以西结书 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
24:1 Seⁿ Sian ê Oe
Tē-káu nî cha̍p-goe̍h chhe-cha̍p, Siōng-chú ê ōe koh lîm-kàu góa, kóng,
24:2 " Jîn-chú, kin-á-ji̍t tútú sī Ba-bú-lông ông lâi-kàu Ê-lú-sa-lèm ê ji̍t, lí tio̍h kā kin-á-ji̍t kì i ê miâ.
24:3 Tio̍h tùi chit-ê pōe-ge̍k ê ke siat phì-jū, kóng, chì-koân Siōng-chú ánne kóng: Kā tiáⁿ chhāi tī hóe-.ni̍h, chhāi hó liáu-āu, chiū piàⁿ chúi tī lāi-bīn;
24:4 kā bah-tè, to̍h-sī só͘-ū pûi koh súi ê bah-tè, chêng-thúi, āu-thúi, lóng khioh lâi hē tī lāi-bīn, kéng hó ê kut thia̍p hō͘ i móa.
24:5 Chhú iûⁿ-kûn tiong siōng hó ê, kā chhâ thia̍p tī tiáⁿ-ē, hō͘ tiáⁿ kún chhiāng-chhiāng, thang kā kut tī hit lāi-bīn kûn.
24:6 Chì-koân Siōng-chú ánne kóng, " Ū chai-hō à, chit-ê hō͘ lâng lâu hoeh ê siâⁿ, to̍h-sī seⁿ sian ê tiáⁿ, i ê sian iáu-bōe tû-.khì, tio̍h kā bah-tè tùi hit tiong-kan chi̍t tè chi̍t tè the̍h chhut-.lâi, bô su-iàu liam-khau.
24:7 Siâⁿ tiong ū siū thâi ê lâng ê hoeh, piàⁿ tī kng-kng ê chio̍h-pôaⁿ téng, bô piàⁿ tī tē-.ni̍h thang ēng thô͘ khàm.
24:8 Chit-ê siâⁿ lāi só͘ lâu ê hoeh, piàⁿ tī kng-kng ê chio̍h-pôaⁿ téng, bô thang jia-khàm, sī Góa hō͘ i ánne, ūi tio̍h beh kek tōa siū-khì, kiâⁿ pò-èng. "
24:9 " Só͘-í, chì-koân Siōng-chú ánne kóng: Ū chai-hō à, chit-ê hō͘ lâng lâu hoeh ê siâⁿ, Góa mā beh thia̍p tōa tui ê hóe-chhâ,
24:10 thiⁿ chhâ hō͘ hóe chin iām, kā bah kûn nōa, kā thng ngâu khó, hō͘ kut-hu hu-.khì;
24:11 kā tiáⁿ piàⁿ khang, chhāi tī teh to̍h ê hóe-thòaⁿ téng, hō͘ tiáⁿ piak jia̍t, hō͘ tâng sio âng, kā kî-tiong ê ù-òe iûⁿ-tiāu, tû-khì hit téng-bīn ê sian.
24:12 I hō͘ Góa lô-khó͘ ià-siān, chóng-.sī, só͘ seⁿ tōa-tōa ê sian iû-goân bô lak; i ê sian nā tī hóe-.ni̍h, mā bē tàng tû-.khì.
24:13 Tī lí ê ù-òe tiong ū îm-hēng, Góa bat kā lí chheng-khì, lí iáu koh bô chheng-khì. Só͘-í, lí ê ù-òe bē koh tit tio̍h chheng-khì, it-ti̍t kàu Góa tùi lí hoat-chhut ê tōa siū-khì soah-.khì.
24:14 Góa — Siōng-chú bat ánne kóng: Hitê tāichì it-tēng ē chiâⁿ, Góa mā beh ánne kiâⁿ, it-tēng bô péng-khí péng-tó, it-tēng bô liân-bín, mā bô hō͘-hóe. Lâng ē chiàu lí ê kí-tōng, chiàu lí ê hêng-ûi lâi kā lí sím-phòaⁿ. Che sī chì-koân Siōng-chú kóng ê. "
24:15 Sian-ti ê Bó͘ Sí-bông
Siōng-chú ê ōe koh lîm-kàu góa, kóng,
24:16 " Jîn-chú, lí khòaⁿ, Góa beh kā lí ê ba̍k-chiu só͘ ì-ài ê hut-jiân chhú-.khì; chóng-.sī, lí m̄ thang pi-ai thî-khàu, mā m̄ thang lâu ba̍k-sái.
24:17 To̍k-to̍k thang thau-thau-á thó͘-khùi, m̄ thang chhut siaⁿ, m̄ thang pān-lí song-sū, thâu-khak iû-goân tio̍h pau thâu-kin, kha iû-goân tio̍h chhēng ê, m̄ thang am lí ê chhùi-tûn, mā m̄ thang chia̍h tiàu-song ê piáⁿ. "
24:18 Chiū ánne, góa kā chit-ê tāichì tī chá-khí sî tùi jîn-bîn kóng, ê-hng góa ê bó͘ chiū sí. Keh kang chá-khí, góa chiū chun-thàn bēng-lēng lâi kiâⁿ.
24:19 Jîn-bîn mn̄g góa kóng, " Lí ánne chò kah goán ū siáⁿ-mi̍h koan-hē? Lí ná bô kā goán kóng? "
24:20 Góa ìn in kóng, " Siōng-chú ê ōe lîm-kàu góa, kóng,
24:21 ' Lí tio̍h kā I-su-la-el ê chú-bîn kóng, chì-koân Siōng-chú ánne kóng: Lí khòaⁿ, Góa beh kā Góa ê sèng-só͘ òe lahsap, to̍h-sī lín ê sè-le̍k só͘ khoa-kháu, lín ê ba̍k-chiu só͘ ì-ài, lín ê sim só͘ thiàⁿ-sioh ê; jî-chhiáⁿ lín só͘ lâu tī hia ê kiáⁿ-jî ē tó tī to hā.
24:22 Hit sî, lín ē chiàu Góa só͘ kiâⁿ ê lâi kiâⁿ, bô am lín ê chhùi-tûn, mā bô chia̍h tiàu-song ê piáⁿ.
24:23 Lín ê thâu-khak iû-goân pau thâu-kin, kha tio̍h chhēng ê, bô pi-ai, bô thî-khàu; lín ē tī lín ê chōe-ok tiong siau-bia̍t, bīn sio-tùi lâi thó͘-khùi.
24:24 I-che-kel ē ánne chò lín ê tiāu-thâu, só͘-ū i só͘ kiâⁿ ê, lín mā ē ánne kiâⁿ. Chit-ê tāichì nā kàu, lín chiū chai Góa sī Siōng-chú. '"
24:25 Siōng-chú kóng, " Jîn-chú, tng Góa tû-khì in só͘ óa-khò ê, in só͘ hoaⁿ-hí ê êng-kng kah in ê ba̍k-chiu só͘ ì-ài ê, í-ki̍p in ê sim só͘ thiàⁿ-sioh ê, to̍h-sī in ê kiáⁿ-jî.
24:26 Hit ji̍t, tit tio̍h thoat-lī ê lâng kám bô lâi lí chia hō͘ lí chhin-hīⁿ thiaⁿ tio̍h chit-ê tāichì?
24:27 Tng hit ji̍t, lí ê chhùi chiū khui, lí chiū kah tit tio̍h thoat-lī ê lâng kóng-ōe, bô koh é-káu. Lí ē ánne chò in ê tiāu-thâu, in chiū ē chai Góa sī Siōng-chú. "
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。