阿摩司书 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
9:1 Chú ê Sím-phòaⁿ
Góa khòaⁿ tio̍h Chú khiā tī chè-tôaⁿ piⁿ; I kóng: Lí tio̍h phah thiāu-táu, hō͘ mn̄g-tēng tín-tāng, phah-chhùi i lâi siong tio̍h chèng lâng ê thâu-khak; in só͘ chhun lo̍h-.lâi ê lâng, Góa beh ēng to thâi, bô chi̍t-ê cháu ē lī, bô chi̍t-ê ē tit tio̍h kiù.
9:2 In sûi-jiân ku̍t lo̍h-khì kàu im-kan, Góa ê chhiú beh tùi hia kā in lia̍h chhut-.lâi; sûi-jiân chiūⁿ-kàu thiⁿ-téng, Góa beh tùi hia kā in lia̍h lo̍h-.lâi;
9:3 sûi-jiân bih tī Kal-mel soaⁿ téng, Góa beh chhiau-chhōe, tùi hia kā in lia̍h chhut-.lâi; sûi-jiân siám-phiah Góa ê ba̍k-chiu chêng, bih tī hái-té, Góa beh tùi hia bēng-lēng chôa lâi kā in kā.
9:4 Sûi-jiân siū lia̍h tī tùi-te̍k ê bīn-chêng, Góa beh tùi hia bēng-lēng to-kiàm lâi kā in thâi; Góa beh chù-ba̍k khòaⁿ i, sī beh kàng chai-hō, m̄-sī beh kàng hok-khì.
9:5 In-ūi Chú — bān-kun ê Siōng-chú bong tē, tē chiū siau-iûⁿ, kiàn-nā tòa tī hit tiong-kan ê ē pi-ai, choân tē ē chhin-chhiūⁿ tōa hô tiòng khí-.lâi, mā ē thè-kē chhin-chhiūⁿ Ai-gi̍p hô.
9:6 Tī thiⁿ-téng khí I ê pâng-keng, tī tē-chiūⁿ hē kiong-chhong ê tē-ki, kiò hái chúi lâi piàⁿ tī tē-.ni̍h ê, I ê miâ kiò-chò I-é-ho-bah.
9:7 Siōng-chú kóng, " I-su-la-el lâng, Góa kám bô kā lín khòaⁿ-chò chhin-chhiūⁿ Kú-si̍t lâng? Góa kám m̄-sī chhōa I-su-la-el lâng chhut Ai-gi̍p tē, Hui-lī-sū lâng chhut Ka-hu-toh, A-lâm lâng chhut Ki-l?
9:8 Lí khòaⁿ, chì-koân Siōng-chú chù-ba̍k khòaⁿ chit-ê ū chōe ê kok, Góa beh tùi tē-chiūⁿ kā i siau-bia̍t, chóng-.sī, bô beh choân-pō͘ siau-bia̍t Iâ-kop ê ke. Che sī Siōng-chú kóng ê.
9:9 " Lí khòaⁿ, Góa beh chhut bēng-lēng tī bān-kok tiong pòa I-su-la-el ê chú-bîn, chhin-chhiūⁿ ēng pòa-ki pòa ngó͘-kok, bô kah chi̍t lia̍p tēng-.ê ka-la̍uh tē.
9:10 Góa ê jîn-bîn tiong-kan lóng ū chōe ê lâng kóng: Chai-eh bē jiok tio̍h goán, mā bē tú tio̍h goán ê, in ē sí tī to hā. "
9:11 I-su-la-el Chiong-lâi ê Ho̍k-heng
Siōng-Chú kóng," Kàu hit ji̍t, Ta-bi̍t í-keng tó-.khì ê pò͘-pêⁿ, Góa beh koh kā i khiā khí-.lâi, mā beh pó͘ i ê phòa-khiah, beh khí i hiahê tó-hoāi ê, lâi kā i kiàn-li̍p khí-.lâi, chhin-chhiūⁿ í-chêng ánne.
9:12 Hō͘ in tit tio̍h E-tóm iáu chhun lo̍h-.lâi ê chò sán-gia̍p, mā tit tio̍h hiahê ēng Góa ê miâ lâi chheng-ho͘ ê gōa-pang. Che sī kiâⁿ chit-ê tāichì ê Siōng-chú só͘ kóng ê. "
9:13 Siōng-chú kóng: Lí khòaⁿ, ji̍t-chí teh beh kàu, lê-chhân ê ē jiok tio̍h siu-koah ê, ta̍h phû-tô ê ē jiok tio̍h iā chéng ê. Tōa soaⁿ ē tih tiⁿ-chiú, sió soaⁿ ē lâu leng.
9:14 Góa beh hō͘ Góa ê jîn-bîn — I-su-la-el siū lia̍h ê tò tńg-.lâi; in ē koh khí hong-hùi ê siâⁿ lâi tòa, chai phû-tô hn̂g lâi lim i ê chiú, choh hn̂g lâi chia̍h i ê kóe-chí.
9:15 Góa beh kā in chai-pôe tī in ê pún thó͘-tē, in bô koh tú tio̍h siū poe̍h-chhut tī Góa só͘ hō͘ in ê tē. Che sī Siōng-chú — lí ê Siōng-tè kóng ê.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。