马可福音 四福音合参 线上收听:中文和合本 现代中文译本修订版 现代台语 台语圣经 台语(长老会传播中心授权） 客语 现代客语 福州话 粤语和合本 希腊文(WH-NT) 下载档案 关于语音圣经
4:1 Iā chéng-chí ê Phì-jū
( Mt 13:1-9; Lk 8:4-8)
I-é-su koh chi̍t pái tī Ga-lí-la-iah ô͘-piⁿ kà-sī lâng. Ū chi̍t-tōa-tīn lâng chū-chi̍p óa-.lâi, I soah tio̍h chiūⁿ chûn khì chē tòa phû tī chúi-bīn ê chûn téng. Kûn-chiòng lóng óa-lâi khiā tī ô͘ ê hōaⁿ-piⁿ.
4:2 I-é-su ēng phì-jū kà-sī in chin chē hāng sū. I kà-sī in kóng,
4:3 " Tio̍h chù-ì thiaⁿ! Ū chi̍t-ê choh-sit lâng chhut-khì iā chéng-chí.
4:4 I iā ê sî, ū ê ka-la̍uh tī lō͘ piⁿ. Chiáu-á poe-.lâi, chiū kā chéng-chí chia̍h liáu-liáu.
4:5 Ū ê ka-la̍uh tī chio̍h-thâu-á tē, thô͘-bah chhián ê só͘-chāi, in-ūi thô͘-bah bô chhim, chin kín chiū hoat-gê.
4:6 M̄ koh, ji̍t-thâu chi̍t-ē chhut chiū pha̍k tio̍h, in-ūi bô kin chiū ta-.khì.
4:7 Ū ê ka-la̍uh tī chhì-á lāi, chhì-á chi̍t ē tōa châng chiū kā chéng-chí hip-sí, só͘-í, bô kiat kóe-chí.
4:8 Ū ê ka-la̍uh tī hó ê thó͘-tē, chiū hoat-gê tōa châng khí-.lâi, kiat-si̍t. Ū ê kiat si̍t saⁿ-cha̍p pōe, ū ê la̍k-cha̍p pōe, ū ê chi̍t-pah pōe. "
4:9 I-é-su koh kóng, " Ū hīⁿ-khang thang thiaⁿ ê lâng tio̍h thiaⁿ! "
4:10 Phì-jū ê Bo̍k-tek
( Mt 13: 10-17; Lk 8: 9-10)
I-é-su tan-to̍k tī hia ê sî, kûn-chiòng kah cha̍p-jī sù-tô͘ óa-lâi mn̄g I chiahê phì-jū ê ì-sù.
4:11 I-é-su chiū kā in kóng, " Siōng-tè kok-tō͘ ê ò-pì í-keng hō͘ lín chai, m̄ koh, tùi hiahê it-poaⁿ lâng, ta̍k hāng lóng tio̍h ēng phì-jū lâi kā in kóng.
4:12 In khòaⁿ ū teh khòaⁿ, mā lóng bē bêng-pe̍k; in thiaⁿ ū teh thiaⁿ, mā lóng bē liáu-kái. (chù, ISI 6:9) In nā tùi phì-jū lâi bêng-pe̍k liáu-kái, chiū ē hôe-sim choán-ì kui-ǹg Siōng-tè, in ê chōe chiū ē tit tio̍h sià-bián. "
4:13 Kái-soeh Iā Chéng-chí ê Phì-jū
( Mt 13: 18-23; Lk 8: 11-15)
I-é-su koh mn̄g in kóng, " Lín liân chit-ê phì-jū to bē liáu-kái, sī-.bô? Án-ne ná ē chai kî-tha ê phì-jū?
4:14 Iā chéng-chí ê lâng sī teh soan-iông Siōng-tè ê hok-im.
4:15 Iā tī lō͘ piⁿ ê, sī chí lâng thiaⁿ tio̍h hok-im liáu-āu, Sa-tán sûi-sî lâi kā só͘ iā tī in sim-lāi ê hok-im chhiúⁿ-.khì.
4:16 Iā tī chio̍h-thâu-á tē ê, sī chí in thiaⁿ tio̍h hok-im chiū sûi-sî hoaⁿ-hí lâi chiap-siū,
4:17 M̄ koh, hok-im tī in ê sim-lāi bô tèng-kin, put-kò sī chiām-sî niā-niā. Nā ūi tio̍h hok-im tú tio̍h hoān-lān á-.sī pek-hāi, ē sûi-sî pàng-sak.
4:18 Iā tī chhì-á lāi ê sī chí lâng thiaⁿ tio̍h hok-im liáu-āu,
4:19 Soah in-ūi ū sè-kan ê khòa-lū, chîⁿ-châi ê bê-he̍k kah kî-tha ta̍k chióng ê su-io̍k ji̍p-khì sim-lāi, kā hok-im jia-khàm teh, soah lóng bē kiat-si̍t.
4:20 Hiahê iā tī hó thó͘-tē ê, sī chí lâng thiaⁿ tio̍h hok-im ū chiap-siū chiū kiat-si̍t, ū ê saⁿ-cha̍p pōe, ū ê la̍k-cha̍p pōe, ū ê chi̍t-pah pōe. "
4:21 Teng kah Niû-khì ê Phì-jū
( Lk 8: 16-18)
I-é-su koh kā in kóng, " Kám ū lâng gia̍h teng lâi hē tī bí-táu ē bīn á-.sī bîn-chhn̂g kha? Kám m̄-sī ē chhāi tī teng-tâi téng?
4:22 In-ūi ún-ba̍t ê bô chi̍t hāng bē hián-chhut, am-khàm ê bô chi̍t hāng bē lō͘-hiān.
4:23 Ū hīⁿ-khang thang thiaⁿ ê lâng tio̍h thiaⁿ! "
4:24 I-é-su koh kā in kóng, " Tio̍h chù-ì lín só͘ thiaⁿ ê. Lín ēng siáⁿ-mi̍h niû-khì lâi niû hō͘ lâng, Siōng-tè mā beh ēng kāng-khoán ê niû-khì niû hō͘ lín, sīm-chì ē koh khah ke-thiⁿ hō͘ lín.
4:25 Tùi ū ēng un-sù ho̍k-sāi Chú ê lâng, Siōng-tè ē siúⁿ-sù koh khah chē hō͘ i; tùi bô ēng un-sù ho̍k-sāi Chú ê lâng, liân i só͘-ū ê chi̍t-sut-á un-sù mā beh kā i chhiúⁿ-.khì. "
4:26 Chéng-chí sêng-tióng ê Phì-jū
I-é-su Koh kóng, " Siōng-tè kok-tō͘ chhin-chhiūⁿ lâng iā chéng-chí tòa i ê thó͘-tē.
4:27 I àm-sî khì khùn, ji̍t-sî khí-.lâi, hit-ê chéng-chí hoat-gê koh chiām-chiām tōa châng, i m̄-chai án-chóaⁿ ē ánne.
4:28 Thó͘-tē chū-jiân seng-sán ngó͘-kok; khí-thâu sī ng-á puh-gê, āu-lâi thò͘ sūi, chòe-āu chiū pá-sūi kiat-chiâⁿ ngó͘-kok.
4:29 Ngó͘-kok se̍k ê sî, chiū ēng liâm-le̍k'á siu-koah, in-ūi siu-koah ê sî-kî kàu à. "
4:30 Kòa-chhài-chí ê Phì-jū
( Mt 13: 31-32, 34; Lk 13: 18-19)
I-é-su iū-koh kóng, " Siōng-tè kok-tō͘ lán beh án-chóaⁿ lâi hêng-iông? Tio̍h ēng siáⁿ-mi̍h phì-jū lâi soat-bêng?
4:31 Siōng-tè kok-tō͘ chhin-chhiūⁿ chi̍t lia̍p kòa-chhài-chí, sûi-jiân sī tē-chiūⁿ chéng-chí tiong-kan siōng sè lia̍p ê,
4:32 M̄ koh, iā lo̍h-tē liáu-āu, chiū chiām-chiām tōa châng khí-.lâi, pí só͘-ū ê chhài-se khah tōa châng, koh hoat-chhut tōa ki chhiū-oe, khong-tiong ê chiáu to ē-tàng tī chhiū-ńg-ē chò siū. "
4:33 I-é-su Sú-iōng Phì-jū
( Mt 13: 34-35)
I-é-su ēng chin chē chhin-chhiūⁿ chit khoán ê phì-jū tùi kûn-chiòng thoân hok-im, I lóng ēng in ē-tàng liáu-kái ê phì-jū.
4:34 Sū-si̍t siōng, I ta̍k pái lóng ēng phì-jū tùi in kóng; m̄ koh, kantaⁿ kah bûn-tô͘ chò-hóe ê sî, chiah ta̍k hāng siông-sè kā in soat-bêng.
4:35 I-é-su Pêng-chēng Hong-éng
( Mt 8:23-27; Lk 8:22-25)
Hit ji̍t ê àm-thâu-á, I-é-su kā bûn-tô͘ kóng, " Lán kòe lâi-khì hit pêng hōaⁿ. "
4:36 In lī-khui kûn-chiòng chiūⁿ chûn kah tī chûn téng ê I-é-su chò-hóe khì. Iáu ū pa̍t chiah chûn mā chò-hóe khì.
4:37 Hut-jiân-kan khí tōa hong, chúi-éng phoah ji̍p-lâi chûn-.ni̍h, tì-sú chúi teh beh móa chûn.
4:38 M̄ koh, I-é-su tī chûn-bóe tó tī chím-thâu teh khùn. Bûn-tô͘ kā I kiò-chhéⁿ, kóng, " Lāu-su, goán teh beh bô miā lò͘, Lí kám bô teh iàu-kín? "
4:39 I-é-su chiū chhéⁿ khí-.lâi, chek-pī hong, koh bēng-lēng chúi-éng kóng, " Chēng lo̍h-.lâi! " Hong chiū thêng, chúi-éng mā tiāⁿ lo̍h-.lâi.
4:40 I-é-su chiū kā in kóng, " Lín ná ē hiah kiaⁿ? Lín iáu bô sìn sim, sī-.bô? "
4:41 In chiū tōa kiaⁿ, hō͘-siong kóng-lâi kóng-khì, kóng, " Chit-ê sī siáⁿ lâng? Liân hong kah chúi-éng to lóng sūn-ho̍k I! "
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。