但以理书 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
4:1 Nep-kat-ne-chal ê Tē-jī-ê Bāng
Nep-kat-ne-chal ông pan-chiàu hō͘ thiⁿ-ē só͘-ū ê jîn-bîn, só͘-ū ê kok, só͘-ū ê khiuⁿ-kháu ê lâng, kóng, " Goān lín tōa hióng-siū pêng-an!
4:2 Chì-koân Siōng-tè só͘ kiâⁿ tī góa ê sîn-jiah, kî-sū, góa hoaⁿ-hí soan-pò͘:
4:3 Úi-tāi ah, I ê sîn-jiah! Hong-sēng ah, I ê kî-sū! I ê kok sī éng-oán ê kok, I ê koân-pèng kàu bān-sè-tāi!
4:4 " Góa — Nep-kat-ne-chal tī góa ê chhù, an-jiân tī góa ê ông-kiong seng-oa̍h, iàn-lo̍k.
4:5 Góa bāng-kìⁿ chi̍t-ê bāng, hō͘ góa kiaⁿ-hiâⁿ. Góa tī bîn-chhn̂g téng ê su-sióng kah sim-lāi ê ī-siōng, hō͘ góa chin kiaⁿ.
4:6 Só͘-í, góa chhut lēng tiàu Ba-bú-lông só͘-ū tì-hūi ê lâng lâi-kàu góa ê bīn-chêng, kiò in kái-bêng hit-ê bāng hō͘ góa chai.
4:7 Chiū ánne, hiahê chheⁿ-siōng-ka, su̍t-sū, Kal-tí-ah lâng, chiam-pok ê lóng ji̍p-.lâi, góa kā hit-ê bāng tng-bīn kā in kóng, chóng-.sī, in bô lâng ē-tàng kái-bêng hō͘ góa chai.
4:8 Lō͘-bóe ū Ta-ni-el, chiàu góa ê sîn-bêng ê miâ kiò-chò Bel-ti-sia-chal ê lâi-kàu góa ê bīn-chêng; i ê sim-lāi ū sèng ê Siōng-tè ê sîn-lêng, góa kā góa ê bāng tùi i kóng,
4:9 ' Phok-sū-tiúⁿ — Bel-ti-sia-chal, in-ūi góa chai lí ê sim-lāi ū sèng ê Siōng-tè ê sîn-lêng, bô chi̍t hāng pì-bi̍t ê tāichì hō͘ lí ûi-lân. Taⁿ lí tio̍h kā góa bāng tiong só͘ khòaⁿ-.tio̍h ê ī-siōng kā góa kóng, koh kā i kái-bêng. '
4:10 " Góa tī chhn̂g-.ni̍h sim-lāi ê ī-siōng sī chiahê, góa teh khòaⁿ, khòaⁿ tio̍h tē ê tiong-kan ū chi̍t châng chhiū hui-siông koân.
4:11 Hit châng chhiū chiām-chiām tōa koh kian-kò͘, koân kàu tú thiⁿ, tē ê ke̍k-thâu mā khòaⁿ ē tio̍h.
4:12 I ê hio̍h bō͘-sēng, kóe-chí chin chē, hit lāi-bīn ū chiòng-seng ê chia̍h-mi̍h; chhân-iá ê cháu-siù tòa tī i ê ìm-ńg ē, khong-tiong ê poe-chiáu hioh tī i ê chhiū-ki, kiàn-nā ū hia̍t-khì ê lóng tùi i tit tio̍h chia̍h-mi̍h.
4:13 " Góa tī bîn-chhn̂g, tī góa sim-lāi ê ī-siōng, khòaⁿ tio̍h ū chi̍t-ê siú-bōng ê lâng, koh sī sèng ê, tùi thiⁿ lo̍h-.lâi.
4:14 I tōa siaⁿ hoah, ' Chhò hit-châng chhiū, khám i ê ki, iô lak i ê hio̍h, phah-sòaⁿ i ê kóe-chí, hō͘ cháu-siù lī-khui i ê ē-bīn, hō͘ poe-chiáu lī-khui i ê ki.
4:15 Chóng-.sī, tio̍h lâu i ê kin-thâu tī tē-.ni̍h, ēng thih kah tâng ê khoân kā i pa̍k khí-.lâi, tī chhân-.ni̍h sin hoat ê chháu tiong, ēng thiⁿ ê lō͘-chúi kā i sip-tâm, mā hō͘ i kah cháu-siù chò-hóe tī tē-chiūⁿ ê chháu-tiûⁿ,
4:16 hō͘ i ê sim piàn-chò m̄-sī lâng ê sim, mā ēng siù ê sim hō͘ i, hō͘ i keng-kòe chhit-ê sî-kî.
4:17 Che sī chiahê siú-bōng ê lâng só͘ tiāⁿ tio̍h ê bēng-lēng, chiahê sèng ê só͘ chhut ê bēng-lēng, hō͘ chiòng-seng chai, chì-koân-.ê chiáng-koán lâng ê kok, mā chiàu kakī ê ì-sù kā kok siúⁿ-sù hō͘ lâng, mā ēng siōng sè ê lâng lâi siat-li̍p chò chú. '
4:18 " Che sī góa — Nep-kat-ne-chal ông só͘ khòaⁿ-.tio̍h ê bāng. Bel-ti-sia-chal, lí tio̍h kā góa kái-bêng chit-ê bāng, in-ūi góa kok lāi it-chhè tì-hūi ê lâng lóng bē tàng kái-bêng hō͘ góa chai, chí ū lí ē, in-ūi lín sim-lāi ū hiahê sèng ê Siōng-tè ê sîn-lêng. "
4:19 Ta-ni-el Kái-bāng
Hit sî, kiò-chò Bel-ti-sia-chal ê Ta-ni-el tio̍h-kiaⁿ kah gāng-.khì ū hiah-.kú, sim-lāi iu-būn. Ông tùi i kóng, " Bel-ti-sia-chal, m̄-bián ūi tio̍h hit-ê bāng kah i ê kái-bêng lâi kiaⁿ-hiâⁿ. " Bel-ti-sia-chal chiū ìn kóng, " Goān hit-ê bāng kui tī oàn-hūn lí ê lâng, hit-ê kái-bêng kui tī lí ê tùi-te̍k.
4:20 Lí só͘ khòaⁿ-.tio̍h ê chhiū, chiām-chiām tōa koh kian-kò͘, koân kàu tú thiⁿ, tē ê ke̍k-thâu mā khòaⁿ ē tio̍h;
4:21 i ê hio̍h bō͘-sēng, i ê kóe-chí chin chē, hit lāi-bīn ū chiòng-seng ê chia̍h-mi̍h, chhân-iá ê cháu-siù tòa tī i ê ē-bīn, khong-tiong ê poe-chiáu hioh tī i ê ki.
4:22 " Ông, chit châng chhiū to̍h-sī lí, lí chiām-chiām tōa koh kian-kò͘, lí ê kiông-tōa chiām-chiām chìn-pō͘ kàu tú thiⁿ, lí ê koân-pèng kàu tī tē-ke̍k.
4:23 Ông kì-jiân khòaⁿ tio̍h ū chi̍t-ê siú-bōng-koh sī sèng ê, tùi thiⁿ kàng lo̍h-.lâi, kóng, ' Tio̍h chhò hit-châng chhiū lâi kā i húi-hoāi, chóng-.sī, tio̍h lâu i ê kin-thâu tī tē-.ni̍h, ēng thih kah tâng ê khoân kā i pa̍k tī chhân-.ni̍h sin hoat ê chháu tiong, ēng thiⁿ ê lō͘-chúi kā i sip-tâm, mā hō͘ i kah cháu-siù chò-hóe, keng-kòe chhit-ê sî-kî. '
4:24 " Ông, hit-ê kái-bêng sī ánne: Ū Chì-koân-.ê ê bēng-lēng ē kàu tī góa ê ông, góa ê chú.
4:25 Lí ē siū kóaⁿ-chhut lī-khui lâng, khì kah chhân-iá ê cháu-siù chò-hóe tòa, mā ē hō͘ lí chia̍h chháu chhin-chhiūⁿ gû, hō͘ thiⁿ ê lō͘-chúi sip-tâm, mā ē keng-kòe chhit-ê sî-kî, ti̍t-kàu lí chai Chì-koân-.ê chiáng-koán lâng ê kok, mā chiàu kakī ê ì-sù kā kok siúⁿ-sù hō͘ lâng.
4:26 In kì-jiân hoan-hù chhiū ê kin-thâu tio̍h lâu-.leh, ti̍t-kàu lí chai chiahê thiⁿ teh chiáng-koân ê sî, lí ê kok chiū it-tēng koh kui tī lí.
4:27 Ông, taⁿ kiû lí hoaⁿ-hí chiap-la̍p góa ê khó͘-khǹg, ēng kiâⁿ kong-gī lâi toān-choa̍t lí ê chōe-kò, ēng liân-bín sànchhiah lâng lâi tû-khì lí ê kòe-sit, ánne kiámchhái lí ê pêng-an ē kú-tn̂g. "
4:28 Chiahê tāichì lóng èng-giām tī Nep-kat-ne-chal ông.
4:29 Kàu cha̍p-jī-goe̍h móa, i kiâⁿ-iû tī Ba-bú-lông ê ông-kiong.
4:30 Ông kóng, " Che kám m̄-sī tōa ê Ba-bú-lông, góa ēng góa tōa la̍t ê koân, mā ūi tio̍h góa ê ui-giâm ê êng-kng lâi khí ê, lâi chò pún-kok ê kiong-tiān? "
4:31 Chit-ê ōe iáu koh tī ông ê chhùi ê sî, ū siaⁿ tùi thiⁿ lo̍h-.lâi, kóng, " Nep-kat-ne-chal ông, ū ōe beh kā lí kóng, kok-ūi í-keng lī-khui lí à.
4:32 Lí ē siū kóaⁿ-chhut lī-khui lâng, kah chhân-iá ê cháu-siù chò-hóe tòa, mā ē hō͘ lí chia̍h chháu chhin-chhiūⁿ gû, mā ē keng-kòe chhit-ê sî-kî, ti̍t-kàu lí chai chì-koân ê chiáng-koán-chiá ê kok, mā chiàu kakī ê ì-sù kā kok siúⁿ-sù hō͘ lâng. "
4:33 Chiū tī hit sî, tāichì èng-giām tī Nep-kat-ne-chal, i siū kóaⁿ-chhut lī-khui lâng, chia̍h chháu chhin-chhiūⁿ gû, seng-khu hō͘ thiⁿ ê lō͘-chúi sip-tâm, ti̍t-kàu i ê mn̂g hoat kah chhin-chhiūⁿ eng-chiáu ê mn̂g, i ê chéng-kah tn̂g kah chhin-chhiūⁿ chiáu ê jiáu.
4:34 Nep-kat-ne-chal O-ló Siōng-tè
Ông kóng, " Hiahê sî-ji̍t í-keng móa, góa — Nep-kat-ne-chal gia̍h thâu ǹg thiⁿ, góa ê lêng-sèng chiū koh hôe-ho̍k, góa chiū chiok-siā Chì-koân-.ê, oló chun-êng éng-oa̍h ê. In-ūi I ê koân sī éng-oán ê koân, I ê kok kàu tāi-tāi bô chīn.
4:35 Tē chiūⁿ ê jîn-bîn, I khòaⁿ-chò bô; tī thiⁿ-.ni̍h ê kun-tūi kah tē-chiūⁿ ê jîn-bîn tiong-kan, I lóng chiàu kakī ê ì-sù chò tāichì; bô lâng ē-tàng chó͘-tòng I ê chhiú, á-.sī mn̄g I kóng : ' Lí teh chò siáⁿ-mi̍h? '
4:36 " Hit sî, góa ê lêng-sèng koh hôe-ho̍k, góa ê ui-giâm êng-iāu koh kui tī góa, chò góa ê kok ê êng-kng; góa ê bô͘-sū kah tāi-sîn mā lâi tiâu-kìⁿ góa; góa ê kok-ūi koh kian-kò͘, tōa koân-pèng koh ke-thiⁿ tī góa.
4:37 " Taⁿ góa — Nep-kat-ne-chal oló chun-kèng, chheng-ho͘ thiⁿ-téng ê ông; in-ūi I só͘ chò ê lóng chin-si̍t, I só͘ kiâⁿ ê lóng kong-pêⁿ. Hiahê kiâⁿ-ta̍h kiau-ngō͘-ê, I ē kā in kàng kē. "
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。