撒迦利亚书 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
9:1 Sím-phòaⁿ Keh-piah Kok
Siōng-chú be̍k-sī ê ōe lîm-kàu tī Ha-tu-lak, mā ē thêng-hioh tī Ta-má-su-ko ( in-ūi sè-kan lâng kah I-su-la-el ta̍k chi-cho̍k ê ba̍k-chiu lóng ǹg Siōng-chú ),
9:2 kah óa-kīn ê Ha-mat, í-ki̍p Tu-lô, Si-tòng, in-ūi in ū tōa tì-hūi.
9:3 In-ūi Tu-lô ūi kakī khí siâⁿ-pó, chek-chū gîn chhin-chhiūⁿ thô͘-soa hiah chē, chek-chū sûn-kim chhin-chhiūⁿ ke-lō͘ ê thô͘-môe.
9:4 Lí khòaⁿ, Chú beh kā i kóaⁿ chhut-.khì, mā beh pāi-hoāi i ê hái-koân; i ē hō͘ hóe sio bia̍t.
9:5 A-si-ke-lông ē khòaⁿ tio̍h ánne lâi kiaⁿ; Ga-jah khòaⁿ tio̍h mā ē chin kan-khó͘; Ek-lóng mā ē khòaⁿ tio̍h in-ūi sit-bōng lâi kiàn-siàu. Ga-jah it-tēng bô koh ū kun-ông, A-si-ke-lông bô koh ū lâng tòa.
9:6 Cha̍p-chéng lâng ē tòa tī A-si-to͘t; Góa beh tû-bia̍t Hui-lī-sū lâng ê kiau-ngō͘.
9:7 Góa beh tû-khì i chhùi lāi kâⁿ hoeh ê bah kah i chhùi-khí tiong khó-ò͘ⁿ ê mi̍h. I só͘ chhun lo̍h-.lâi ê lâng ē kui lán ê Siōng-tè, i tī Iô-tah ē chhin-chhiūⁿ cho̍k-tiúⁿ; Ek-lóng ē chhin-chhiūⁿ I-é-bú-suh ê lâng.
9:8 Góa beh chat iâⁿ ûi góa ê chhù, tí-tòng kun-peng, tì-sú bô lâng chhut-ji̍p, pō-gio̍k ê lâng mā bô tùi in hia keng-kòe, in-ūi góa taⁿ chhin-ba̍k khòaⁿ tio̍h i.
9:9 Bī-lâi ê Kun-ông
Si-óng ê chabó͘ kiáⁿ, lín tio̍h tōa-tōa hoaⁿ-hí; Ê-lú-sa-lèm ê chabó͘ kiáⁿ, lín tio̍h chhut hoaⁿ-hí ê siaⁿ. Lí khòaⁿ, lí ê ông lâi kìⁿ lí! I sī kong-gī koh kiâⁿ chín-kiù, un-jiû koh khiâ lî-á kah lî-á só͘ seⁿ ê lî-á-kiáⁿ.
9:10 Siōng-chú kóng: Góa beh tû-khì E-hu-laim ê chiàn-chhia kah Ê-lú-sa-lèm ê chiàn-bé, kau-chiàn ê kiong mā beh tû-.khì. I beh tùi lia̍t kok thoân hô-pêng; i ê koân-pèng ē tùi chit-ê hái kàu hit-ê hái, tùi tōa hô kàu tē-ke̍k.
9:11 Siōng-tè Chú-bîn ê Ho̍k-heng
Siōng-chú kóng: Nā-sī lí, Góa beh ēng lí ê iok ê hoeh, tháu-pàng lí hiahê siū lia̍h khì koaiⁿ ê lâng thoat-chhut bô chúi ê chéⁿ.
9:12 Lín hiahê siū lia̍h khì koaiⁿ mā ū ǹg-bāng ê lâng, tio̍h tò tńg-lâi siâⁿ-pó. Góa kin-á-ji̍t thoân-pò͘, Góa beh ka-pōe hêng lí.
9:13 Góa beh ēng Iô-tah chò Góa só͘ bán ê kiong, ēng E-hu-laim chò an-tì tī kiong ê chìⁿ. Si-óng, Góa beh kek-tōng lí ê jîn-bîn lâi kong-kek Iá-oán ê jîn-bîn, hō͘ lí chhin-chhiūⁿ ióng-sū ê to-kiàm.
9:14 Siōng-chú beh chhut-hiān tī in ê téng-bīn; I ê chìⁿ beh siā-chhut chhin-chhiūⁿ sihnà. Chì-koân Siōng-chú beh pûn sàu-kak, chē lâm-hong ê kńg-lê-á hong lâi kiâⁿ.
9:15 Bān-kun ê Siōng-chú ē pó-hō͘ in; in ē thun-bia̍t tùi-te̍k, thún-ta̍h só͘ hiat lâi ê chio̍h-thâu. In ē lim lâi hoah, chhin-chhiūⁿ teh lim chiú; in ē chhin-chhiūⁿ té-móa ê óaⁿ, chhin-chhiūⁿ tôaⁿ téng hiahê kak.
9:16 Hit ji̍t, Siōng-chú — in ê Siōng-tè ē kā in chín-kiù, chhin-chhiūⁿ I ê chú-bîn ê iûⁿ-kûn; in-ūi in ē chhin-chhiūⁿ bián-liû ê pó-chio̍h, tī I ê tē-chiūⁿ koân-koân kí-khí.
9:17 I ê jîn-chû tōa kàu án-chóaⁿ! I ê súi hó khòaⁿ kàu án-chóaⁿ! Ngó͘-kok ē hō͘ siàu-liân lâng ióng-kiāⁿ, sin chiú ē hō͘ chāi-sek-lí mā ánne.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。