马可福音 四福音合参 线上收听:中文和合本 现代中文译本修订版 现代台语 台语圣经 台语(长老会传播中心授权） 客语 现代客语 福州话 粤语和合本 希腊文(WH-NT) 下载档案 关于语音圣经
1:1 Hok-im ê Khai-Sí
Siōng-tè ê Kiáⁿ I-é-su Ki-tok ê hok-im sī ánne khai-sí.
1:2 I-sá-iah sian-ti ê chheh ū kì-chài, góa chhe góa ê sù-chiá tòa lí ê thâu-chêng, chò lí ê khai-lō͘ sian-hong.
1:3 Ū siaⁿ tī khòng-iá teh hoah, Tio̍h ūi Chú chún-pī tō-lō͘, siu-ti̍t I beh kiâⁿ ê sió-lō͘. (chù, ISI 40:3; MLK 3:1; CAG 23:20)
1:4 Kiâⁿ Sé-lé Iô-há-neh ê Thoân-tō
( Mt 3: 1-12; Lk 3: 1-9, 15-17; Ih 1: 19-28)
Iô-há-neh kó-jiân tī khòng-iá chhut-hiān, kā lâng sé-lé, soan-iông kóng, " Tio̍h hóe-kái lâi niá siū sé-lé, Siōng-tè chiū ē sià-bián lâng ê chōe. "
1:5 Iô-tá-iah tē-khu kah Ê-lú-sa-lèm ê bîn-chiòng lóng khì Iô-há-neh hia, kò-pe̍k kakī ê chōe. Iô-há-neh chiū tī Iol-tàn hô kā in sé-lé.
1:6 Chit-ê Iô-há-neh sin chhēng lo̍k-tô-mn̂g ê saⁿ, io hâ phôe-tòa, chia̍h chháu-meh kah iá-bi̍t.
1:7 I soan-káng kóng, " Ū chi̍t-ê pí góa khah ū koân-lêng ê tòe góa ê āu-bīn lâi. Góa liân khut lo̍h-lâi tháu I ê ê-tòa to bē kham-tit.
1:8 Góa ēng chúi kā lín sé-lé, I beh ēng Sèng Sîn kā lín sé-lé. "
1:9 I-é-su Siū Sé-lé
( Mt 3: 13-17; Lk 3: 21-22)
Kòe bô kúi ji̍t, I-é-su tùi Ga-lí-la-iah séng ê Na-cha-lia̍t lâi, tī Iol-tàn hô tùi Iô-há-neh niá siū sé-lé.
1:10 I-é-su chi̍t ē tùi chúi-.ni̍h khí-.lâi, chiū khòaⁿ tio̍h thiⁿ li̍h-.khui, Sèng Sîn chhin-chhiūⁿ hún-chiáu kàng-lîm tī I ê seng-khu téng-bīn.
1:11 Koh tùi thiⁿ ū siaⁿ kóng, " Lí sī góa só͘ thiàⁿ ê Kiáⁿ, góa chin kah-ì Lí. "
1:12 I-é-su Siū Chhì-thàm
( Mt 4: 1-11; Lk 4: 1-13)
Sèng Sîn sûi-sî chhui-pek I-é-su khì khòng-iá.
1:13 I tī khòng-iá sì-cha̍p kang, siū Sa-tán ê chhì-thàm, mā kah iá-siù tòa chò-hóe, ū thiⁿ-sài teh kā I sū-hāu.
1:14 I-é-su Tī Ga-lí-la-iah Séng Khai-sí Kang-chok
( Mt 4: 12-17; Lk 4: 14-15)
Iô-há-neh hông lia̍h-khì koaiⁿ-kaⁿ liáu-āu, I-é-su khì Ga-lí-la-iah séng soan-iông Siōng-tè ê hok-im,
1:15 Kóng, " Sî-kî í-keng kàu à, Siōng-tè kok-tō͘ teh beh lâi-lîm ā. Lín tio̍h hóe-kái lâi sìn hok-im. "
1:16 I-é-su Ho͘-tiàu Sì-ê Lia̍h-hî-Lâng
( Mt 4: 18-22; Lk 5: 1-11)
I-é-su keng-kòe Ga-lí-la-iah ô͘-piⁿ ê sî, khòaⁿ tio̍h Sí-mòng kah i ê hiaⁿ-tī An-to-le̍h tī ô͘-.ni̍h teh pha bāng, in sī lia̍h-hî lâng.
1:17 I-é-su kā in kóng, " Lâi tòe góa, góa beh hō͘ lín tit tio̍h lâng chhin-chhiūⁿ lia̍h-hî lâng tit tio̍h hî. "
1:18 In sûi-sî pàng-lo̍h hî-bāng khì tòe I-é-su.
1:19 Koh lio̍h-á kiâⁿ chìn-chêng, I-é-su khòaⁿ tio̍h Che-beh-tái ê kiáⁿ Iâ-kop kah i ê hiaⁿ-tī Iô-há-neh tī chûn téng teh pó͘ hî-bāng.
1:20 I-é-su sûi-sî ho͘-tiàu in. In chiū kah in lāu-pē Che-beh-tái kah chhiàⁿ-kang sio-sî lâi tòe I-é-su khì.
1:21 I-é-su I-hó Siâ-sîn Hū-sin ê Lâng
( Lk 4: 31-37)
I-é-su kah bûn-tô͘ lâi-kàu Ka-peh-ná-um. An-hioh-ji̍t chi̍t-ē kàu, I chiū ji̍p-khì hōe-tn̂g kà-sī lâng.
1:22 Thiaⁿ tio̍h I-é-su kà-sī ê lâng lóng kám-kak chin kî-biāu, in-ūi I ê kà-sī chin ū koân-ui, bô chhin-chhiūⁿ hiahê keng-ha̍k kàu-su.
1:23 Hit sî, hōe-tn̂g lāi ū chi̍t-ê hō͘ siâ-sîn hū-sin ê lâng tōa-siaⁿ hoah,
1:24 " Na-cha-lia̍t lâng I-é-su, Lí hô-pit tio̍h lâi kan-sia̍p goán? Lí beh lâi húi-bia̍t goán, sī-.bô? Góa chai Lí sī siáⁿ lâng, Lí sī Siōng-tè ê sèng ê. "
1:25 I-é-su chek-pī siâ-sîn kóng, " Tiām-khì! Tùi chit-ê lâng chhut-.khì! "
1:26 Siâ-sîn hō͘ hit-ê lâng thiu-chhoah liáu-āu, tōa-siaⁿ hoah chi̍t-siaⁿ, chiū tùi hit-ê lâng chhut-.khì.
1:27 Chèng lâng lóng tio̍h-kiaⁿ kah gāng-.khì, chiū gī-lūn hun-hun, kóng, " Che sī án-chóaⁿ? Kám sī sin ê kà-sī? I ēng koân-lêng bēng-lēng siâ-sîn, liân siâ-sîn to khut-ho̍k. "
1:28 I-é-su ê miâ-siaⁿ sûi-sî thoân kàu Ga-lí-la-iah séng ê ta̍k só͘-chāi.
1:29 I-é-su I-hó Chin Chē Lâng
( Mt 8: 14-17; Lk 4: 38-41)
I-é-su chi̍t-ē kiâⁿ-chhut hōe-tn̂g, sûi-sî chhōa Iâ-kop kah Iô-há-neh ji̍p-khì Sí-mòng kah An-to-le̍h ê chhù.
1:30 Sí-mòng ê tiūⁿ-ḿ tú-teh hoat-sio, tó tī bîn-chhn̂g. In sûi-sî kā i ê chêng-hóng kā I-é-su kóng.
1:31 I-é-su óa khì khan i ê chhiú, kā i hû khí-.lâi, i ê jia̍t chiū thè. Chit-ê hū-jîn-lâng chiū chiap-thāi in.
1:32 Kàu hông-hun ji̍t-thâu lo̍h soaⁿ liáu-āu, chèng lâng chiū chhōa phòa-pēⁿ ê kah hō͘ siâ-sîn hū-sin ê lâng lâi I-é-su hia.
1:33 Choân-siâⁿ ê lâng lóng chū-chi̍p tī mn̂g-kháu.
1:34 I-é-su i hó ta̍k chióng ê pēⁿ-lâng, koh kóaⁿ chin-chē kúi. I-é-su m̄-chún siâ-sîn kóng-ōe, in-ūi in chai I sī siáⁿ lâng.
1:35 I-é-su tī Ga-lí-la-iah Séng Thoân-tō
( Lk 4: 42-44)
Keh-tńg chá-khí thiⁿ iáu-bōe kng, I-é-su chiū khí-.lâi, chhut-khì khòng-iá ê só͘-chāi, tī hia kî-tó.
1:36 Sí-mòng kah tâng-phōaⁿ chhut-khì chhōe I.
1:37 Chhōe tio̍h liáu-āu chiū kā I kóng, " Chèng lâng lóng teh chhōe Lí. "
1:38 I-é-su ìn kóng, " Lán kè-sio̍k lâi-khì hù-kīn ê chng-thâu, hō͘ góa thang tī hia thoân hok-im; in-ūi che sī góa chhut-.lâi ê sù-bēng. "
1:39 I-é-su chiū khì hóng-būn Ga-lí-la-iah séng ê ta̍k só͘-chāi, ji̍p-khì in ê hōe-tn̂g thoân-tō koh kóaⁿ kúi.
1:40 I-é-su I-hó Thái-ko Pēⁿ-Lâng
( Mt 8: 1-4; Lk 5: 12-16)
Ū chi̍t-ê thái-ko ê pēⁿ-lâng lâi-kàu I-é-su ê bīn-chêng, kūi lo̍h-khì kā I kiû, kóng, " Lí nā khéng, chiū ē-tàng hō͘ góa chheng-khì. "
1:41 I-é-su móa-sim liân-bín, chhun chhiú kā i bong, kóng, " Góa khéng, lí thang chheng-khì. "
1:42 Hitê lâng ê thái-ko sûi-sî tû-.khì, i chiū chheng-khì.
1:43 I-é-su sûi-sî kiò i lī-khui, giâm-giâm kā i kéng-kài kóng,
1:44 " Lí tio̍h kín-sīn, choa̍t-tùi m̄ thang kā lâng kóng siáⁿ-mi̍h; to̍k-to̍k lí tio̍h khì hō͘ chè-si giām lí ê seng-khu, mā ài ūi tio̍h lí tit tio̍h chheng-khì khì hiàn Mô͘-se só͘ hoan-hù ê chè, lâi tùi chèng lâng chèng-bêng lí í-keng chheng-khì à. "
1:45 Chóng-.sī, hit-ê lâng chi̍t-ē chhut-.khì, chiū sì-kè soan-iông chit-ê siau-sit, tì-sú I-é-su bô hoat-tō͘ koh kong-jiân ji̍p siâⁿ, soah tio̍h tòa tī gōa-bīn khòng-iá ê só͘-chāi. Chèng lâng iû-goân tùi ta̍k só͘-chāi lâi chhōe I-é-su.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。