玛拉基书 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
2:1 Lín chiahê chè-si, chit-ê bēng-lēng sī hō͘ lín ê.
2:2 Bān-kun ê Siōng-chú kóng, " Lín nā m̄-thiaⁿ, m̄ hē tī sim-.ni̍h, lâi kui êng-kng hō͘ Góa ê miâ, Góa chiū beh hō͘ chiù-chó͘ lîm-kàu tī lín, hō͘ lín ê hok-khì piàn-chò chiù-chó͘; Góa í-keng chiù-chó͘, in-ūi lín bô kā chit-ê bēng-lēng hē tī sim-.ni̍h.
2:3 Lí khòaⁿ, Góa beh ūi tio̍h lín lâi phah-pháiⁿ chéng-chí, koh ēng pùn kô͘ lín ê bīn, to̍h-sī lín ê seng-lé ê pùn, lín ē kah i chò-hóe siū tû-.khì.
2:4 Lín chiū ē chai Góa ēng chit-ê bēng-lēng hō͘ lín, thang chò Góa kah Lē-bī só͘ li̍p ê iok. Che sī bān-kun ê Siōng-chú kóng ê.
2:5 " Góa kah i só͘ li̍p ê sī oa̍h-miā kah pêng-an ê iok. Góa kā che hō͘ i, hō͘ i kiaⁿ-ùi, i chiū kiaⁿ-ùi Góa, kèng-ùi Góa ê miâ.
2:6 Chin-lí ê lu̍t-hoat tī I ê chhùi lāi, tī I ê chhùi-tûn chhōe bô put-gī, I ēng pêng-an, chèng-ti̍t kah Góa tâng kiâⁿ, hō͘ chin chē lâng oa̍t tńg-lâi lī-khui pháiⁿ.
2:7 In-ūi chè-si ê chhùi-tûn tio̍h chûn tì-sek, lâng tio̍h tùi i ê chhùi chhéng-kàu lu̍t-hoat, in-ūi i sī bān-kun ê Siōng-chú ê sù-chiá.
2:8 " Chóng-.sī, lín ū lī-khui hit tiâu lō͘, hō͘ chin chē lâng tī lu̍t-hoat poa̍h-tó; lín pāi-hoāi Lē-bī ê iok. Che sī bān-kun ê Siōng-chú kóng ê.
2:9 Só͘-í, Góa hō͘ lín hō͘ kûn-chiòng khòaⁿ-khin, khòaⁿ-chò hā-chiān; in-ūi lín bô chun-siú Góa ê tō-lō͘, tī lu̍t-hoat ēng phian-su khoán-thāi lâng. "
2:10 Jîn-bîn Tùi Siōng-tè Bô Tiong-si̍t
Lán kám m̄-sī kâng chi̍t-ê pē? Kám m̄-sī kāng chi̍t-ūi Siōng-tè chhòng-chō lán? Lán ta̍k lâng ná ē ēng kúi-chà khoán-thāi hiaⁿ-tī, lâi pāi-hoāi chó͘-sian ê iok?
2:11 Iô-tah kiâⁿ kúi-chà, koh tī I-su-la-el kah Ê-lú-sa-lèm ê tiong-kan kiâⁿ khó-ò͘ⁿ ê tāichì; in-ūi Iô-tah siat-to̍k Siōng-chú só͘ thiàⁿ ê sèng-só͘, chhōa ho̍k-sāi gōa-pang sîn-bêng ê chabó͘ kiáⁿ chò bó͘.
2:12 Kiâⁿ chit khoán tāichì ê lâng, goān Siōng-chú tùi Iâ-kop ê pò͘-pêⁿ tiong, tû-khì i só͘-ū ê lâng, á-.sī kiò-chhéⁿ lâng ê（ Chù, chí chè-si ）, á-.sī ìn-tap lâng ê（ Chù, chí keng-ha̍k kàu-su ）, í-ki̍p hiàn lé-mi̍h hō͘ bān-kun ê Siōng-chú ê.
2:13 Lín koh ánne chò, hō͘ ba̍k-sái thî-khàu kah thó͘-khùi phiàn-móa Siōng-chú ê tôaⁿ, tì-sú I bô koh khòaⁿ-kò͘ lé-mi̍h, mā bô hoaⁿ-hí tùi lín ê chhiú chiap-la̍p.
2:14 Lín iáu koh kóng, " Che sī teh chhòng siáⁿ? " In-ūi Siōng-chú tī lí kah lí siàu-liân só͘ chhōa ê bó͘ tiong-kan chò kiàn-chèng, i sûi-jiân sī lí ê phit-phòe, koh sī lí bêng-iok ê bó͘, lí iáu koh ēng kúi-chà kā i khoán-thāi.
2:15 I ê Sèng Sîn sûi-jiân ū lêng-le̍k ke chō jîn-sò͘, kám m̄-sī kantaⁿ chō chi̍t-ê? Ná ē chí ū chō chi̍t-ê? Chiū-sī beh kiû sèng ê kiáⁿ-sun. Só͘-í, tio̍h kín-siú lín ê sim-sîn, ta̍k lâng m̄ thang ēng kúi-chà khoán-thāi siàu-liân só͘ chhōa ê bó͘.
2:16 Siōng-chú — I-su-la-el ê Siōng-tè kóng, " Lî bó͘ ê tāichì kah ēng kiông-pō khoán-thāi bó͘ ê lâng, Góa oàn-hūn i! Só͘-í, tio̍h kín-sīn siú lín ê sim-sîn, m̄ thang kiâⁿ kúi-chà. Che sī bān-kun ê Siōng-chú kóng ê."
2:17 Sím-phòaⁿ ê Ji̍t-chí teh beh Kàu
Lín ēng ōe thiau-lân Siōng-chú, lín iáu koh kóng, " Goán ēng siáⁿ-mi̍h kā I thiau-lân? " In-ūi lín kóng, " Hoān-nā chò pháiⁿ ê, Siōng-chú khòaⁿ i chò hó, koh hoaⁿ-hí i. " Á-sī in-ūi lín kóng, " Kong-gī ê Siōng-tè tī tó-ūi? "
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。