以西结书 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
25:1 Ī-giân Am-móng Siū Têng-hoa̍t
Siōng-chú ê ōe lîm-kàu góa, kóng,
25:2 " Jîn-chú, lí tio̍h bīn ǹg Am-móng cho̍k, soan-pò͘ kóng beh kā in kong-kek, kóng: Lín tio̍h thiaⁿ chì-koân Siōng-chú ê ōe.
25:3 Chì-koân Siōng-chú ánne kóng: Góa ê sèng-só͘ siū òe lahsap, I-su-la-el tē tú tio̍h pha-hng, Iô-tah ke hō͘ lâng lia̍h-.khì; hit sî, lí in-ūi chiahê tāichì ēng ōe kā in kong-kek, kóng, ' Ah-hah! '
25:4 Lí khòaⁿ, só͘-í, Góa beh kā lí kau hō͘ tang-hong ê lâng chò sán-gia̍p; in ē tī lí ê só͘-chāi chat iâⁿ tòa, chia̍h lí ê kóe-chí, lim lí seng-sán ê leng.
25:5 Góa beh hō͘ Lap-bah chò lo̍k-tô ê tiâu, hō͘ Am-móng cho̍k ê tē chò iûⁿ-kûn tò ê só͘-chāi, lín chiū ē chai Góa sī Siōng-chú. "
25:6 Chì-koân Siōng-chú ánne kóng, " In-ūi lí tah chhiú tǹg kha, móa-sim biáu-sī, ǹg I-su-la-el tē lâi hoaⁿ-hí;
25:7 lí khòaⁿ, só͘-í Góa chhun-chhut Góa ê chhiú kong-kek lí, kā lí kau hō͘ lia̍t kok hō͘ in chhiúⁿ-.khì. Góa beh tùi lia̍t pang tiong kā lí chián-tû, hō͘ lí tī bān-kok tiong pāi-bông. Góa beh kā lí tû-bia̍t, lí chiū ē chai Góa sī Siōng-chú. "
25:8 Chek-pī Mô͘-ap
Chì-koân Siōng-chú ánne kóng, " In-ūi Mô͘-ap kah Se-il ū teh kóng, ' Lí khòaⁿ, Iô-tah ke kah chèng kok bô siáⁿ-mi̍h bô kāng',
25:9 Lí khòaⁿ, in-ūi ánne, Góa beh khui Mô͘-ap ê pian-kài tùi chiahê siâⁿ, tùi i pian-kài chiahê siâⁿ, chò i pún-kok ê êng-kng ê, to̍h-sī Bia̍t-e-si-mo͘t, Ba-al-me-óng kah Ki-lia̍t-tháim,
25:10 Hō͘ i kah Am-móng cho̍k lóng kau tī tang-hong ê jîn-bîn chò sán-gia̍p, hō͘ Am-móng cho̍k bô koh tī lia̍t pang tiong siū kì-liām.
25:11 Góa mā beh sím-phòaⁿ Mô͘-ap, in chiū ē chai Góa sī Siōng-chú. "
25:12 Chek-pī E-tóm
Chì-koân Siōng-chú ánne kóng, " In-ūi E-tóm ê só͘ kiâⁿ, to̍h-sī kong-kek Iô-tah ke lâi pò-siû, tùi in ê pò-siû lâi hoān tāng chōe.
25:13 Só͘-í chì-koân Siōng-chú ánne kóng, " Góa beh chhun Góa ê chhiú lâi kong-kek E-tóm, chián-tû in hia ê lâng kah chengseⁿ, hō͘ i pha-hng, tùi Thê-man kàu Tí-tàn lâng, lóng sí tī to hā.
25:14 Jî-chhiáⁿ Góa beh ēng Góa ê chú-bîn — I-su-la-el lâng ê chhiú lâi pò-ho̍k Góa tī E-tóm ê siû-te̍k; in ē chiàu Góa ê siū-khì, chiàu Góa ê tōa siū-khì lâi kiâⁿ tī E-tóm, in chiū ē chai che sī Góa ê pò-siû. Che sī chì-koân Siōng-chú kóng ê. "
25:15 Chek-pī Hui-lī-sū
Chì-koân Siōng-chú ánne kóng, " In-ūi Hui-lī-sū lâng kiâⁿ pò-siû, chûn-sim biáu-sī lâi pò-siû, kiat sí-oan beh kā in châu-bia̍t,
25:16 só͘-í, chì-koân Siōng-chú ánne kóng: Lí khòaⁿ, Góa beh chhun Góa ê chhiú kong-kek Hui-lī-sū lâng, Góa beh chián-tû Kit-thê lâng, kā iân hái só͘ chhun lo̍h-.lâi ê jîn-bîn bia̍t-bông.
25:17 Góa beh ēng tōa siū-khì ê chek-hoa̍t, tùi in kiâⁿ tōa ê pò-siû. Góa tùi in pò-siû ê sî, in chiū ē chai Góa sī Siōng-chú. "
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。