路加福音 四福音合参 线上收听:中文和合本 现代中文译本修订版 现代台语 台语圣经 台语(长老会传播中心授权） 客语 现代客语 粤语和合本 希腊文(WH-NT) 下载档案 关于语音圣经
11:1 Koan-hē Kî-tó ê Kà-sī
( Mt 6: 9-15; 7: 7-11)
I-é-su tī chi̍t-ê só͘-chāi kî-tó. Kî-tó soah ê sî, ū chi̍t-ê bûn-tô͘ tùi I kóng, " Chú ah, chhin-chhiūⁿ Iô-há-neh ū kà-sī i ê bûn-tô͘ kî-tó, kiû Lí mā kà-sī goán kî-tó. "
11:2 I-é-su kā in kóng, " Lín kî-tó ê sî tio̍h ánne kóng, Thiⁿ-pē ah, goān Lí ê miâ sèng, Lí ê kok lîm-kàu.
11:3 Kiû Lí ta̍k ji̍t chiàu-sî sù goán chia̍h-mi̍h.
11:4 Sià-bián goán ê chōe, in-ūi goán mā ū sià-bián ko͘-hū goán ê lâng. M̄-thang chhōa goán ji̍p-khì goán tam-tng bē khí ê chhì-thàm. "
11:5 I-é-su koh kā bûn-tô͘ kóng, " Lín siáⁿ lâng nā ū pêng-iú, lí pòaⁿ-mê khì chhōe i kóng, ' Pêng-iú, the̍h saⁿ tè piáⁿ chioh góa,
11:6 In-ūi góa ū pêng-iú lí-hêng lâi chhōe góa, góa bô mi̍h thang chhiáⁿ i chia̍h. '
11:7 Lí hit-ê pêng-iú tùi lāi-bīn ìn kóng, ' Mài chhá lah, mn̂g í-keng koaiⁿ, góa kah gín'á tī chhn̂g-.ni̍h teh khùn. Góa bē tàng khí-lâi the̍h hō͘ lí. '
11:8 Góa kā lí kóng, sûi-jiân hit-ê lâng bē tài-liām tio̍h pêng-iú chêng, khí-lâi the̍h piáⁿ hō͘ lí, i iáu koh ē in-ūi lí ê pek-chhiat khún-kiû, khí-lâi the̍h lí só͘ su-iàu ê mi̍h hō͘ lí.
11:9 Só͘-í, góa koh kā lín kóng, kiû ē tit tio̍h, chhōe ē chhōe-.tio̍h, phah mn̂g ē kā lín khui.
11:10 In-ūi ū kiû chiū ē tit tio̍h, ū chhōe chiū ē chhōe-.tio̍h, ū phah mn̂g chiū ē kā in khui.
11:11 Lín chò lāu-pē ê lâng, kakī ê kiáⁿ lâi thó piáⁿ, lí kám ē the̍h chio̍h-thâu hō͘ i? Á-sī lâi thó hî, lí kám ē kā chôa chún-chò hî hō͘ i?
11:12 Á-.sī thó nn̄g, lí kám ē ēng giat-á-thâng hō͘ i?
11:13 Lín chiahê lâng sûi-jiân pháiⁿ, iáu koh ē-hiáu ēng hó mi̍h hō͘ lín ê kiáⁿ-jî, hô-hòng lín tī thiⁿ-téng ê Thiⁿ-pē, I kám bē ēng Sèng Sîn lâi hō͘ tùi I khún-kiû ê lâng? "
11:14 I-é-su kah Be̍h-che-bul ê Cheng-gī
( Mt 12: 22-30; Mk 3: 20-27)
I-é-su kóaⁿ chi̍t-ê é-káu siâ-sîn chhut-.khì, é-káu ê lâng chiū kóng-ōe. Kûn-chiòng lóng kám-kak kî-koài.
11:15 Kî-tiong ū kúi-nā-ê lâng kóng, " I kóaⁿ kúi sī khò kúi-ông Be̍h-che-bul. "
11:16 Koh ū lâng beh chhì-thàm I-é-su, iau-kiû I kiâⁿ tùi thiⁿ lâi ê sîn-jiah.
11:17 I-é-su chai in ê sim-su, chiū kā in kóng, " Kok-ka nā kakī khí hun-cheng chiū ē pha-hng, ka-têng nā bē hô it-tēng ē phòa-chhùi.
11:18 Sa-tán nā kakī khí hun-cheng, i ê kok ná khiā ē tiâu? Lín kóng góa khò Be̍h-che-bul kóaⁿ kúi,
11:19 Góa nā-sī khò Be̍h-che-bul kóaⁿ kúi, lín ê chú-tē kóaⁿ kúi sī óa-khò siáⁿ lâng lè? Án-ne, lín ê chú-tē ē hoán-po̍k lín ê kóng-hoat.
11:20 Chóng-.sī, góa nā khò Siōng-tè ê khùi-la̍t kóaⁿ kúi, Siōng-tè kok-tō͘ chiū í-keng tī lín ê tiong-kan. "
11:21 " Ióng-sū nā chhēng khoe-kah, gia̍h ke-si teh kò͘-siú i ê chhù, i só͘-ū ê châi-sán chiū an-choân.
11:22 Chóng-.sī, nā ū chi̍t-ê pí i khah béng ê lâi phah-iâⁿ i, chiū ē kā i só͘ óa-khò ê choân-hù bú-khì chhiúⁿ-.khì, koh kā i ê châi-bu̍t pun liáu-liáu.
11:23 " Bô ūi góa ê lâng to̍h-sī kah góa tùi-te̍k. Bô hia̍p-chō͘ góa ê lâng to̍h-sī teh kā góa phò-hoāi. "
11:24 Siâ-sîn Tò Tńg-.lâi
( Mt 12: 43-45)
" Siâ-sîn lī-khui hū-sin ê lâng liáu-āu, keng-kòe bô chúi ê tē, beh chhōe hioh-khùn ê só͘-chāi chhōe lóng bô, chiū kóng, ' Góa beh tńg-khì góa tùi hia chhut-.lâi ê hit keng chhù. '
11:25 Tńg-khì kàu-ūi chi̍t khòaⁿ, chhù lāi piàⁿ-sàu kah chin chheng-khì koh chéng-chê.
11:26 Hitê siâ-sîn chiū koh khì tòa chhit ê pí kakī khah pháiⁿ ê siâ-sîn lâi, ji̍p-khì hia tòa. Hitê lâng ê kiat-kio̍k pí khí-thâu koh khah chhám. "
11:27 Chin-chiàⁿ ê Hok-Khì
I-é-su teh kóng chiahê ōe ê sî, kûn-chiòng tiong-kan ū chi̍t-ê hū-jîn-lâng tōa-siaⁿ tùi I kóng, " Seⁿ lí koh hō͘ lí suh-leng ê hū-jîn-lâng chin ū hok-khì! "
11:28 M̄ koh, I-é-su ìn kóng, " Thiaⁿ Siōng-tè ê tō-lí lâi chun-siú ê lâng koh khah ū hok-khì! "
11:29 Iau-kiû Sîn-jiah
( Mt 12: 38-42; Mk 8: 12)
Kûn-chiòng jú lâi jú chē, I-é-su chiū kóng, " Chit sè-tāi sī pháiⁿ ê sè-tāi, in kiû sîn-jiah, m̄ koh, tû-liáu Iô-ná ê sîn-jiah í-gōa, bô koh ū sîn-jiah hō͘ in.
11:30 Tú chhin-chhiūⁿ Iô-ná chiâⁿ-chò Ni-ne-beh lâng ê sîn-jiah, Jîn-chú mā beh chiâⁿ-chò chit sè-tāi ê sîn-jiah.
11:31 Tī sím-phòaⁿ ê sî, lâm-hong ê lú-ông beh kah chit sè-tāi ê lâng chò-hóe koh-oa̍h khí-.lâi, sòa kā chit sè-tāi ê lâng tēng chōe, in-ūi hit-ê lú-ông ū tùi tē ê ke̍k-thâu lâi thiaⁿ Só͘-lô-móng tì-hūi ê ōe, hô-hòng tī chia ū pí Só͘-lô-móng khah úi-tāi-.ê.
11:32 Tī sím-phòaⁿ ê sî, Ni-ne-beh lâng ē kah chit sè-tāi ê lâng chò-hóe koh-oa̍h khí-.lâi, soah kā chit sè-tāi ê lâng tēng chōe, in-ūi Ni-ne-beh lâng ū tùi Iô-ná só͘ thoân ê tō-lí lâi hóe-kái, hô-hòng tī chia ū pí Iô-ná koh khah úi-tāi-.ê. "
11:33 Seng-khu ê Teng
( Mt 5: 15; 6: 22-23)
" Bô lâng tiám teng hē tī bô lâng khòaⁿ-kìⁿ ê só͘-chāi, á-.sī khàm tòa bí-táu ē; it-tēng tio̍h hē tī teng-tâi téng, hō͘ ji̍p-.lâi ê lâng khòaⁿ tio̍h hit-ê kng.
11:34 Lí ê ba̍k-chiu sī seng-khu ê teng, lí ê ba̍k-chiu nā kim, choân seng-khu chiū kng-bêng; lí ê ba̍k-chiu nā hoe, kui seng-khu chiū o͘-àm.
11:35 Só͘-í, tio̍h chù-ì, m̄ thang hō͘ lí lāi-bīn ê kng àm-.khì.
11:36 Lí choân seng-khu nā lóng kng-bêng, bô chi̍t-tiám-á o͘-àm, chiū ē chhin-chhiūⁿ teng kng iàⁿiàⁿ teh chiò lí, ē hō͘ lí oân-choân kng-bêng. "
11:37 Khián-chek Hoa-lí-sái Phài kah Keng-ha̍k Kàu-su
( Mt 23: 1-36; Mk 12: 38-40; Lk 20: 45-47)
I-é-su chiahê ōe kóng soah ê sî, ū chi̍t-ê Hoa-lí-sái phài ê lâng chhiáⁿ I chia̍h pn̄g. I-é-su chiū ji̍p-khì chē-toh.
11:38 Hitê Hoa-lí-sái phài ê lâng khòaⁿ tio̍h I-é-su bô sé chhiú chiū lâi chia̍h, kám-kak chin kî-koài.
11:39 I-é-su chiū kā i kóng, " Taⁿ lín Hoa-lí-sái phài ê lâng kantaⁿ7 chheng-khì poe kah pôaⁿ ê gōa-bīn, m̄ koh, lín lāi-bīn chhiong-móa tham-io̍k kah siâ-ok.
11:40 Lín chiahê gōng lâng, chhòng-chō gōa-bīn ê Siōng-tè kám m̄-sī mā ū chhòng-chō lāi-bīn?
11:41 Tio̍h kā chiahê poe-pôaⁿ lāi-bīn ê mi̍h the̍h-lâi chín-chè lâng, ánne, lín ta̍k hāng mi̍h chiū lóng chheng-khì.
11:42 " Lín chiahê Hoa-lí-sái phài ê lâng ū chai-hō ah! In-ūi lín kā po̍k-hô, hôe-hiang-á kah ta̍k chióng ê chhài-se cha̍p hūn thiu chi̍t hūn hiàn hō͘ Siōng-tè, m̄ koh, lín bô tiōng-sī kong-gī kah thiàⁿ Siōng-tè ê tāichì. Chóng-.sī, chiahê tāichì tio̍h eng-kai ài chò, mā m̄ thang hut-lio̍k téng-bīn hiahê hōng-hiàn.
11:43 Lín Hoa-lí-sái phài ê lâng ū chai-hō ah! In-ūi lín ài tī hōe-tn̂g lāi chē tōa-ūi, koh ài tī tōa lō͘-kháu hō͘ lâng kā lín chhéng-an.
11:44 Lín ū chai-hō lah! In-ūi lín chhin-chhiūⁿ khòaⁿ bē tio̍h ê sí-lâng ê bōng, lâng tùi hit téng-bīn kiâⁿ-kòe mā m̄-chai. "
11:45 Ū chi̍t-ê lu̍t-hoat ê kàu-su ìn I-é-su kóng, " Lāu-su, Lí kóng chiahê ōe mā bú-jio̍k tio̍h goán. "
11:46 M̄ koh, I-é-su ìn kóng, " Lín chiahê lu̍t-hoat kàu-su mā ū chai-hō ah! In-ūi lín kā lâng taⁿ bô hoat-tit ê tāng-tàⁿ hō͘ lâng taⁿ; m̄ koh, lín kakī liân chi̍t ki chéng-thâu-á to m̄-khéng tín-tāng lâi kiám khin hiahê tāng-tàⁿ.
11:47 Lín it-tēng ū chai-hō ah! In-ūi lín ūi lín chó͘-sian sat-hāi ê sian-ti chō bōng.
11:48 Án-ne, lín kakī chèng-si̍t lín mā chàn-sêng chó͘-sian só͘ chò ê tāichì, koh hoaⁿ-hí lâi chō in ê bōng.
11:49 Só͘-í, Siōng-tè ê tì-hūi ū kóng, ' Góa beh chhe sian-ti kah sù-tô͘ khì in hia, kî-tiong ū ê in ē kā i hāi-sí, ū ê in ē kā i pek-hāi. '
11:50 Án-ne, tùi chhòng-chō sè-kài í-lâi só͘ lâu chèng sian-ti ê hoeh lóng beh kā lín chit sè-tāi thó,
11:51 Chiū-sī tùi A-bel ê hoeh kàu Cha-kha-lī-a sí tī tiān kah tôaⁿ ê tiong-kan só͘ lâu ê hoeh. Góa si̍t-chāi kā lín kóng, hiahê hoeh-chè lóng beh tùi lín chit sè-tāi ê lâng thó.
11:52 Lín chiahê lu̍t-hoat kàu-su ū chai-hō! In-ūi lín kā khui tì-sek ê mn̂g ê só-sî gia̍h-khì. Lín kakī bô beh ji̍p-.khì, koh chó͘-tòng siūⁿ beh ji̍p-.khì ê lâng. "
11:53 I-é-su tùi hia chhut-.lâi ê sî, keng-ha̍k kàu-su kah Hoa-lí-sái phài ê lâng koh khah chhut-la̍t, ke̍k-lia̍t kong-kek I-é-su, pek I kóng khah chē ōe.
11:54 In teh tán I-é-su kóng m̄ tio̍h ōe ê sî, thang chhńg I ê ōe-phāng.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。