马太福音 四福音合参 线上收听:中文和合本 现代中文译本修订版 现代台语 台语圣经 台语(长老会传播中心授权） 客语 现代客语 粤语和合本 希腊文(WH-NT) 下载档案 关于语音圣经
19:1 Koan-hē Lî-hun ê Kà-sī
( Mk 10: 1-12)
I-é-su kóng chiahê ōe liáu-āu, chiū lī-khui Ga-lí-la-iah séng khì Iol-tàn hô tùi-hōaⁿ ê Iô-tá-iah tē.
19:2 Ū chin tōa-tīn ê lâng tòe I khì, I chiū tī hia kā in ê pēⁿ i hó.
19:3 Ū chi̍t-kóa Hoa-lí-sái phài ê lâng lâi chhì-thàm I-é-su, kóng, " Lâng bô-lūn siáⁿ-mi̍h lí-iû lóng thang lî i ê bó͘, tio̍h bô? "
19:4 I-é-su ìn kóng, " Lín kám bô tha̍k tio̍h chhòng-chō ê Chú, goân-khí-thâu chhòng-chō lâng ū lâm ū lí? (chù, CSK 1:27; 5:2)
19:5 Koh kóng, in-ūi ánne, lâng beh lī-khui pē-bú kah i ê bó͘ kiat-liân, nn̄g-ê beh chiâⁿ-chò chi̍t thé. (chù, CSK 2:24)
19:6 Án-ne khòaⁿ khí-.lâi, hu-hū bô koh chò nn̄g-ê, sī chò chi̍t thé, só͘-í, Siōng-tè só͘ phòe-ha̍p ê, lâng m̄ thang kā in thiah-khui. "
19:7 Hoa-lí-sái phài ê lâng koh mn̄g kóng, " Nā-sī ánne, Mô͘-se án-chóaⁿ ē hoan-hù lâng ēng lî-hun-su hō͘ i, chiū thang kā i lī? "
19:8 I-é-su ìn kóng, " Mô͘-se In-ūi lín ê sim ngē, chún lín lî bó͘, m̄ koh, Siōng-tè tī chhòng-sè ê goân-khí-thâu m̄-sī ánne.
19:9 Góa kā lín kóng, nā m̄-sī ūi tio̍h bó͘ hoān kan-îm ê iân-kò͘, kā bó͘ lî tiāu-lâi chhōa pa̍t-ê bó͘, to̍h-sī hoān kan-îm. Chhōa chit-ê hông lî ê bó͘ ê lâng mā sī hoān kan-îm. "
19:10 Bûn-tô͘ kā I kóng, " Lâng ê ang-bó͘ koan-hē Nā-sī ánne, lêng-khó mài kiat-hun khah hó. "
19:11 I-é-su kā in kóng, " Chit-ê ōe m̄-sī ta̍k lâng lóng ē-tàng chiap-siū. Kan-taⁿ ū chit khoán un-sù ê lâng chiah ē.
19:12 In-ūi ū lâng chhut-sì to̍h bô sek-ha̍p kiat-hun, mā ū jîn-ûi ê iân-kò͘, mā ū ūi tio̍h thian-kok ê iân-kò͘. Ē-tàng chiap-siū ê lâng chiah hó ánne chò. "
19:13 I-é-su Chiok-hok Sè-hàn Gín-á
( Mk 10: 13-16; Lk 18, 15-17)
Ū lâng chhōa sè-hàn gín'á lâi I-é-su hia, ài I kā in hōaⁿ chhiú lâi kî-tó. Bûn-tô͘ chek-pī hiahê lâng.
19:14 M̄ koh, I-é-su kóng, " Tio̍h hō͘ sè-hàn gín'á lâi góa chia, m̄ thang kā in chó͘-tòng, in-ūi chhin-chhiūⁿ chiahê gín'á ê lâng chiah ē-tàng chiâⁿ-chò thian-kok ê chú-bîn. "
19:15 I-é-su kā in hōaⁿ chhiú liáu-āu, chiū lī-khui hia.
19:16 Hó-gia̍h ê Siàu-liân Lâng ê Gî-būn
( Mk 10: 17-31; Lk 18: 18-30)
Ū chi̍t-ê hó-gia̍h ê siàu-liân lâng lâi mn̄g I-é-su kóng, " Lāu-su, góa tio̍h chò siáⁿ-mi̍h hó sū chiah ē-tàng tit tio̍h éng-oán ê oa̍h-miā? "
19:17 I-é-su ìn kóng, " Lí ná ē mn̄g góa siáⁿ-mi̍h sī hó sū? Oân-choân koh hó ê chí ū chi̍t ūi, chóng-.sī, lí nā ài chìn-ji̍p éng-oán ê oa̍h-miā, tio̍h chun-siú chiahê kài-bēng. "
19:18 Hitê lâng mn̄g I-é-su kóng, " Sī siáⁿ-mi̍h kài-bēng? " I-é-su ìn kóng, " M̄-thang thâi-sí-lâng, m̄ thang kiâⁿ kan-îm, m̄ thang thau-the̍h, m̄ thang lāmsám chò kiàn-chèng,
19:19 Tio̍h hàu-kèng pē-bú, (chù, CAG 20:12-16; SBK 5:16-20) tio̍h thiàⁿ chhù-piⁿ chhin-chhiūⁿ kakī. "( Chù, LBK 19:18)
19:20 Siàu-liân lâng kóng, " Chiahê góa lóng ū teh chun-siú. Taⁿ iáu koh khiàm siáⁿ-mi̍h? "
19:21 I-é-su kā i kóng, " Lí nā ài beh chò oân-choân ê lâng, tio̍h khì bē lí só͘-ū ê châi-sán lâi pun hō͘ sànchhiah lâng, ánne, lí tī thiⁿ-téng chiū ū châi-pó, jiân-āu chiah lâi tòe góa. "
19:22 Siàu-liân lâng thiaⁿ tio̍h chiahê ōe chiū iu-iu chhiû-chhiû lī-khui, in-ūi i ū chin chē sán-gia̍p.
19:23 Pàng-sak Sè-kan mi̍h ê Kà-sī
I-é-su chiū kā bûn-tô͘ kóng, " Góa si̍t-chāi kā lín kóng, hó-gia̍h lâng beh chìn-ji̍p thian-kok si̍t-chāi chin khùn-lān!
19:24 Góa koh kā lín kóng, lo̍k-tô chhng-kòe chiam-phīⁿ mā pí hó-gia̍h lâng ji̍p thian-kok khah kán-tan. "
19:25 Bûn-tô͘ thiaⁿ-liáu tōa tio̍h-kiaⁿ, kóng, " Nā-sī ánne, siáⁿ lâng chiah ē-tàng tit-kiù? "
19:26 I-é-su lia̍h in kim-kim khòaⁿ, kóng, " Lâng chò bē kàu ê tāichì, Siōng-tè bān sū lóng ū hoat-tō͘. "
19:27 Piat-tò͘ chiū mn̄g I-é-su kóng, " Goán í-keng pàng-sak it-chhè lâi tòe Lí, ánne goán ē tit tio̍h siáⁿ-mi̍h? "
19:28 I-é-su kā in kóng, " Góa si̍t-chāi kā lín kóng, chiong-lâi sin sè-kài lâi-lîm ê sî, Jîn-chú chē tī I êng-kng ê pó-chō, lín chiahê tòe góa ê lâng mā ē chē tī cha̍p-jī-ê pó-chō, lâi sím-phòaⁿ I-su-la-el cha̍p-jī-ê chi-cho̍k.
19:29 Ūi tio̍h Góa ê miâ lâi pàng-sak chhù-the̍h á-.sī hiaⁿ-tī, chí-mōe, lāu-pē, lāu-bú, kiáⁿ-jî á-.sī chhân-hn̂g ê lâng, lóng ē tit tio̍h pah pōe ê pò-siúⁿ, koh sêng-chiap éng-oán ê oa̍h-miā.
19:30 Chóng-.sī, chitmá chò tāi-seng ê lâng, chin chē ē piàn-chò lō͘-bóe; chitmá chò lō͘-bóe ê lâng, ē piàn-chò tāi-seng. "
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。