撒迦利亚书 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
1:1 Siōng-chú Ho͘-tiàu I ê Chú-bîn
Ta-lió-suh jī nî peh-.goe̍h, Siōng-chú ê ōe lîm-kàu It-tó͘ ê sun — Be-lé-kiah ê kiáⁿ — sian-ti Cha-kha-lī-a, kóng:
1:2 " Siōng-chú bat tùi lín ê chó͘-sian tōa siū-khì.
1:3 Só͘-í, lí tio̍h kā in kóng, bān-kun ê Siōng-chú ánne kóng: Lín tio̍h oa̍t tńg-lâi chhōe Góa; Góa mā beh oa̍t tńg-lâi chhōe lín. Che sī bān-kun ê Siōng-chú kóng ê.
1:4 M̄-thang o̍h lín ê chó͘-sian, í-chêng ê sian-ti bat kiò in kóng, bān-kun ê Siōng-chú ánne kóng, ' Lín tio̍h hôe-thâu lī-khui lín ê pháiⁿ lō͘ kah lín ê pháiⁿ só͘ kiâⁿ. ' Chóng-.sī, in m̄ àⁿ hīⁿ-khang lâi thiaⁿ, mā m̄-thiaⁿ Góa ê ōe. Che sī Siōng-chú kóng ê.
1:5 Lín ê chó͘-sian tī tó-ūi? Hiahê sian-ti kám ē éng-oán oa̍h-.leh?
1:6 Chóng-.sī, Góa ê giân-gí, Góa ê lu̍t-lē kah Góa só͘ hoan-hù Góa chiahê lô͘-po̍k — sian-ti ê, kám bô kàu tī lín ê chó͘-sian? In chiū hôe-thâu, kóng, ' Bān-kun ê Siōng-chú àn-sǹg beh chiàu lán ê só͘ kiâⁿ, só͘ chò si-hêng tī lán, I í-keng chiàu ánne khoán-thāi lán à. '"
1:7 Bé ê Ī-siōng
Ta-lió-suh jī nî cha̍p-it-.goe̍h, to̍h-sī Se-bat goe̍h （ Chù, Iô-tá-iah lâng siū lia̍h āu Iô-tá-iah ji̍t le̍k ê tē 11-ê goe̍h-hūn, siong-tong se-le̍k ê it-goe̍h he̍k jī-goe̍h ） jī-cha̍p sì, Siōng-chú ê ōe lîm-kàu It-tó͘ ê sun — Be-lé-kiah ê kiáⁿ — sian-ti Cha-kha-lī-a, kóng,
1:8 " Góa àm-sî koan-khòaⁿ, lí khòaⁿ, ū chi̍t-ê lâng khiâ chhiah bé khiā tī kē tē kong-liam chhiū ê tiong-kan. Tī i ê āu-bīn koh ū chhiah-sek, n̂g-sek, pe̍h-sek ê bé. "
1:9 Góa mn̄g kóng, " Góa ê chú ah, che sī siáⁿ-mi̍h? " Kah góa kóng-ōe ê sù-chiá chiū kā góa kóng, " Góa ē chí-sī hō͘ lí chai chiahê sī siáⁿ-mi̍h. "
1:10 Hitê khiā tī kong-liam chhiū tiong-kan ê lâng ìn kóng, " Che sī Siōng-chú só͘ chhe-phài tī tē-chiūⁿ teh chhut-ji̍p ê. "
1:11 In chiū ìn hit-ê khiā tī kong-liam chhiū tiong ê Siōng-chú ê sù-chiá kóng, " Goán í-keng tī tē-chiūⁿ teh chhut-ji̍p, lí khòaⁿ, choân tē lóng an-jiân pêng-tiāⁿ. "
1:12 Chiū ánne, Siōng-chú ê sù-chiá ìn kóng, " Bān-kun ê Siōng-chú ah, Lí tùi Ê-lú-sa-lèm kah Iô-tah chiahê siâⁿ siū-khì í-keng chhit-cha̍p nî, Lí bô si liân-bín tio̍h kàu tang-sî? "
1:13 Siōng-chú chiū ēng hó ōe kah an-ùi ê ōe, ìn hit-ê kah góa kóng-ōe ê sù-chiá.
1:14 Kah góa kóng-ōe ê sù-chiá tùi góa kóng, " Lí tio̍h chhut siaⁿ kóng, bān-kun ê Siōng-chú ánne kóng: Ūi tio̍h Ê-lú-sa-lèm kah ūi tio̍h Si-óng, Góa jia̍t-sim kàu-ke̍k.
1:15 Góa chin siū-khì hiahê an-jiân seng-oa̍h ê lia̍t kok, in-ūi góa í-chêng chí ū sió-khóa siū-khì, in chiū ke-thiⁿ i ê kan-khó͘.
1:16 Só͘-í, Siōng-chú ánne kóng: Taⁿ Góa tò tńg-lâi Ê-lú-sa-lèm, si liân-bín, Góa ê tiān ē koh khí tī hit tiong-kan, chîn-soh ē khan tī Ê-lú-sa-lèm ê téng-bīn. Che sī bān-kun ê Siōng-chú kóng ê. "
1:17 Hitê thiⁿ-sài koh kóng, " Lí tio̍h koh chhut siaⁿ kóng, bān-kun ê Siōng-chú ánne kóng: Góa chiahê siâⁿ ē koh hong-sēng hoat-ta̍t. Siōng-chú ē koh an-ùi Si-óng, koh kéng-soán Ê-lú-sa-lèm. "
1:18 Kak ê Ī-siōng
Góa gia̍h thâu koan-khòaⁿ, lí khòaⁿ, ū sì ki kak.
1:19 Góa chiū mn̄g kah góa kóng-ōe ê sù-chiá kóng, " Chiahê sī siáⁿ-mi̍h? " I ìn góa kóng, " Chiahê to̍h-sī phah-sòaⁿ Iô-tah, I-su-la-el kah Ê-lú-sa-lèm ê chiahê kak. "
1:20 Siōng-chú koh hō͘ góa khòaⁿ tio̍h sì-ê sai-hū.
1:21 Góa mn̄g kóng, " In lâi beh chò siáⁿ-mi̍h? " I ìn kóng, " Hiahê sī phah-sòaⁿ Iô-tah ê kak, hō͘ lâng m̄-káⁿ gia̍h thâu; chóng-.sī, chiahê sai-hū lâi sī beh hō͘ in kiaⁿ, phah-tó lia̍t kok ê kak, to̍h-sī bat kí-khí in ê kak lâi kong-kek Iô-tah, hō͘ i sì-sòaⁿ ê. "
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。