路加福音 四福音合参 线上收听:中文和合本 现代中文译本修订版 现代台语 台语圣经 台语(长老会传播中心授权） 客语 现代客语 粤语和合本 希腊文(WH-NT) 下载档案 关于语音圣经
17:1 Lūn Chōe, Sìn-sim, Ho̍k-sāi
( Mt 18: 6-7, 21-22; Mk 9: 42)
I-é-su koh tùi bûn-tô͘ kóng, " Ín-khí lâng hoān chōe ê tāichì sī lân-bián; chóng-.sī, hō͘ hit-ê tāichì hoat-seng ê lâng ū chai-hō!
17:2 Lêng-khó ēng tōa chio̍h-bō tiàu tòa i ê ām-kún, kā i hiat-lo̍h hái, mā m̄ thang hō͘ chì bî-sè ê chi̍t-ê hoān chōe.
17:3 Lín kakī mā tio̍h kín-sīn! Lín ê hiaⁿ-tī nā hoān chōe, tio̍h kā i chek-pī. I nā hóe-kái, tio̍h kā i sià-bián.
17:4 Nā lí ê hiaⁿ-tī chi̍t ji̍t tek-chōe lí chhit pái, i koh chhit pái lóng ū tò tńg-lâi kā lí kóng, ' Góa hóe-kái à. ' Lí mā lóng tio̍h kā i sià-bián. "
17:5 Sù-tô͘ kā Chú kóng, " Kiû Lí ke-thiⁿ goán ê sìn-sim. "
17:6 Chú ìn kóng, " Lín nā ū chhin-chhiūⁿ chi̍t lia̍p kòa-chhài-chí hiah tōa ê sìn-sim, to̍h-sī bēng-lēng chit châng sng-châi chhiū kóng, ' Poe̍h lí ê kin khì chai tī hái-.ni̍h', hit-châng chhiū mā ē sūn-ho̍k lín.
17:7 " Lín tiong-kan nā ū lô͘-po̍k tùi choh-sit á-.sī kò͘ iûⁿ tńg-.lâi ê sî, lín kám ē kā i kóng, ' Kín chē lo̍h-lâi chia̍h pn̄g. '?
17:8 Lí kám ē tian-tò kā i kóng, ' Chún-pī hō͘ góa chia̍h pn̄g, hâ ûi-su-kûn lâi ho̍k-sāi góa. Thèng-hāu góa lim-chia̍h soah, lí chiah thang lim-chia̍h. '?
17:9 Lô͘-po̍k chò chú-lâng só͘ hoan-hù ê tāichì, chú-lâng kám tio̍h kā i soeh-siā?
17:10 Lín mā chhin-chhiūⁿ ánne, lín chò oân siū kau-tài ê tāichì, tio̍h kóng, ' Goán sī bô lō͘-ēng ê lô͘-po̍k, kantaⁿ7 chīn pún-hūn khì chò niā-niā. '"
17:11 I-hó Cha̍p-ê thái-ko Pēⁿ-lâng
I-é-su khì Ê-lú-sa-lèm ê sî, tùi Sa-má-lī-a kah Ga-lí-la-iah séng ê kau-kài keng-kòe.
17:12 I ji̍p-khì chi̍t-ê chng-thâu ê sî, tú tio̍h cha̍p-ê thái-ko pēⁿ-lâng. In khiā tòa hn̄g-hn̄g ê só͘-chāi,
17:13 Tōa siaⁿ hoah, " I-é-su, lāu-su, liân-bín goán! "
17:14 I-é-su chi̍t-ē khòaⁿ-.tio̍h, chiū kā in kóng, " Lín pún-sin khì hō͘ chè-si giām. " In khì ê sî, tī lō͘ tiong chiū tit tio̍h chheng-khì.
17:15 Kî-tiong chi̍t-ê lâng khòaⁿ tio̍h kakī ê pēⁿ í-keng hó, chiū tò tńg-lâi tōa-siaⁿ oló Siōng-tè,
17:16 Phak tòa I-é-su ê kha chêng kā I kám-siā, chit-ê lâng sī Sa-má-lī-a lâng.
17:17 I-é-su mn̄g kóng, " Kám m̄-sī cha̍p-ê lâng lóng tit tio̍h chheng-khì? Kî-tha káu-ê lâng tī tó-ūi?
17:18 Chit-ê gōa-cho̍k ê lâng í-gōa, kám bô pa̍t lâng tò tńg-lâi kám-siā Siōng-tè? "
17:19 I-é-su chiū kā hit-ê lâng kóng, " Khí-.lâi, chò lí tńg-.khì, lí ê sìn-sim hō͘ lí tit tio̍h i hó à. "
17:20 Siōng-tè Kok-tō͘ ê Lâi-lîm
( Mt 24: 23-28, 37-41)
Ū chi̍t-kóa Hoa-lí-sái phài ê lâng mn̄g I-é-su Siōng-tè kok-tō͘ tang-sî ē lîm-kàu. I-é-su ìn kóng, " Siōng-tè kok-tō͘ ê lîm-kàu m̄-sī lâng khòaⁿ ē-chhut-.lâi.
17:21 Mā bô lâng ē-tàng kóng, ' Tī chia' á-.sī ' Tī hia', in-ūi Siōng-tè kok-tō͘ sī tī lín ê tiong-kan. "
17:22 I-é-su chiū tùi bûn-tô͘ kóng, " Sî-ji̍t teh beh kàu, lín chin ài khòaⁿ tio̍h Jîn-chú lâi-lîm ê hit ji̍t, lín mā khòaⁿ bē tio̍h.
17:23 Nā ū lâng kā lín kóng, ' Lí khòaⁿ, tī hia! Lí khòaⁿ, tī chia! ', lín m̄ thang chhut-.khì, mā m̄ thang tòe in khì.
17:24 In-ūi Jîn-chú lâi-lîm ê ji̍t-chí ná chhin-chhiūⁿ sihnà, tùi thiⁿ chit pêng teh sih, kng chiò kàu thiⁿ ê hit pêng.
17:25 Chóng-.sī, I it-tēng tio̍h tāi-seng siū chin chē ê kan-khó͘, mā hō͘ chit sè-tāi ê lâng khì-sak.
17:26 Jîn-chú lâi-lîm ê ji̍t-chí kah Nó͘-ah ê sî-ji̍t kāng-khoán.
17:27 Hit sî, lâng chiàu-siông teh lim-chia̍h, teh kè-chhōa. Kàu Nó͘-ah ji̍p-khì tōa chûn ê ji̍t, tōa-chúi chi̍t-ē kàu, chèng lâng lóng im-sí liáu-liáu.
17:28 Mā kah Ló-toh ê sî-ji̍t kāng-khoán, lâng chiàu-siông teh lim-chia̍h, bé-bē, chèng-choh, khí chhù.
17:29 M̄ koh, Ló-toh chhut So͘-tóm hit ji̍t, tùi thiⁿ ū kàng-lo̍h hóe kah liû-hông, kā in siau-bia̍t kah bô pòaⁿ-lâng.
17:30 Jîn-chú chhut-hiān ê ji̍t mā ē chhin-chhiūⁿ ánne.
17:31 " Hit ji̍t, tú tī chhù téng ê lâng m̄ thang lo̍h-lâi the̍h chhù lāi ê mi̍h-kiāⁿ; tú tī hn̂g-.ni̍h ê lâng mā m̄ thang tńg-khì chhù-.ni̍h.
17:32 Lín tio̍h ē kì-tit Ló-toh ê bó͘ só͘ tú-.tio̍h ê tāichì.
17:33 Siūⁿ beh pó-choân kakī sèⁿ-miā ê lâng ē sòng-sit sèⁿ-miā, só͘-ū sòng-sit sèⁿ-miā ê lâng ē pó-choân i ê sèⁿ-miā.
17:34 Góa kā lín kóng, hit mê nn̄g-ê lâng khùn kâng-téng chhn̂g, chi̍t-ê ē hō͘ lâng chhōa-.khì, chi̍t-ê ē lâu-.leh;
17:35 Nn̄g-ê hū-jîn-lâng tâng-chê teh e chio̍h-bō, chi̍t-ê ē hō͘ lâng chhōa-.khì, chi̍t-ê ē lâu-.leh;
17:36 Ū nn̄g-ê lâng tī chhân-.ni̍h teh choh-sit, chi̍t-ê ē hō͘ lâng chiap-.khì, chi̍t-ê ē lâu-.leh. "（ Chù, goân pán-pún bô chit chat, ū ê chhau-pún ke chit chat ）
17:37 Bûn-tô͘ mn̄g I-é-su kóng, " Chú ah, che ē tī siáⁿ-mi̍h só͘-chāi hoat-seng? " I-é-su ìn kóng, " Ū si-thé ê só͘-chāi, eng-chiáu chiū ē chū-chi̍p khì tī hia. "
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。