以西结书 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
47:1 Tùi Sèng-tiān Lâu Chhut-.lâi ê Chôaⁿ-chúi
I chhōa góa tò tńg-khì kàu tiān mn̂g, lí khòaⁿ, ū chúi tùi tiān ê hō͘-tēng ē ǹg tang lâu chhut-.lâi （ in-ūi tiān ê thâu-chêng ǹg tang ）. Chiahê chúi tùi ē-bīn, tùi tiān ê chiàⁿ pêng, chè-tôaⁿ ê lâm pêng lâu lo̍h-.lâi.
47:2 I chiū chhōa góa tùi pak-mn̂g chhut-.khì, chhōa góa tùi gōa-bīn oan kàu gōa-mn̂g, tùi ǹg tang pêng ê mn̂g ê lō͘; lí khòaⁿ, chúi tùi chiàⁿ pêng piak chhut-.lâi.
47:3 Hitê lâng chhiú the̍h chîn-soh, ǹg tang kiâⁿ chhut-.khì ê sî, i chiū niû chi̍t chheng tiú, kah góa tùi chúi liâu kòe-.khì, chúi im kha-ba̍k.
47:4 I koh niû chi̍t chheng tiú, kah góa tùi chúi liâu kòe-.khì, chúi im kha-thâu-u, koh niû chi̍t chheng tiú kah góa liâu kòe-.khì, chúi im-kàu io;
47:5 koh niû chi̍t chheng tiú, chúi chiū chiâⁿ-chò hô, góa bē tàng liâu kòe-.khì. In-ūi chúi tiòng móa, chiâⁿ-chò ē siû-.tit ê chúi, bē liâu-.tit ê hô.
47:6 I chiū tùi góa kóng, " Jîn-chú, lí kám ū khòaⁿ tio̍h chit-ê? " I chiū chhōa góa, hō͘ góa oa̍t tńg-khì kàu hô piⁿ.
47:7 Góa tò tńg-.khì ê sî, lí khòaⁿ, tī hô piⁿ siang pêng ū chin chē chhiū-ba̍k.
47:8 I kā góa kóng, " Chiahê chúi ǹg tang lâu-.khì, ē lo̍h-khì kàu A-la̍h-bah, ti̍t-ti̍t lâu kàu hái; só͘ hoat-chhut ê chúi ē lâu ji̍p-khì Iâm-hái, hái-.ni̍h ê chúi chiū piàn hó.
47:9 Hô chúi só͘ kàu ê só͘-chāi, ta̍k chióng seⁿ-thòaⁿ ê tōng-bu̍t lóng ē tit tio̍h oa̍h-miā, mā ē ū hî chin chē, in-ūi chúi lâu-kàu hia, hái-.ni̍h ê chúi piàn hó. Hitê hô só͘ lâu-kàu ê só͘-chāi, só͘-ū ê mi̍h lóng ē tit tio̍h oa̍h-miā.
47:10 Chiong-lâi ē ū lia̍h-hî lâng khiā tī hōaⁿ piⁿ, tùi Ian-ge-tih kàu In-e-gu-laim lóng chò pha bāng ê só͘-chāi, hiahê hî kok chiàu i ê lūi, chhin-chhiūⁿ tōa hái ê hî chin chē.
47:11 Chóng-.sī, nōa-thô͘ ê tē kah lâm-á tē ê só͘-chāi bē tàng piàn-chò hó tē, chiū lâu teh chhut iâm.
47:12 Tī hô ê siang pêng piⁿ ē hoat-chhut ta̍k lūi ê chhiū-ba̍k, thang chò chia̍h-mi̍h, hio̍h bē ta-.khì, kóe-chí chhut bô tn̄g; ta̍k goe̍h-ji̍t ē kiat sin ê kóe-chí, in-ūi chiahê chúi sī tùi sèng-só͘ lâu chhut-.lâi ê; chhiū téng ê kóe-chí ē-tàng chò chia̍h-mi̍h, hio̍h ū i-tī ê kong-iōng. "
47:13 Tē-kài
Chì-koân Siōng-chú ánne kóng, " Lín chiàu I-su-la-el cha̍p-jī chi-cho̍k, pun chit-ê tē chò sán-gia̍p, i ê tē-kài tio̍h chhin-chhiūⁿ ē-té: Iô-sé-huh ē tit tio̍h nn̄g hūn.
47:14 Lín sêng-chiap chit-ê tē chò sán-gia̍p, tio̍h chò-hóe pêⁿ-pun; in-ūi Góa bat gia̍h-khí chhiú lâi èng-ín, kā chit-ê tē hō͘ lín ê chó͘-sian; chit-ê tē ē kui tī lín lâi chò lín ê sán-gia̍p.
47:15 " Tē ê kài-hān to̍h-sī ánne: pak pêng ê kài, tùi tōa hái khì-kàu Hiat-lông ê lō͘, ti̍t-ti̍t kàu Che-ta̍t chhut-ji̍p ê só͘-chāi.
47:16 Kàu Ha-mat, Be-lō͘-thah, Si-bu-laim, to̍h-sī tī Ta-má-su-ko ê kéng-kài kah Ha-mat ê kéng-kài ê tiong-kan; kàu Hau-lan pian-kài ê Ha-chal-Hat-kong.
47:17 Tùi hái ê kéng-kài to̍h-sī Ha-chal-e-nán kīn tī Ta-má-su-ko ê kéng-kài, koh tī pak pêng ǹg pak sī Ha-mat ê kéng-kài. Che sī pak pêng ê kài.
47:18 " Tang pêng ê kài tī Hau-lan, Ta-má-su-ko, Gi-lia̍t kah I-su-la-el tē ê tiong-kan to̍h-sī Iol-tàn hô. Lín tio̍h tùi pak pêng ê kài niû kàu tang-hái. Che to̍h-sī tang pêng ê kài.
47:19 " Lâm pêng ǹg lâm ê kài sī tùi Tha-mal kàu Me-lí-bah-ka-te-sih ê chúi, sòa-kàu Ai-gi̍p ê khe, thàng-kàu tōa hái. Che sī lâm pêng ǹg lâm ê kài.
47:20 " Sai-pêng ê kài to̍h-sī tōa hái, tùi lâm pêng ê kéng-kài, it-ti̍t kàu Ha-mat chhut-ji̍p tùi-bīn ê só͘-chāi. Che to̍h-sī sai pêng ê kài.
47:21 " Án-ne, lín tio̍h chiàu I-su-la-el ê chi-cho̍k, ūi kakī pun chit-ê tē.
47:22 Lín tio̍h liam-khau pun chit-ê tē chò sán-gia̍p, kui tī lín pún-sin kah tī lín tiong-kan kià-kha ê chhut-gōa lâng, to̍h-sī tī lín tiong-kan seⁿ kiáⁿ-jî ê. Lín tio̍h kā in khòaⁿ-chò chhin-chhiūⁿ I-su-la-el ê chú-bîn ê tiong-kan só͘ seⁿ ê kāng-khoán; in tī I-su-la-el chi-cho̍k ê tiong-kan kah lín chò-hóe tit tio̍h tē chò sán-gia̍p.
47:23 Gōa-bīn ê lâng tòa tī hit-ê chi-cho̍k ê tiong-kan, lín chiū tī hia pun tē hō͘ i chò sán-gia̍p. Che to̍h-sī chì-koân Siōng-chú kóng ê. "
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。