以西结书 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
10:1 Siōng-chú ê Êng-iāu Lī-khui Sèng-tiān
Góa koan-khòaⁿ, khòaⁿ tio̍h ki-lō͘-peng thâu-khak téng kah kiong-chhong ê tiong-kan, ū chhin-chhiūⁿ nâ-sek ê pó-chio̍h, chhin-chhiūⁿ pó-chō ê hêng-siōng ê khoán-sit.
10:2 Siōng-tè tùi hit-ê chhēng iù-tē saⁿ ê lâng kóng, " Lí ji̍p-.khì, tī tńg-se̍h ê lián ê tiong-kan, ki-lō͘-peng í-hā, tùi ki-lō͘-peng ê tiong-kan the̍h teh to̍h ê hóe-thòaⁿ móa nn̄g chhiú, iā tī siâⁿ téng. " Góa chiū chhin-ba̍k khòaⁿ tio̍h hit-ê lâng ji̍p-.khì.
10:3 I ji̍p-khì ê sî, ki-lō͘-peng khiā tī tiān ê chiàⁿ pêng, hûn chhiong-móa lāi-īⁿ.
10:4 Siōng-chú ê êng-kng tùi ki-lō͘-peng hia chiūⁿ-.khì, thêng tī tiān ê hō͘-tēng ê téng-bīn; tiān ū hûn móa-móa, hit-ê īⁿ mā hō͘ Siōng-chú êng-kng ê chhàn-lān chhiong-móa.
10:5 Ki-lō͘-peng ê si̍t ê siaⁿ thoân kàu gōa-īⁿ, chhin-chhiūⁿ choân-lêng Siōng-tè teh kóng-ōe ê siaⁿ.
10:6 Siōng-chú hoan-hù hit-ê chhēng iù-tē saⁿ ê lâng kóng, " Tio̍h tùi tńg-se̍h ê lián ê tiong-kan kah ki-lō͘-peng ê tiong-kan chhú hóe. " Hit sî, i chiū ji̍p-.khì, khiā tī chi̍t-ê lián ê piⁿ-á.
10:7 Ū chi̍t-ê ki-lō͘-peng chhun-chhut i ê chhiú, chhun-kàu ki-lō͘-peng tiong-kan ê hóe, the̍h kóa khí-.lâi, hē tī chhēng iù-tē saⁿ ê lâng ê nn̄g ki chhiú; hit-ê lâng kā i the̍h-.lâi, chiū chhut-.khì.
10:8 Tī ki-lō͘-peng ê si̍t-ē, ū hián-chhut lâng ê chhiú ê khoán-sit.
10:9 Góa koh koan-khòaⁿ, khòaⁿ tio̍h ki-lō͘-peng ê piⁿ-á ê sì-ê lián; chit-ê ki-lō͘-peng ê piⁿ-á ū chi̍t-ê lián, hit-ê ki-lō͘-peng ê piⁿ-á mā ū chi̍t-ê lián; lián ê khoán-sit chhin-chhiūⁿ n̂g-ge̍k ê sek-tì.
10:10 Kóng tio̍h in ê khoán-sit, sì-ê lóng kâng chi̍t-iūⁿ ê hêng-chōng, chhin-chhiūⁿ lián tiong ū lián.
10:11 Kiâⁿ ê sî, sì-bīn lóng ē kiâⁿ-.tit, kiâⁿ ê sî m̄-bián oa̍t. Thâu ǹg siáⁿ-mi̍h só͘-chāi, in chiū tòe i kiâⁿ, kiâⁿ ê sî m̄-bián oa̍t.
10:12 In choân seng-khu, in ê kha-chiah-phiaⁿ, in ê chhiú, in ê si̍t kah lián, sì-kho͘-ûi lóng ū ba̍k-chiu móa-móa; to̍h-sī in sì-ê só͘-ū ê lián.
10:13 Kóng tio̍h chiahê lián, góa hīⁿ-khang tiong ū thiaⁿ tio̍h kóng " Tńg-se̍h " ê.
10:14 Tāk-ê ū sì-ê bīn, thâu chi̍t-ê bīn sī ki-lō͘-peng ê bīn, tē-jī-ê bīn sī lâng ê bīn, tē-saⁿ-ê bīn sī sai ê bīn, tē-sì-ê bīn sī eng ê bīn.
10:15 Ki-lō͘-peng lóng chiūⁿ-.khì; che sī góa tī Ke-bal hô piⁿ só͘ bat khòaⁿ-.tio̍h ê oa̍h-mi̍h.
10:16 Ki-lō͘-peng kiâⁿ, lián mā tī piⁿ-á teh kiâⁿ; ki-lō͘-peng thí-khui si̍t tùi tē-chiūⁿ-.khì, lián mā bô oa̍t tńg-sin lī-khui in ê sin piⁿ.
10:17 Hiahê thêng, chiahê mā thêng; hiahê chiūⁿ-.khì, chiahê mā chò-hóe chiūⁿ-.khì; in-ūi oa̍h-mi̍h ê sîn-lêng tī in ê lāi-bīn.
10:18 Siōng-chú ê êng-kng tùi tiān ê hō͘-tēng téng chhut-.khì, thêng tī ki-lō͘-peng ê téng-bīn.
10:19 Ki-lō͘-peng chhut-khì ê sî chiū thí-khui si̍t, tī góa ê ba̍k-chiu chêng tùi thô͘-kha chiūⁿ-.khì, lián mā tī in ê sin piⁿ, thêng tī Siōng-chú ê tiān tang-mn̂g ê mn̂g-kháu. Tī in ê téng-bīn, ū I-su-la-el Siōng-tè ê êng-kng.
10:20 Che sī góa chá-chêng tī Ke-bal hô piⁿ só͘ khòaⁿ tio̍h I-su-la-el Siōng-tè ē-bīn ê oa̍h-mi̍h, góa chai in sī ki-lō͘-peng.
10:21 Ta̍k-ê ū sì-ê bīn, ta̍k-ê ū sì-ê si̍t; in ê si̍t-ē ū lâng ê chhiú ê hêng-siōng.
10:22 Kóng tio̍h in ê bīn ê hêng-siōng, to̍h-sī góa chá-chêng tī Ke-bal hô piⁿ só͘ khòaⁿ-.tio̍h ê bīn; in ê khoán-sit, in ê seng-khu, lóng sī ánne, lóng ta̍k-ê ti̍t-ti̍t kiâⁿ-.khì.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。