Kàu hiahê ji̍t-chí liáu-āu, Siōng-chú tiān ê soaⁿ ē kiàn-li̍p tī chiahê soaⁿ ê téng-bīn, pôaⁿ-kòe só͘-ū ê soaⁿ-niá; bān-kok ê jîn-bîn lóng ē lâi kui chit chō soaⁿ. 4:2 Ū chin chē kok ē khì, kóng: Lâi, lán lâi chiūⁿ Siōng-chú ê soaⁿ, kàu Iâ-kop ê Siōng-tè ê tiān. I beh ēng I ê tō-lō͘ kà-sī lán, lán mā beh kiâⁿ I ê lō͘. In-ūi lu̍t-hoat ē tùi Si-óng chhut, Siōng-chú ê ōe ē tùi Ê-lú-sa-lèm thoân-pò. 4:3 I beh tī chin chē kok ê jîn-bîn tiong-kan kiâⁿ sím-phòaⁿ, ūi tio̍h chin chē hn̄g-hn̄g kiông-béng ê kok lâi kái-koat. In ē kā in ê to phah-chò lê-thâu, kā in ê chhiuⁿ phah-chò liâm-á. Chit kok bô gia̍h to kong-kek hit kok, in mā bô koh ha̍k-si̍p kau-chiàn. 4:4 Lâng-lâng lóng ē chē tī i kakī ê phû-tô chhiū kha kah kakī ê bû-hoa-kó chhiū kha, bô lâng hō͘ i tio̍h-kiaⁿ. In-ūi che sī bān-kun ê Siōng-chú chhin-chhùi kóng ê. 4:5 Bān-bîn ta̍k-ê hōng i kakī ê sîn-bêng ê miâ lâi kiâⁿ; chóng-.sī, goán beh hōng goán ê Siōng-tè — Siōng-chú ê miâ lâi kiâⁿ, it-ti̍t kàu éng-oán. 4:6
I-su-la-el Lâng Tńg-lâi Pún-kok
Siōng-chú kóng: Kàu hit ji̍t, Góa beh chū-chi̍p pái-kha-.ê, chio-chi̍p siū kóaⁿ-chhut ê kah Góa só͘ bat hō͘ i siū khó͘ ê. 4:7 Góa beh hō͘ pái-kha-.ê chò só͘ chhun lo̍h-.lâi ê jîn-bîn, hō͘ siū kóaⁿ kàu hn̄g-hn̄g ê chò kiông ê kok. Siōng-chú ē tī Si-óng soaⁿ chò ông kā in tī-lí, tùi chitmá kàu éng-oán. 4:8 Kóng tio̍h lí chò kui kûn iûⁿ ê chiú-keⁿ lâu, chò Si-óng siâⁿ ê soaⁿ, kok-koân ē kui tī lí, jî-chhiáⁿ chá-chêng ê kok-koân kah Ê-lú-sa-lèm siâⁿ ê kok-ūi lóng ē kui tī lí. 4:9 Taⁿ lí ná ē teh tōa-siaⁿ thî-khàu? Thòng-khó͘ khîⁿ tio̍h lí, chhin-chhiūⁿ beh seⁿ kiáⁿ ê chabó͘ lâng, kám sī in-ūi lín tiong-kan bô ông? Kám sī lín ê bô͘-sū sí-.khì? 4:10 Si-óng ê chabó͘ kiáⁿ, lí tio̍h thàng-thiàⁿ, kan-khó͘, chhin-chhiūⁿ seⁿ kiáⁿ ê chabó͘ lâng, in-ūi lí ē chhut siâⁿ khì tòa tī chhân-.ni̍h, ē khì-kàu Ba-bú-lông. Tī hia lí ē tit tio̍h kiù, Siōng-chú beh tī hia kā lí sio̍k-hôe, hō͘ lí thoat-lī tùi-te̍k ê chhiú. 4:11 Taⁿ chin chē kok ê jîn-bîn chū-chi̍p lâi kong-kek lí, kóng, " Goān Si-óng bak tio̍h bô chheng-khì, hō͘ goán chhin-ba̍k khòaⁿ-.tio̍h! " 4:12 Chóng-.sī, in m̄-chai Siōng-chú ê ì-sù, mā bô bêng-pe̍k I ê kè-ōe. I kā in chū-chi̍p, chhin-chhiūⁿ tiū-pé chū-chi̍p tī tiūⁿ-tiâⁿ. 4:13 Siōng-chú kóng, " Si-óng ê chabó͘ kiáⁿ, khí-lâi ta̍h ngó͘-kok! Góa beh hō͘ lí ê kak chiâⁿ-chò thih, hō͘ lí ê tê chiâⁿ-chò tâng. Lí ē phah-chhùi chin chē kok ê jîn-bîn, kā in só͘ chhiúⁿ ê mi̍h hiàn hō͘ Siōng-chú, kā in ê chîⁿ-châi hiàn hō͘ phó͘-thiⁿ-ē ê Chú. "