耶利米书 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
24:1 Nn̄g Lôa Bû-hoa-kó
Ba-bú-lông ông Nep-kat-ne-chal kā Iô-tah ông E-hō͘-iá-kim ê kiáⁿ Ia-ko-niah kah Iô-tah ê kùi-cho̍k, í-ki̍p kang-chhiūⁿ, thih-chhiūⁿ, tùi Ê-lú-sa-lèm lia̍h khì-kàu Ba-bú-lông. Chit-ê tāichì liáu-āu, Siōng-chú kí hō͘ góa khòaⁿ, ū nn̄g lôa ê bû-hoa-kó, hē tī Siōng-chú ê tiān chêng.
24:2 Chi̍t lôa té siōng hó ê bû-hoa-kó, chhin-chhiūⁿ khí-thâu se̍k ê bû-hoa-kó; chi̍t lôa té chin bái ê bû-hoa-kó, bē chia̍h-tit, in-ūi chin bái.
24:3 Siōng-chú chiū kā góa kóng, " I-é-lí-miah, lí khòaⁿ tio̍h siáⁿ-mi̍h? " Góa ìn kóng, " Bû-hoa-kó, hó ê chin hó, bái ê chin bái, bē chia̍h-tit, in-ūi chin bái. "
24:4 Siōng-chú ê ōe koh lîm-kàu góa, kóng,
24:5 " Góa — Siōng-chú — I-su-la-el ê Siōng-tè ánne kóng: Siū lia̍h-.khì ê Iô-tah lâng, to̍h-sī Góa chhe in lī-khui chit só͘-chāi kàu Kal-tí-ah lâng ê tē ê, Góa beh kā in khòaⁿ-chò chhin-chhiūⁿ chiahê hó ê bû-hoa-kó, hō͘ in tit tio̍h hok-khì.
24:6 Góa beh kā in chiàu-kò͘, hō͘ in tit tio̍h hok-khì, chhōa in tńg-lâi chit só͘-chāi. Góa mā beh kā in kiàn-li̍p, bē koh húi-hoāi in; Góa beh kā in chai-pôe, bô beh kā i poe̍h khí-.lâi.
24:7 Góa beh hō͘ in ū hit khoán sim, ē bat Góa, chai Góa sī Siōng-chú. In ē chò Góa ê chú-bîn, Góa beh chò in ê Siōng-tè, in-ūi in ē chi̍t-sim kui-ǹg Góa. "
24:8 Siōng-chú ánne kóng, " Nā-sī Iô-tah ông Che-ti-kiah kah i chiahê kùi-cho̍k, í-ki̍p Ê-lú-sa-lèm só͘ chhun lo̍h-.lâi iáu lâu tī chit só͘-chāi ê jîn-bîn, í-ki̍p tòa tī Ai-gi̍p tē ê, Góa kā in khòaⁿ-chò chhin-chhiūⁿ chiahê bái ê bû-hoa-kó, bē chia̍h-tit, in-ūi chin bái.
24:9 Góa beh kā in kau chhut-.lâi, hō͘ in tī thian-hā bān-kok liû-lōng, tú tio̍h kan-khó͘, mā tī Góa kóaⁿ in kàu ê ta̍k só͘-chāi, chiâⁿ-chò lêng-jio̍k, chò ōe-pèⁿ, chò khau-sé, chò chiù-chó͘.
24:10 Góa beh hō͘ to-kiàm, hō͘ ki-hng, hō͘ un-e̍k lîm-kàu in tiong-kan, ti̍t-kàu in tī Góa só͘ siúⁿ-sù hō͘ in kah in chó͘-sian ê tē siū châu-bia̍t. "
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。