 线上收听:中文和合本 现代中文译本修订版 现代台语 台语圣经 台语(长老会传播中心授权） 客语 现代客语 粤语和合本 希腊文(WH-NT) 下载档案 关于语音圣经
19:1 I-é-su kah Thiu-sòe ê Cha̍k-khai
I-é-su ji̍p-khì I-é-lī-kho siâⁿ, tī ke-lō͘ teh kiâⁿ ê sî,
19:2 Tī hia ū chi̍t-ê lâng miâ kiò-chò Cha̍k-khai, sī thiu-sòe ê thâu-lâng, mā sī hó-gia̍h lâng.
19:3 I ài beh khòaⁿ I-é-su sī siáⁿ lâng, m̄ koh, lâng chin chē, i ê sin-châi koh é, soah khòaⁿ bē tio̍h.
19:4 Só͘-í, i chiū cháu chò chêng, peh khí-lih chi̍t châng sng-châi chhiū, beh khòaⁿ I-é-su tùi hia keng-kòe.
19:5 I-é-su kiâⁿ kàu hit só͘-chāi, gia̍h thâu khí-lâi khòaⁿ, kā i kóng, " Cha̍k-khai, kóaⁿ-kín lo̍h-.lâi, kin-á-ji̍t góa it-tēng tio̍h tòa lí ê chhù. "
19:6 Cha̍k-khai chiū kóaⁿ-kín lo̍h-.lâi, hoaⁿ-hoaⁿ hí-hí khì gêng-chiap I-é-su.
19:7 Chèng lâng khòaⁿ tio̍h chiū nga̍uh-nga̍uh-liām, kóng, " Chit-ê lâng soah ji̍p-khì chōe-jîn ê chhù tòa! "
19:8 Cha̍k-khai khiā-.leh, tùi Chú kóng, " Chú ah, góa beh kā góa só͘-ū châi-sán ê chi̍t-pòaⁿ, the̍h-lâi chín-chè sànchhiah lâng; góa nā bat pián siáⁿ lâng ê chîⁿ, góa beh sì pōe pôe i. "
19:9 I-é-su tùi i kóng, " Kin-á-ji̍t kiù-un lâi-kàu chit-ê ke, in-ūi i mā sī A-bu-la-hàm ê kiáⁿ-sun.
19:10 In-ūi Jîn-chú sī beh lâi chhōe sit-bê ê lâng, lâi kā i kiù. "
19:11 Cha̍p niú Gîn-á ê Phì-jū
( Mt 25: 14-30)
In thiaⁿ tio̍h chiahê ōe ê sî, I-é-su koh kā in kóng chi̍t-ê phì-jū, che sī in-ūi I teh beh kàu Ê-lú-sa-lèm à, hiahê lâng mā siūⁿ kóng Siōng-tè kok-tō͘ liâmpiⁿ to̍h ē chhut-hiān.
19:12 Só͘-í, I-é-su kā in kóng, " Ū chi̍t-ê kùi-cho̍k beh khì chin hn̄g ê só͘-chāi, siū hong chò ông liáu-āu chiah ē tò tńg-.lâi.
19:13 I kiò cha̍p-ê lô͘-po̍k lâi, hō͘ in múi lâng chi̍t niú gîn á, tùi in kóng, ' Kàu góa tńg-lâi í-chêng, ēng chiahê gîn-á khì chò senglí. '
19:14 Chóng-.sī, hit-ê kùi-cho̍k pún-kok ê jîn-bîn oàn-hūn i, chiū chhe chi̍t-ê sù-chiá tòe-āu khì chàu, kóng, ' Goán bô ài chit-ê lâng chò goán ê ông. '
19:15 " Chit-ê kùi-cho̍k siū hong chò ông tńg-.lâi, kiò hiahê tùi i niá gîn-á ê lô͘-po̍k lâi, ài beh chai in chò senglí thàn gōa chē chîⁿ.
19:16 Thâu chi̍t-ê lâi i ê bīn-chêng, kóng, ' Chú-lâng, góa ēng lí hō͘ góa hiahê gîn-á thàn cha̍p niú à. '
19:17 Chú-lâng kā i kóng, ' Chin hó, hó ê lô͘-po̍k, lí kì-jiân tī sió-khóa ê tāichì chīn-tiong, taⁿ hō͘ lí koán cha̍p-ê siâⁿ. '
19:18 Tē-jī-ê lâi, kóng, ' Chú-lâng, góa ēng lí hit-ê gîn-á thàn gō͘ niú à. '
19:19 Chú-lâng mā ánne kā i kóng, ' Hō͘ lí mā koán-lí gō͘-ê siâⁿ. '
19:20 Koh chi̍t-ê lô͘-po̍k lâi, kóng, ' Chú-lâng, lí khòaⁿ, lí ê chi̍t niú gîn á tī chia, góa ēng chhiú-kin-á kā i pau khí-lâi khǹg-.leh.
19:21 Góa kiaⁿ lí, in-ūi lí sī khek-po̍k ê lâng, bô kià mā beh niá, bô iā chéng mā beh siu-koah. '
19:22 Chú-lâng kā i kóng, ' Lí chit-ê pháiⁿ ê lô͘-po̍k, góa beh chiàu lí só͘ kóng ê kā lí tēng chōe. Lí kì-jiân chai góa sī khek-po̍k ê lâng, bô kià mā beh niá, bô iā chéng mā beh siu-koah,
19:23 Lí ná ē bô kā góa ê gîn-á khì lok tī chîⁿ-tiàm, kàu góa tńg-.lâi ê sî thang niá bó-kim kah lī-sek? '
19:24 Chú-lâng kā khiā tī piⁿ-á ê lâng kóng, ' Kā i ê chi̍t niú gîn á the̍h-.lâi, kau hō͘ hit-ê ū cha̍p niú ê. '
19:25 In tùi chú-lâng kóng, ' Chú-lâng, i í-keng ū cha̍p niú à. '
19:26 Chú-lâng ìn kóng, ' Góa kā lín kóng, í-keng ū ê lâng, góa beh hō͘ i koh khah chē; bô ê lâng, liân i só͘-ū ê mā beh kā i the̍h-.lâi.
19:27 M̄ koh, hiahê bô ài góa chò in ê ông ê tùi-te̍k, tio̍h kā in thoa lâi, tī góa ê bīn-chêng kā in thâi-sí. '"
19:28 I-é-su Kong-êng Chìn-ji̍p Ê-lú-sa-lèm
( Mt 21: 1-11; Mk 11: 1-11; Ih 12: 12-19)
I-é-su kóng chiahê ōe liáu-āu, kè-sio̍k chò-chêng kiâⁿ, chiūⁿ Ê-lú-sa-lèm.
19:29 Teh beh kàu kiò Kaⁿ-ná soaⁿ soaⁿ-kha ê Pek-hoat kî kah Bē-tha-niah ê sî, I-é-su chhe nn̄g-ê bûn-tô͘,
19:30 Kā in hoan-hù kóng, " Lín khì tùi-bīn ê chng-thâu, ji̍p-khì ê sî ē tú tio̍h chi̍t chiah iáu-bōe ū lâng khiâ-kòe ê lî-á pa̍k tī hia, lín kā i tháu-khui khan-lâi chia.
19:31 Nā ū lâng mn̄g kóng, ' Lín tháu lî-á beh chhòng siáⁿ? Lín tio̍h kóng, ' Chú teh su-iàu. '"
19:32 Hit nn̄g-ê bûn-tô͘ chiū khì, só͘ tú-.tio̍h ê tāichì kó-jiân kah I-é-su só͘ kóng ê oân-choân-kāng-khoán.
19:33 In teh tháu lî-á ê sî, chú-lâng mn̄g in kóng, " Lí tháu lî-á beh chhòng siáⁿ? "
19:34 In ìn kóng, " Chú teh su-iàu. "
19:35 In chiū khan hit chiah lî-á lâi hō͘ I-é-su, kā in kakī ê gōa-saⁿ phoa̍h tòa lî-á téng, hû I-é-su khí-lih khiâ.
19:36 I-é-su khiâ lî-á hiòng chêng kiâⁿ ê sî, chèng lâng kā kakī ê gōa-saⁿ pho͘ tī lō͘-.ni̍h.
19:37 I-é-su tú beh lo̍h Kaⁿ-ná soaⁿ ê sî, kui tōa-tīn ê bûn-tô͘ khòaⁿ tio̍h it-chhè kî-biāu ê tāichì chiū tōa hoaⁿ-hí, tōa-siaⁿ oló Siōng-tè, kóng,
19:38 Hōng Chú ê miâ lâi ê ông eng-kai tit tio̍h oló, goān thiⁿ-téng hô-pêng, kui êng-kng hō͘ chì-koân Siōng-tè.
19:39 Chèng lâng tiong-kan ū kúi-nā-ê Hoa-lí-sái phài ê lâng tùi I-é-su kóng, " Lāu-su ah, tio̍h chek-pī Lí ê bûn-tô͘. "
19:40 I-é-su ìn kóng, " Góa kā lín kóng, in nā tiām-tiām, hiahê chio̍h-thâu mā ē tōa-siaⁿ hoah. "
19:41 I-é-su teh beh kàu Ê-lú-sa-lèm ê sî, khòaⁿ tio̍h siâⁿ chiū ūi tio̍h chit-ê siâⁿ thî-khàu,
19:42 Kóng, " Góa si̍t-chāi chin ài lí tī chit ji̍t to̍h chai koan-hē pêng-an ê tāichì; chóng-.sī, hiān-chhú-sî lí ê ba̍k-chiu khòaⁿ bē chhut.
19:43 In-ūi sî-ji̍t teh beh kàu, lí ê tùi-te̍k ē tī lí ê sì-kho͘-ûi khí thô͘-chhiûⁿ lâi kā lí hong só khí-.lâi.
19:44 In koh ē hō͘ lí kah lí siâⁿ lāi ê jîn-bîn lóng húi-bia̍t, bô lâu kah nn̄g tè chio̍h sio-tha̍h, in-ūi lí m̄-chai Siōng-tè lâi beh chín-kiù lí ê hó ki-hōe. "
19:45 I-é-su Chheng-khì Sèng-tiān
( Mt 21: 12-17; Mk 11: 15-19; Ih 2: 13-22)
I-é-su ji̍p-khì sèng-tiān ê sî, chiū kóaⁿ-chhut hiahê bē mi̍h-kiāⁿ ê lâng.
19:46 I kā in kóng, " Ū kì-chài, góa ê chhù beh chò kî-tó ê chhù, m̄ koh, lín hō͘ i pìⁿ chò chha̍t-siū. " (chù, ISI 56:7; ILM 7:11)
19:47 I-é-su ta̍k ji̍t tī sèng-tiān kà-sī lâng, hiahê chè-si-tiúⁿ, keng-ha̍k kàu-su í-ki̍p jîn-bîn ê thâu-lâng kè-bô͘ beh sat-hāi I-é-su,
19:48 Chóng-.sī, lóng chhōe bô pō͘, in-ūi jîn-bîn lóng chin tì-ì teh thiaⁿ I-é-su ê ōe.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。