约珥书 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
1:1 Jîn-bîn Ūi tio̍h Lông-chok-bu̍t Siū Hóe-hāi Ai-khàu
Siōng-chú ê ōe lîm-kàu Pe-thó-el ê kiáⁿ Iô-el:
1:2 Lāu-tōa lâng, lín tio̍h thiaⁿ chit-ê ōe; chit só͘-chāi ê jîn-bîn, lín tio̍h àⁿ hīⁿ-khang thiaⁿ, tng lín ê ji̍t á-.sī lín ê chó͘-sian ê ji̍t, kám bat ū chit-ê tāichì?
1:3 Lín tio̍h kā chit-ê tāichì thoân hō͘ lín ê kiáⁿ, kiáⁿ koh thoân hō͘ sun, sun koh thoân hō͘ āu-tāi.
1:4 Chháu-me̍h chia̍h chhun lo̍h-.lâi ê, tē-jī chióng ê chháu-meh ē lâi chia̍h; tē-jī chióng chia̍h chhun lo̍h-.lâi ê, tē-saⁿ chióng ê chháu-meh ē lâi chia̍h; tē-saⁿ chióng chia̍h chhun lo̍h-.lâi ê, tē-sì chióng ê chháu-meh ē lâi chia̍h.
1:5 Chiú-chùi ê lâng, lín tio̍h chhéⁿ khí-lâi thî-khàu; hò͘ⁿ-chiú ê lâng, lín tio̍h ūi tio̍h tiⁿ-chiú lâi thî-khàu, in-ūi bô chiú thang koh kàu tī lí ê chhùi à.
1:6 In-ūi ū chi̍t cho̍k chiūⁿ-lâi góa ê tē, kiông-béng koh sǹg bē liáu; i ê khí chhin-chhiūⁿ sai ê khí, i ê gê chhin-chhiūⁿ bó-sai ê gê.
1:7 I húi-hoāi góa ê phû-tô chhiū, pak góa ê bû-hoa-kó chhiū, hō͘ i kng liu-liu lâi kā i khì-sak, i ê ki piàn pe̍h-sek.
1:8 Lí tio̍h thî-khàu, chhin-chhiūⁿ chāi-sek-lí io hâ môa-pò͘, ūi tio̍h siàu-liân sî ê tiōng-hu thî-khàu.
1:9 Sò͘-chè kah tiān-chiú lóng bô thang kàu tī Siōng-chú ê tiān; ho̍k-sāi Siōng-chú ê chè-si lóng pi-ai.
1:10 Chhân pha-hng, tē pi-ai; in-ūi ngó͘-kok húi-hoāi, sin chiú ta-.khì, iû mā khiàm-khoeh.
1:11 Choh-chhân lâng, lín tio̍h kiàn-siàu, siu-lí phû-tô hn̂g ê, lín tio̍h ai-kiò, ūi tio̍h sió-be̍h kah tōa-be̍h ê iân-kò͘, in-ūi chhân-hn̂g ê siu-sêng lóng bô-.khì.
1:12 Phû-tô-chhiū ta-.khì, bû-hoa-kó chhiū ta-.khì, sia̍h-liû, chó chhiū, phông-kó chhiū, liân chhân-iá só͘-ū ê chhiū-ba̍k, mā lóng ta-.khì. Jîn-kan ê khoài-lo̍k lóng siau-sit-.khì.
1:13 Chè-si, lín tio̍h hâ môa-pò͘ lâi thî-khàu; tī chè-tôaⁿ ho̍k-sāi ê, lín tio̍h ai-kiò; chò góa ê Siōng-tè chhe-ēng ê lâng, lín tio̍h lâi chhēng môa-pò͘ kòe-mê, in-ūi sò͘-chè kah tiān-chiú lóng bô koh thang hiàn tī lín ê Siōng-tè ê tiān.
1:14 Lín tio̍h siat chi̍t-ê kìm-chia̍h ê sèng-ji̍t, tiàu-chi̍p giâm-siok-hōe, chio-chi̍p láu-tōa kah kok lāi só͘-ū ê jîn-bîn, lâi-kàu Siōng-chú — lín ê Siōng-tè ê tiān, ai-kiû Siōng-chú.
1:15 Chhám ah! Hit ji̍t in-ūi Siōng-chú ê ji̍t teh beh kàu, chhin-chhiūⁿ húi-bia̍t ē tùi Choân-lêng-.ê lâi.
1:16 Chia̍h-mi̍h kám m̄-sī tùi lán ê ba̍k-chiu chêng toān-choa̍t? Hoaⁿ-hí khoài-lo̍k kám m̄-sī tùi lán ê Siōng-tè ê tiān thêng-chí?
1:17 Chéng-chí nōa tī thô͘ lāi; chhek-chhng hong-hùi, bí-lôa tó-hoāi; in-ūi ngó͘-kok ta-ta-.khì.
1:18 Cheng-seⁿ ai-háu kàu án-chóaⁿ! Gû-kûn hun-loān, in-ūi bô chháu; iûⁿ-kûn mā khùn-khó͘.
1:19 Siōng-chú ah, góa kiû-kiò Lí, in-ūi hóe kā khòng-iá ê chháu-tiûⁿ sio-bia̍t, hóe-iām sio-chīn chhân-iá ê chhiū-ba̍k.
1:20 Chhân-iá ê cháu-siù ǹg Lí teh chhoán; in-ūi khe chúi ta-.khì, hóe mā sio-bia̍t khòng-iá ê chháu-tiûⁿ.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。