耶利米书 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
23:1 Chiong-lâi ê Ǹg-bāng
Siōng-chú kóng, " Bo̍k-chiá chân-hāi Góa ê chháu-tiûⁿ ê iûⁿ, hō͘ i sì-sòaⁿ, in ē ū chai-hō! "
23:2 Só͘-í, I-su-la-el ê Siōng-tè — Siōng-chú chek-pī hiahê iúⁿ-chhī góa ê jîn-bîn ê bo̍k-chiá, ánne kóng, " Lín phah-sòaⁿ Góa ê iûⁿ-kûn, lâi kā in kóaⁿ chhut-.khì, bô khòaⁿ-kò͘ in; lí khòaⁿ, Góa beh chiàu lín só͘ kiâⁿ ê pháiⁿ lâi pān lín. Che sī Siōng-chú kóng ê.
23:3 Góa beh chū-chi̍p Góa ê iûⁿ-kûn só͘ chhun lo̍h-.lâi ê, tùi Góa só͘ kóaⁿ in khì-kàu ê ta̍k kok, chhōa in koh tńg-lâi in ê tiâu, hō͘ in seⁿ-thòaⁿ chin chē.
23:4 Góa beh siat-li̍p bo̍k-chiá kā in tī-lí, kā in iúⁿ-chhī. Hō͘ in bô koh kiaⁿ-hiâⁿ tio̍h-kiaⁿ kah gāng-.khì, mā bô kiám-chió. Che sī Siōng-chú kóng ê. "
23:5 Siōng-chú kóng, " Ji̍t-chí teh beh kàu, Góa beh kā Ta-bi̍t heng-khí gī ê ki; i ē chò ông lâi tī-lí, chò tāichì ū tì-hūi, tī tē-chiūⁿ kiâⁿ kong-pêⁿ kah kong-gī.
23:6 Tng i ê ji̍t, Iô-tah ē tit tio̍h kiù, I-su-la-el ē an-jiân tòa tī hia. I ê miâ beh kiò-chò ' Siōng-chú — lán ê gī. '"
23:7 Siōng-chú kóng, " Lí khòaⁿ, ji̍t-chí teh beh kàu, lâng ē kí Siōng-chú ê éng-oán oa̍h-miā lâi chiùchōa, bô beh kóng I sī chhōa I-su-la-el ê kiáⁿ-sun tùi Ai-gi̍p tē chhut-.lâi ê.
23:8 In kí Siōng-chú ê éng-oán oa̍h-miā lâi chiùchōa, sī beh kóng I chhōa I-su-la-el ê kiáⁿ-sun tùi pak-hong ê tē lâi, mā tùi kiàn-nā Góa só͘ kóaⁿ in kàu ê tē lâi. In ē tòa tī pún só͘-chāi. "
23:9 Tùi Ké Sian-ti ê Kéng-kò
Kóng tio̍h hiahê sian-ti, góa ê sim tī góa ê lāi-bīn iu-siong, góa ê kut lóng gī-gī chhoah; ūi tio̍h Siōng-chú kah I sèng ê ōe, góa chhin-chhiūⁿ chiú-chùi ê lâng, chhin-chhiūⁿ hō͘ chiú só͘ khah iâⁿ ê lâng.
23:10 In-ūi tē-hng móa-.sī kiâⁿ kan-îm ê lâng! Koh in-ūi tú tio̍h chiù-chó͘, tē chiū pi-ai; khòng-iá ê chháu-tiûⁿ lóng ta-.khì. In só͘ kiâⁿ ê lō͘ to̍h-sī pháiⁿ; in ê sè-le̍k bô chèng-ti̍t.
23:11 Liân sian-ti kah chè-si to sī siat-to̍k ê, to̍h-sī tī Góa ê chhù lāi, Góa mā khòaⁿ tio̍h in ê pháiⁿ. Che sī Siōng-chú kóng ê.
23:12 In-ūi ánne, in ê lō͘ ē chhin-chhiūⁿ o͘-àm tiong ku̍t-ku̍t ê tē, in ē tú tio̍h kóaⁿ-tio̍k, tī hia poa̍h-tó; tng pān-lí in ê nî, góa beh hō͘ chai-hō lîm-kàu tī in. Che sī Siōng-chú kóng ê.
23:13 Tī Sa-má-lī-a ê sian-ti, Góa í-keng khòaⁿ tio̍h in ê gû-gōng; in thok Ba-al lâi ī-giân, hō͘ Góa ê chú-bîn — I-su-la-el kiâⁿ chhe-lō͘.
23:14 Tī Ê-lú-sa-lèm ê sian-ti, Góa í-keng khòaⁿ tio̍h khó-ò͘ⁿ ê tāichì; in kiâⁿ kan-îm, chò tāichì hi-ké, koh chō͘ pháiⁿ lâng ê chhiú ná ū la̍t, tì-sú bô lâng hôe-thâu lī-khui i ê pháiⁿ. In tī Góa ê bīn-chêng, lóng chhin-chhiūⁿ So͘-tóm, tòa tī hia ê jîn-bîn lóng chhin-chhiūⁿ Am-mo͘-la̍h.
23:15 Só͘-í, bān-kun ê Siōng-chú kóng tio̍h chiahê sian-ti ū ánne kóng: Lí khòaⁿ, Góa beh ēng in-tîn hō͘ in chia̍h, koh ēng khó͘ ê chúi hō͘ in lim; in-ūi siat-to̍k ê tāichì chhut tī Ê-lú-sa-lèm ê sian-ti, liû-hêng kàu choân tē.
23:16 Bān-kun ê Siōng-chú tùi Ê-lú-sa-lèm jîn-bîn ánne kóng, " Chiahê sian-ti tùi lín ī-giân ê, lín m̄ thang thiaⁿ in ê ōe. In ēng hi-ké kà-sī lín, in só͘ kóng ê ī-siōng sī chhut tī in ê sim, m̄-sī chhut tī Siōng-chú ê chhùi.
23:17 In tiāⁿtiāⁿ tùi biáu-sī Góa ê lâng kóng, ' Siōng-chú kóng lín ē hióng-siū pêng-an', koh tùi só͘-ū chiàu in ê ngē-sim lâi kiâⁿ ê lâng kóng, ' Tek-khak bē ū chai-hō lîm-kàu lín. '"
23:18 Siáⁿ lâng kah Siōng-chú khè-ha̍p, tit tio̍h thiaⁿ I ê ōe lâi bêng-pe̍k? Siáⁿ lâng chù-ì teh thiaⁿ I ê ōe?
23:19 Lí khòaⁿ, Siōng-chú ê siū-khì chhin-chhiūⁿ tōa hong hoat-chhut; to̍h-sī chin thàu ê kńg-lê-á hong, ē tńg-se̍h lâi kong-kek pháiⁿ lâng ê thâu-khak.
23:20 Siōng-chú ê sim só͘ gí-tiāⁿ ê iáu-bōe chò, iáu-bōe chiâⁿ, I ê siū-khì it-tēng bô tò-tńg, ji̍t-āu lín ē thiat-té bêng-pe̍k.
23:21 Siōng-chú kóng, " Hiahê sian-ti, Góa bô chhe in, in kakī cháu; Góa bô tùi in kóng, in kakī soan-pò͘.
23:22 In nā kah Góa khè-ha̍p, chiū it-tēng hō͘ Góa ê chú-bîn thiaⁿ Góa ê ōe, hō͘ in hôe-thâu lī-khui in ê pháiⁿ lō͘ kah in só͘ kiâⁿ ê pháiⁿ. "
23:23 Siōng-chú ánne kóng, " Góa kám chò kīn ê Siōng-chú, bô chò hn̄g ê Siōng-chú? "
23:24 Lâng kám ē bih tī ún-ba̍t ê só͘-chāi, hō͘ Góa khòaⁿ bē tio̍h i? " Siōng-chú koh kóng, " Góa kám bô chhiong-móa tī thiⁿ-tē?
23:25 Góa í-keng thiaⁿ tio̍h hiahê sian-ti só͘ kóng ê, to̍h-sī thok Góa ê miâ soan-pò͘ pe̍h-chha̍t, in kóng, ' Góa ū bāng-kìⁿ! Góa ū bāng-kìⁿ! '
23:26 Soan-thoân pe̍h-chha̍t ê sian-ti, to̍h-sī soan-pò͘ in ê sim ê kúi-chà, in chûn chit khoán ê sim beh kàu tang-sî?
23:27 In ta̍k lâng kā só͘ bāng-.tio̍h ê chò-hóe kóng-khí, siūⁿ beh hō͘ Góa ê chú-bîn bē kì-tit Góa ê miâ, chhin-chhiūⁿ in ê chó͘-sian in-ūi Ba-al lâi bē kì-tit Góa ê miâ.
23:28 Sian-ti nā ū bāng-kìⁿ thang kóng-khí i ê bāng; tit tio̍h Góa ê ōe ê, tio̍h ēng sêng-si̍t thoân Góa ê ōe. Chho͘-khng kah be̍h-á ná ē pí-.tit? Che sī Siōng-chú kóng ê. "
23:29 Siōng-chú kóng, " Góa ê ōe kám m̄-sī chhin-chhiūⁿ hóe, koh chhin-chhiūⁿ ē phah-phòa chio̍h-pôaⁿ ê tōa thûi?
23:30 Siōng-chú kóng, " Lí khòaⁿ, hiahê sian-ti tùi i ê tâng-phōaⁿ thau-the̍h Góa ê ōe ê, Góa lâi kā in kong-kek. "
23:31 Siōng-chú kóng, " Hiahê sian-ti ēng chhùi-chi̍h kóng, che sī Siōng-chú kóng ê; Góa kā in kong-kek. "
23:32 Siōng-chú kóng, " Lí khòaⁿ, hiahê ēng ké ê bāng lâi chò sian-ti ê, in kóng-khí in ê bāng, mā ēng in ê pe̍h-chha̍t kah in ê hong-hàm hō͘ Góa ê chú-bîn kiâⁿ chhe-lō͘, Góa kā in kong-kek. In-ūi Góa bô chhe in, mā bô bēng-lēng in, in lóng bô lī-ek tio̍h chiahê jîn-bîn. Che sī Siōng-chú kóng ê. "
23:33 Siōng-chú ê Tāng tàⁿ
Siōng-chú tùi I-é-lí-miah kóng, " Nā chiahê jîn-bîn, á-.sī sian-ti, á-.sī chè-si mn̄g lí, kóng, ' Siōng-chú ū siáⁿ-mi̍h tāng-tàⁿ ê be̍k-sī? ' Lí tio̍h kā in kóng, ' Sím-mi̍h tāng-tàⁿ ê be̍k-sī! Siōng-chú kóng: Góa to̍h-sī beh khì-sak lín. '
23:34 Kiàn-nā sian-ti, á-.sī chè-si, á-.sī jîn-bîn kóng ' Siōng-chú tāng-tàⁿ ê be̍k-sī ê ', hit khoán lâng, Góa beh kā i kah i ê ke hêng-hoa̍t.
23:35 Lín ta̍k lâng tùi i ê chhù-piⁿ, ta̍k lâng tùi i ê hiaⁿ-tī tio̍h ánne kóng, ' Siōng-chú ū ìn siáⁿ-mi̍h? Siōng-chú ū kóng siáⁿ-mi̍h? '
23:36 ' Siōng-chú tāng-tàⁿ ê be̍k-sī ' chit kù, lín m̄ thang koh kóng, in-ūi ta̍k lâng só͘ kóng ê ōe ē chiâⁿ-chò in pún-sin ê tāng-tàⁿ. In-ūi lín kā éng-oán oa̍h ê Siōng-tè — bān-kun ê Siōng-chú — lán ê Siōng-tè ê ōe hō͘ i kái oai-chhoa̍h khì.
23:37 Lí tio̍h tùi sian-ti ánne kóng, ' Siōng-chú ìn lí siáⁿ-mi̍h? Siōng-chú kóng siáⁿ-mi̍h? '
23:38 In nā kóng ' Siōng-chú tāng-tàⁿ ê be̍k-sī ', Siōng-chú chiū ánne kóng, ' Góa chhe lâng kàu lín hia, kā lín kóng: M̄-thang kóng Siōng-chú tāng-tàⁿ ê be̍k-sī, lín iáu teh kóng chit kù Siōng-chú tāng-tàⁿ ê be̍k-sī. '
23:39 Só͘-í, Góa beh oân-choân bē kì-tit lín, kā lín kah Góa só͘ siúⁿ-sù hō͘ lín í-ki̍p lín ê chó͘-sian ê siâⁿ, tùi Góa ê bīn-chêng khì-sak;
23:40 koh beh hō͘ éng-oán ê lêng-jio̍k kah kú-tn̂g ê kiàn-siàu lîm-kàu lín, kú-tn̂g bô bē kì-.tit. "
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。