以西结书 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
13:1 Chek-pī Ké Sian-ti
Siōng-chú ê ōe lîm-kàu góa, kóng,
13:2 " Jîn-chú, lí tio̍h soan-pò͘ lâi kong-kek I-su-la-el tiong hiahê teh soan-pò͘ ê sian-ti, kā hiahê chiàu i kakī ê sim-ì lâi soan-pò͘ ê kóng, ' Lín tio̍h thiaⁿ Siōng-chú ê ōe. "
13:3 " Chì-koân Siōng-chú ánne kóng: Hiahê gû-gōng ê sian-ti, in ū chai-hō à, in chiàu kakī ê sim-sîn lâi kiâⁿ, pēng bô khòaⁿ tio̍h chi̍t hāng.
13:4 I-su-la-el lâng, lí ê sian-ti chhin-chhiūⁿ pha-hng ê só͘-chāi ê hô͘-lî,
13:5 lín m̄ bat chiūⁿ-kàu phòa-khiah ê só͘-chāi, mā m̄ bat ūi tio̍h I-su-la-el ê chú-bîn ûi chi̍t-ê chhiûⁿ, thang tī Siōng-chú ê ji̍t, chiàn-tīn khiā ē tiâu.
13:6 In só͘ khòaⁿ-.tio̍h ê sī hi-ké, sī pe̍h-chha̍t ê chiam-pok. In kóng che sī Siōng-chú kóng ê, kî-si̍t Siōng-chú bô chhe in chò sian-ti, in iáu teh ǹg-bāng hit-ê ōe ē èng-giām.
13:7 Lín kám m̄-sī ū khòaⁿ tio̍h hi-ké ê ī-siōng? Kám m̄-sī kóng pe̍h-chha̍t ê chiam-pok? Lín kóng che sī Siōng-chú kóng ê, kî-si̍t Góa bô chhe in ánne kóng. "
13:8 Só͘-í, chì-koân Siōng-chú ánne kóng, " In-ūi lín só͘ kóng ê sī hi-ké, só͘ khòaⁿ ê sī pe̍h-chha̍t. Lí khòaⁿ, in-ūi ánne, Góa kah lín chò tùi. Che sī chì-koân Siōng-chú kóng ê.
13:9 Góa ê chhiú beh kong-kek hiahê khòaⁿ tio̍h hi-ké, ēng pe̍h-chha̍t chiam-pok ê sian-ti, in it-tēng bô sio̍k tī Góa ê chú-bîn ê hōe tiong, bô kì tī I-su-la-el ê chú-bîn ê lâng-miâ phō͘, mā bē tàng chìn-ji̍p I-su-la-el tē; lín chiū ē chai Góa sī chì-koân Siōng-chú.
13:10 In-ūi in iú-he̍k Góa ê chú-bîn, kóng, ' Pêng-an! ' Kî-si̍t bô ū pêng-an; to̍h-sī chhin-chhiūⁿ lâng teh khí chhiûⁿ-piah, in kā i chhéng hoe-chúi.
13:11 Só͘-í, lí tio̍h tùi hiahê chhéng hoe-chúi ê lâng kóng, ' Chhiûⁿ ē tó-hoāi, ē ū tiòng-chúi ê tōa hō͘. Ē lo̍h tōa-pha̍uh, koh ē ū tōa hong kā i chhoe li̍h-.khì. '
13:12 Lí khòaⁿ, chhiûⁿ tó liáu-āu, lâng kám bē tùi lín kóng, ' Lín só͘ chhéng ê hoe-chúi, taⁿ tī tó-ūi? '"
13:13 Só͘-í, chì-koân Siōng-chú ánne kóng, " Góa beh tī Góa ê tōa siū-khì, ēng kông hong kā i thiah-li̍h, tī Góa ê siū-khì ē ū tiòng-chúi ê tōa hō͘, mā tī Góa ê tōa siū-khì ē lo̍h tōa pha̍uh lâi kā i húi-bia̍t.
13:14 Góa beh ánne thiah-húi lín chhéng hoe-chúi ê chhiûⁿ, thiah kàu pêⁿ-tē, tì-sú chhiûⁿ-ki lō͘-hiān, chhiûⁿ ē tó-hoāi, lín mā ē tī hit tiong-kan bia̍t-bông. Lín chiū ē chai Góa sī Siōng-chú.
13:15 " Góa beh ánne chiâⁿ Góa ê tōa siū-khì tī hit-ê chhiûⁿ kah chhéng hoe-chúi ê lâng, mā beh tùi lín kóng, ' Chhiûⁿ bô-.khì à, chhéng hoe-chúi ê lâng mā sí-.khì à. '
13:16 Che to̍h-sī I-su-la-el ê sian-ti, in kí Ê-lú-sa-lèm lâi soan-pò͘, in-ūi i khòaⁿ tio̍h pêng-an ê ī-siōng, kî-si̍t bô pêng-an. Che sī chì-koân Siōng-chú kóng ê. "
13:17 Chek-pī Ké ê Lú-sian-ti
Siōng-chú kóng, " Jîn-chú, lí tio̍h bīn ti̍t-ti̍t ǹg lí ê jîn-bîn ê chabó͘ lâng, to̍h-sī chiàu i ê sim-ì lâi soan-pò͘ ê, lí tio̍h soan-pò͘ lâi kong-kek i,
13:18 kóng, chì-koân Siōng-chú ánne kóng, ' Chiahê chabó͘ lâng ū chai-hō à, in kā chèng lâng ê chhiú-khiau pa̍k siâ-su̍t tòa, kā ta̍k chióng sin-châi ê lâng chò tà thâu-khak ê phè, ánne lâi chhiúⁿ lâng ê sîn-hûn. Kám kóng lín chhiúⁿ Góa ê chú-bîn ê sîn-hûn sī ūi tio̍h beh lī-ek kakī lâi kiù-oa̍h sîn-hûn?
13:19 Lín ūi tio̍h kúi-nā pé tōa-be̍h, kúi-nā tè piáⁿ, tī Góa ê chú-bîn tiong-kan siat-to̍k Góa, tùi Góa hiahê ài thiaⁿ pe̍h-chha̍t ōe ê jîn-bîn kóng pe̍h-chha̍t, hāi-sí hiahê bô eng-kai sí ê sîn-hûn, mā hō͘ bô eng-kai oa̍h ê sîn-hûn oa̍h khí-.lâi. '"
13:20 Só͘-í, chì-koân Siōng-chú ánne kóng, " Lí khòaⁿ, Góa hoán-tùi lín ê siâ-su̍t tòa, to̍h-sī lín só͘ ēng lâi chhiúⁿ sîn-hûn hō͘ i poe-.khì ê. Góa beh tùi lín ê chhiú kā siâ-su̍t tòa thiah khí-.lâi; Góa beh tháu-pàng hiahê sîn-hûn, to̍h-sī lín só͘ chhiúⁿ-.khì ê sîn-hûn lâi hō͘ in poe-.khì ê.
13:21 Góa mā beh thiah-li̍h lín hiahê phè, kiù Góa ê chú-bîn thoat-lī lín ê chhiú, bô koh siū chhiúⁿ tī lín ê chhiú lāi. Lín chiū ē chai Góa sī Siōng-chú.
13:22 " In-ūi hit khoán gī lâng, Góa bô beh hō͘ i siong-sim, lín ēng pe̍h-chha̍t ōe hō͘ i siong-sim, jî-chhiáⁿ lín kian-kò͘ pháiⁿ lâng ê chhiú, hō͘ i bô oa̍t thâu lī-khui i ê pháiⁿ lō͘, lâi tit tio̍h oa̍h.
13:23 Só͘-í, lín bē tàng koh khòaⁿ tio̍h hi-ké, mā bē tàng koh chiam-pok. Góa beh kiù Góa ê chú-bîn thoat-lī lín ê chhiú. Lín chiū ē chai Góa sī Siōng-chú. "
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。