西番雅书 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
1:1 Tng Iô-tah ông Am-móng ê kiáⁿ Io-si-iah chē-ūi ê sî, Siōng-chú ê ōe lîm-kàu Hi-che-kia ê goân-sun — A-ma-lí-ah ê kan-á-sun — Ge-tá-lia̍h ê sun — Ku-si ê kiáⁿ Che-hoán-iah.
1:2 Siōng-chú Sím-phòaⁿ ê Ji̍t-chí
Siōng-chú kóng, " Góa beh tùi tē-chiūⁿ kā bān-mi̍h choân-pō͘ tû-bia̍t.
1:3 Góa beh tû-bia̍t lâng kah chengseⁿ, tû-bia̍t khong-tiong ê chiáu kah hái lāi ê hî, í-ki̍p chó͘-gāi ê chio̍h-thâu kah pháiⁿ lâng, Góa beh kā lâng tùi tē-chiūⁿ chián-tû. Che sī Siōng-chú kóng ê.
1:4 " Góa beh chhun Góa ê chhiú, kong-kek Iô-tah kah Ê-lú-sa-lèm só͘-ū ê jîn-bîn, mā beh tùi chit-ê só͘-chāi chián-tû Ba-al só͘ chhun lo̍h-.lâi ê, í-ki̍p Ka-mal（ Chù, Pài ngó͘-siōng ê chè-si ）ê miâ kah chè-si.
1:5 Kiàn-nā tī chhù téng pài thiⁿ-téng ê bān-siōng ê kah hiahê kèng-pài ê, kí Siōng-chú lâi chiùchōa kah kí Mal-kam（ Chù, Am-móng lâng ê sîn-bêng ） lâi chiùchōa ê,
1:6 kah hiahê pōe-ge̍k Siōng-chú ê, í-ki̍p bô cháu-chhōe Siōng-chú, mā bô kiû-kiò I ê, lóng beh kā i chián-tû. "
1:7 Lí tio̍h tī chì-koân Siōng-chú ê bīn-chêng tiām-tiām, in-ūi Siōng-chú ê ji̍t-chí kīn à. In-ūi Siōng-chú í-keng chún-pī chi̍t-ê chè-sū, beh kā I ê lâng-kheh hun-pia̍t chò sèng.
1:8 Siōng-chú kóng, " Kàu Siōng-chú chè-sū ê ji̍t, Góa beh pān chiahê kùi-cho̍k kah ông ê kiáⁿ, í-ki̍p só͘-ū chhēng gōa-pang lâng ê saⁿ ê.
1:9 Kàu hit ji̍t, Góa beh pān só͘-ū thiàu kòe hō͘-tēng, kā kiông-pō kah kúi-chà chhiong-móa chú-lâng ê chhù ê. "
1:10 Siōng-chú kóng, " Tng hit ji̍t, tī hî mn̂g ē ū pi-ai ê siaⁿ, tùi tē-jī-ê só͘-chāi ē ū tōa-siaⁿ hoah, tùi chiahê soaⁿ ē ū tōa pang-hām ê siaⁿ.
1:11 Tòa tī Mak-te-sih ê jîn-bîn, lín tio̍h tōa-siaⁿ hoah, in-ūi Ka-nân lâng lóng pāi-hoāi, kiàn-nā taⁿ gîn ê lâng lóng siū chián-tû.
1:12 " Hit sî, Góa beh ēng teng chhiau-chhōe Ê-lú-sa-lèm, Góa beh pān hiahê chhin-chhiūⁿ tī che-tái téng chē-chheng ê lâng; in sim-lāi siūⁿ kóng: Siōng-chú bô beh kàng hok-khì, mā bô beh kàng chai-hō.
1:13 In ê châi-bu̍t ē hō͘ lâng chhiúⁿ-toa̍t; in ê chhù-the̍h ē pha-hng. In beh khí chhù, mā bô thang tòa tī hit lāi-bīn; chai-chèng phû-tô hn̂g, mā bô thang lim i ê chiú. "
1:14 Siōng-chú ê tōa ji̍t kīn à, hit-ê ji̍t sī kīn koh chin kín, Siōng-chú ê ji̍t ê siaⁿ, tī hia ióng-sū tōa kan-khó͘, tōa-siaⁿ hoah.
1:15 Hit ji̍t sī tōa siū-khì ê ji̍t, sī hoān-lān khùn-khó͘ ê ji̍t, sī pāi-hoāi hi-bî ê ji̍t, sī o͘-o͘ àm-àm ê ji̍t, sī ba̍t hûn tōa àm ê ji̍t,
1:16 sī pûn kó͘-chhoe hoah-hiàm ê ji̍t, beh kong-kek kian-kò͘ ê siâⁿ kah koân ê siâⁿ-lâu.
1:17 Siōng-chú kóng, " Góa beh hō͘ lâng tú tio̍h kan-khó͘, hō͘ in chhin-chhiūⁿ chheⁿmê-.ê teh kiâⁿ lō͘, in-ūi in tek-chōe Siōng-chú. In ê hoeh ē hông piàⁿ-chhut chhin-chhiūⁿ tîn-ai, in ê bah ē hông hiat-ka̍k chhin-chhiūⁿ pùn-sò. "
1:18 Tng Siōng-chú siū-khì ê ji̍t, in ê gîn, in ê kim bē tàng kiù in; choân tē ē hō͘ I tōa siū-khì ê hóe sio-bia̍t, in-ūi I beh kóaⁿ-kín châu-bia̍t tē-chiūⁿ só͘-ū ê jîn-bîn.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。