马可福音 四福音合参 线上收听:中文和合本 现代中文译本修订版 现代台语 台语圣经 台语(长老会传播中心授权） 客语 现代客语 福州话 粤语和合本 希腊文(WH-NT) 下载档案 关于语音圣经
5:1 I-é-su Tháu-pàng Siâ-sîn Hū-sin ê Lâng
( Mt 8: 28-34; Lk 8: 26-39)
I-é-su kah bûn-tô͘ kòe-khì Ga-lí-la-iah ô͘ ê tùi-bīn hōaⁿ, lâi-kàu Gê-la̍h-sam lâng ê tē-khu.
5:2 I-é-su chi̍t ē lo̍h chûn, sûi-sî tú tio̍h chi̍t-ê hō͘ siâ-sîn hū-sin ê lâng tùi bōng-á-po͘ chhut-.lâi.
5:3 Chit-ê lâng lóng tòa tī bōng-á-po͘, lâng ēng thih-liān to pa̍k i bē tiâu.
5:4 In-ūi lâng tiāⁿtiāⁿ ēng kha-liâu chhiú-khàu kah thih-liān kā i pa̍k, m̄ koh, thih-liān lóng hō͘ i chhoah-tn̄g, kha-liâu chhiú-khàu mā hō͘ i kòng chhùi. Bô lâng ū khùi-la̍t thang kā i chè-ho̍k.
5:5 Chit-ê lâng mê-ji̍t tī bōng-á-po͘ á-.sī soaⁿ-.ni̍h loān jióng, koh ēng chio̍h-thâu siong-hāi kakī.
5:6 I tùi hn̄g-hn̄g khòaⁿ tio̍h I-é-su, chiū cháu-lâi phak tòa I-é-su ê bīn-chêng,
5:7 Tōa siaⁿ hoah, " Chì-koân Siōng-tè ê Kiáⁿ I-é-su, Lí hô-pit lâi kan-sia̍p góa? Góa kí Siōng-tè ê miâ lâi khún-kiû Lí, m̄ thang kā góa chek-hoa̍t. "
5:8 I ánne kóng sī in-ūi I-é-su bat tùi i kóng, " Siâ-sîn, tio̍h tùi hit-ê lâng chhut-.khì! "
5:9 I-é-su mn̄g i kóng, " Lí hō-chò siáⁿ-mi̍h miâ? " Hitê lâng ìn kóng, " Góa ê miâ kiò-chò ' Kun-thoân', in-ūi goán sī kui tōa-tīn ê kúi. "
5:10 Siâ-sîn chiū pek-chhiat kiû I-é-su m̄ thang kóaⁿ in lī-khui hit-ê tē-khu.
5:11 Hit sî, tī soaⁿ-phiâⁿ ū chi̍t tīn ti teh thó-chia̍h.
5:12 Siâ-sîn chiū kiû I-é-su kóng, " Hō͘ goán khì hiahê ti-kûn, hō͘ goán thang ji̍p-khì in lāi-bīn. "
5:13 I-é-su ín-chún in khì. Hiahê siâ-sîn chiū tùi hit-ê lâng chhut-.lâi, ji̍p-khì hiahê ti-kûn. Chha-put-to nn̄g-chheng chiah ê ti-kûn cháu-lo̍h soaⁿ-phiâⁿ chông lo̍h-khì ô͘-.ni̍h, hō͘ ô͘-chúi im-sí.
5:14 Kò͘-ti ê lâng chiū cháu-khì kā siâⁿ lāi kah chng-thâu ê lâng kóng. Chèng lâng chiū chhut-lâi khòaⁿ tàu-té sī siáⁿ-mi̍h tāichì.
5:15 In lâi-kàu I-é-su hia, khòaⁿ tio̍h hit-ê hō͘ siâ-sîn hū-sin, to̍h-sī hō͘ ' Kun-thoân' só͘ tîⁿ ê lâng tī hia teh chē, saⁿ-chhēng kah hó-sè-hó-sè, lāu-sîn chāi-chāi. Kûn-chiòng chiū khí tōa kiaⁿ.
5:16 Khòaⁿ tio̍h ê lâng kā hō͘ siâ-sîn hū-sin ê lâng só͘ tú-.tio̍h ê kah kui tīn ti ê tāichì lóng kóng hō͘ chèng lâng thiaⁿ.
5:17 In chiū khún-kiû I-é-su lī-khui in ê tē-khu.
5:18 I-é-su teh beh chiūⁿ chûn ê sî, hit-ê bat hō͘ siâ-sîn hū-sin ê lâng kiû I-é-su chún i chò-hóe khì.
5:19 I-é-su m̄-chún, kā i kóng, " Tńg-khì lí ê chhù chhōe lí ê chhin-lâng, kā Chú liân-bín lí, tùi lí só͘ chò hiah tōa ê tāichì lóng pò in chai. "
5:20 Hitê lâng chiū khì, tī Te-ka-po͘-lī soan-iông I-é-su tùi i só͘ chò ê tōa tāichì. Chèng lâng lóng hui-siông tio̍h-kiaⁿ.
5:21 I-é-su I-hó Nn̄g-ê Lâng
( Mt 9: 18-26; Lk 8: 40-56)
I-é-su koh chē chûn kòe-khì hit pêng hōaⁿ. Kui tōa-tīn ê lâng chū-chi̍p óa-lâi tī ô͘-piⁿ ê I-é-su hia.
5:22 Ū chi̍t-ê hōe-tn̂g ê chú-koán miâ kiò-chò Ia-lo̍h ê lâng lâi, i chi̍t-ē khòaⁿ tio̍h I-é-su, chiū phak tī I ê kha chêng,
5:23 Pek-chhiat khún-kiû kóng, " Góa sè-hàn ê chabó͘ kiáⁿ teh beh sí à. Kiû Lí lâi kā i hōaⁿ-chhiú, hō͘ i tit tio̍h i hó, ē-tàng koh-oa̍h khí-.lâi. "
5:24 I-é-su kah i khì. Kui tōa-tīn ê lâng mā e-e-kheh-kheh tòe I khì.
5:25 Ū chi̍t-ê hū-jîn-lâng hoān tio̍h hiat-lāu-pēⁿ cha̍p-jī nî à.
5:26 I ū chhōe-kòe chin chē i-seng tī-liâu, mā siū tio̍h chin chē thòng-khó͘, koh kā i só͘-ū ê chîⁿ khai liáu-liáu, m̄ koh, lóng bô chi̍t-si-á hāu-kó, tian-tò ná siong-tiōng.
5:27 I thiaⁿ tio̍h I-é-su ê tāichì, chiū kheh ji̍p-khì kûn-chiòng lāi-bīn, óa-khì I-é-su ê āu-piah lâi bong I ê saⁿ,
5:28 In-ūi i siūⁿ kóng, góa kantaⁿ bong I ê saⁿ, pēⁿ chiū ē hó-.khì.
5:29 I chi̍t ē bong tio̍h I-é-su ê saⁿ, hiat-lāu sûi-sî thêng-chí, mā kám-kak kakī ê pēⁿ-thiàⁿ í-keng hó khì à.
5:30 I-é-su sûi-sî hoat-kak ū koân-lêng tùi I hoat-chhut, chiū oa̍t tńg-sin mn̄g kûn-chiòng kóng, " Siáⁿ lâng bong góa ê saⁿ? "
5:31 Bûn-tô͘ kā I kóng, " Lí khòaⁿ, kui tīn lâng teh kā Lí e-kheh, ná ē mn̄g kóng, siáⁿ lâng ū bong góa? "
5:32 I-é-su sì-kho͘ liàn-tńg khòaⁿ chi̍t ē, ài beh chhōe chò chit-ê tāichì ê hū-jîn-lâng.
5:33 Hitê hū-jîn-lâng chai-iáⁿ kakī sin chiūⁿ só͘ hoat-seng ê tāichì, kiaⁿ kah phi̍h-phi̍h chhoah, chiū lâi phak tòa I-é-su ê kha chêng, só͘-ū ê lóng chiàu-si̍t kā I kóng.
5:34 I-é-su kā i kóng, " Hū-jîn lâng, lí ê sìn-sim í-keng hō͘ lí ê pēⁿ tit tio̍h i hó. Lí thang pêng-an tńg-.khì, lí ê pēⁿ oân-choân hó-.khì à. "
5:35 I-é-su iáu teh kóng ê sî, ū lâng tùi hōe-tn̂g chú-koán ê chhù lâi kā Ia-lo̍h kóng, " Lí ê chabó͘ kiáⁿ í-keng sí-.khì à, ná tio̍h koh lô-hoân lāu-su? "
5:36 I-é-su bô-koán in só͘ kóng ê ōe, kā hōe-tn̂g ê chú-koán kóng, " M̄-bián kiaⁿ, chí ū tio̍h sìn. "
5:37 I-é-su chiū chhōa Piat-tò͘, Iâ-kop kah Iâ-kop ê hiaⁿ-tī Iô-há-neh chò-hóe khì, m̄-chún pa̍t lâng tòe khì.
5:38 In lâi-kàu hōe-tn̂g chú-koán ê chhù, I-é-su khòaⁿ tio̍h tiûⁿ-bīn lōng-lōng-kún, mā ū lâng teh thî-khàu tōa-siaⁿ háu.
5:39 I-é-su ji̍p-.khì, chiū kā in kóng, " Lín ná ē hōa-hōa háu teh thî-khàu? Chit-ê gín'á bô sí, sī teh khùn niā-niā. "
5:40 Chèng lâng chiū kā I thí-chhiò. M̄ koh, I-é-su kā kûn-chiòng kóaⁿ chhut-.khì, chiū chhōa gín'á ê pē-bú í-ki̍p kah I lâi ê bûn-tô͘ ji̍p-khì gín'á ê pâng-keng.
5:41 I-é-su chiū khan gín'á ê chhiú kā i kóng, " Tāi-lī-tāi-kó͘-bí. " Ì-sù to̍h-sī kóng, " Cha-bó͘ gín'á, góa bēng-lēng lí, khí-.lâi! "
5:42 Cha-bó͘ gín'á sûi-sî khí-lâi kiâⁿ, in-ūi i í-keng cha̍p-jī hòe à. Chèng lâng chiū tio̍h-kiaⁿ kah gāng-.khì.
5:43 I-é-su giâm-giâm kéng-kài in m̄ thang hō͘ lâng chai chit-ê tāichì. I chiū hoan-hù, tio̍h hō͘ chabó͘ gín'á chia̍h-mi̍h-kiāⁿ.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。