以西结书 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
17:1 Tōa Eng kah Phû-tô Chhiū ê Phì-jū
Siōng-chú ê ōe lîm-kàu góa, kóng,
17:2 " Jîn-chú, lí tio̍h tùi I-su-la-el ê chú-bîn chhut bī-chhai, siat phì-jū,
17:3 kóng chì-koân Siōng-chú ánne kóng: Ū chi̍t chiah tōa eng, si̍t-kó͘ tōa, si̍t-bóe tn̂g, mn̂g-chháu cha̍t, ū ngó͘-chhái-sek, poe kàu Le-ba-nòng, chhú pek-hiuⁿ chhiū tiong-ki ê ki bóe,
17:4 at-tn̄g i siōng bóe-liu ê chíⁿ ki, the̍h kàu senglí-tiûⁿ, hē tī bé-bē ê lâng ê siâⁿ.
17:5 Koh chhú hit só͘-chāi ê chéng, chai tī pûi tē, chhah tī chin chē chúi ê piⁿ-á, chhin-chhiūⁿ chai liú-chhiū,
17:6 chiū chiām-chiām tōa châng, chiâⁿ-chò pha-tîn kē-kē ê phû-tô chhiū. I ê ki choán-ǹg hit chiah eng, kin iû-goân tī goân-pún ê thô͘ té, chiū ánne chiâⁿ-chò phû-tô chhiū, seⁿ ki hoat tîn.
17:7 " Koh ū chi̍t chiah tōa eng, si̍t tōa, mn̂g cha̍t, lí khòaⁿ, chit-ê phû-tô chhiū tùi chai-chèng ê só͘-chāi oan i ê kin ǹg i, hoat i ê ki ǹg i, ǹg-bāng i lâi koàn-ak.
17:8 I chai tī pûi tē, chin chē chúi ê piⁿ-á, thang hoat ki kiat kóe-chí, chiâⁿ-chò hó ê phû-tô chhiū.
17:9 " Lí tio̍h kóng, chì-koân Siōng-chú ánne kóng: Chit-ê phû-tô chhiū kám ē hoat-ām? Eng kám bē poe̍h i ê kin, tû i ê kóe-chí, hō͘ i ta-.khì? Hō͘ i iù ê hio̍h lóng ta-.khì, mā m̄-bián ēng tōa la̍t kah chin chē lâng lâi poe̍h-chhut i ê kin.
17:10 I sûi-jiân í-keng chai-chèng, kám ē bō͘-sēng? Tang hong chi̍t ē chhoe, kám bē lóng ta-.khì? It-tēng ē tī i seng-tióng ê só͘-chāi ta-.khì. "
17:11 Kái-soeh Phì-jū
Siōng-chú ê ōe koh lîm-kàu góa, kóng,
17:12 " Lí tio̍h kā hit-ê pōe-ge̍k ê ke kóng: Lín kám m̄-chai chiahê sī siáⁿ-mi̍h ì-sù? Lí tio̍h kā in kóng, Ba-bú-lông ông lâi-kàu Ê-lú-sa-lèm, lia̍h i ê kun-ông kah kùi-cho̍k, kā in lia̍h khì-kàu Ba-bú-lông hia.
17:13 Tùi ông-chhin ê tiong-kan kéng chi̍t-ê lâng, kah i li̍p-iok, kah i chiùchōa, koh lia̍h kok lāi ū sè-le̍k ê lâng,
17:14 beh hō͘ kok pi-bî bē tàng chū-kiông, to̍k-to̍k siú bêng-iok chiah ē-tàng tit tio̍h pó-chûn.
17:15 " Chóng-.sī, i pōe-poān, chhe sù-chiá khì Ai-gi̍p, ài in hō͘ i bé kah chin chē peng. I kám ē heng-thong? Kiâⁿ chit khoán tāichì ê lâng kám ē-tàng tô-thoat? Kám kóng pōe-iok iáu cháu ē lī?
17:16 Chì-koân Siōng-chú kóng: Góa kí kakī ê éng-oán oa̍h-miā lâi chiùchōa, Ba-bú-lông ông siat-li̍p i chò ông. I kèng-jiân biáu-sī chiùchōa ê ōe, ûi-pōe só͘ li̍p ê iok. In-ūi ánne, i it-tēng ē sí tī Ba-bú-lông ông só͘ tiàm ê só͘-chāi.
17:17 Tng in khí thô͘-tui, chō tâi beh bia̍t-bông chin chē lâng ê sî, Hôa-láu chhōa tōa tūi peng kah chin chē lâng lâi, mā bē tī kau-chiàn tiong kā i pang-chān.
17:18 I pōe-iok lâi biáu-sī chiùchōa, lí khòaⁿ, i í-keng tâu-hâng, iáu koh chò-chhut chiahê tāichì, i it-tēng bē tàng tô-thoat. "
17:19 Só͘-í, chì-koân Siōng-chú ánne kóng, " Góa kí Góa ê éng-oán oa̍h-miā lâi chiùchōa, i í-keng khòaⁿ-khin Góa só͘ chiù ê chōa, pōe-ge̍k kah Góa só͘ li̍p ê iok, Góa beh kā chit-ê chōe kui tī i ê thâu-khak.
17:20 Góa beh ēng Góa ê bāng pha tī i ê sin chiūⁿ, i ē hō͘ Góa ê oa̍h-tauh tauh-.tio̍h. Góa beh chhōa i khì-kàu Ba-bú-lông, mā beh tī hia sím-mn̄g i ûi-hoān Góa ê chōe.
17:21 I ê kun-tūi tiong-kan tô-cháu ê, lóng ē tó tī to hā; só͘ chhun lo̍h-.lâi ê, mā ē sì-sòaⁿ khì tī sì-hng. Lín chiū ē chai kóng chit-ê ōe ê sī Góa — Siōng-chú. "
17:22 Siōng-chú Só͘ Èng-ín ê Ǹg-bāng
Chì-koân Siōng-chú ánne kóng, " Góa mā beh chhú pek-hiuⁿ chhiū tiong-kan ki koân ê bóe-liu lâi chai, mā beh tùi chíⁿ ki ê bóe-liu at-tn̄g i nńg ê ki, lâi chai tī koân-koân ê soaⁿ;
17:23 Góa beh kā i chai tī I-su-la-el koân-tē ê soaⁿ, i chiū khui ki kiat chí, chiâⁿ-chò hó ê pek-hiuⁿ chhiū, kok chióng ê poe-chiáu ē hioh tī i ê ē-bīn, hioh tī i ê ki ê ìm-ńg ē.
17:24 Chhân-iá ê chhiū-ba̍k lóng ē chai, Góa — Siōng-chú hō͘ koân ê chhiū kàng kē, kē ê chhiū seng koân, chheⁿ-chhùi ê chhiū ta-.khì, ta-.khì ê chhiū bō͘-sēng. Góa — Siōng-chú ánne kóng, mā ánne kā i chiâⁿ. "
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。