耶利米书 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
21:1 Ī-kò Ê-lú-sa-lèm ê Bia̍t-bông
Che-ti-kiah ông chhe Mal-ki-iah ê kiáⁿ Pa-si-hul kah chè-si Ma-a-se-iah ê kiáⁿ Che-hoán-iah, khì kìⁿ I-é-lí-miah, kóng,
21:2 " Ba-bú-lông ông Nep-kat-ne-chal beh kah lán kau-chiàn, kiû lí thè goán mn̄g Siōng-chú, kiámchhái Siōng-chú ē chiàu I kî-biāu ê só͘ chò khoán-thāi lán, hō͘ i lī-khui lán khì. " Hit sî, Siōng-chú ê ōe lîm-kàu I-é-lí-miah.
21:3 I-é-lí-miah tùi in kóng, lín tio̍h ánne kā Che-ti-kiah kóng,
21:4 " Siōng-chú — I-su-la-el ê Siōng-tè ánne kóng: Lí khòaⁿ, Góa beh hō͘ lín só͘ gia̍h ê kun-khì, to̍h-sī lín tī siâⁿ gōa kah Ba-bú-lông ông, í-ki̍p ûi-khùn lín ê Kal-tí-ah lâng kau-chiàn ê kun-khì tò tńg-.lâi, koh beh hō͘ chiahê lóng chū-chi̍p tī chit-ê siâⁿ lāi.
21:5 Jî-chhiáⁿ Góa tī àu-náu, siū-khì, tōa thòng-hūn ê tiong-kan, ēng chhun-chhut ê chhiú kah tōa koân-lêng ê chhiú-kut, chhin-sin kā lín kong-kek;
21:6 koh beh phah tòa tī chit-ê siâⁿ ê jîn-bîn, bô-lūn lâng kah chengseⁿ; in ē tú tio̍h tōa un-e̍k lâi sí.
21:7 Í-āu Góa beh kā Iô-tah ông Che-ti-kiah kah i ê jîn-sîn, jîn-bîn, to̍h-sī tī chit-ê siâⁿ lāi, tùi un-e̍k, to-kiàm, ki-hng só͘ chhun lo̍h-.lâi ê, lóng kau tī Ba-bú-lông ông Nep-kat-ne-chal ê chhiú kah in ê tùi-te̍k ê chhiú, í-ki̍p siàu-siūⁿ in ê sèⁿ-miā ê lâng ê chhiú. I ē ēng to kā in thâi-sí, bô pó-sioh, bô khó-liân, bô khoan-iông. Che sī Siōng-chú kóng ê. '
21:8 Sòa lo̍h-.lâi, Siōng-chú hoan-hù I-é-lí-miah tùi chiahê jîn-bîn kóng, " Siōng-chú ánne kóng: Lí khòaⁿ, Góa kā oa̍h-lō͘, sí-lō͘ pâi tī lín ê bīn-chêng.
21:9 Tòa tī chit-ê siâⁿ lāi ê ē tùi to-kiàm, tùi ki-hng, tùi un-e̍k lâi sí; to̍k-to̍k chhut-khì tâu-hâng ûi-khùn lín ê Kal-tí-ah lâng ê ē tit tio̍h oa̍h, lâi khioh tio̍h i ê sèⁿ-miā.
21:10 Góa ê bīn tiāⁿtiāⁿ ǹg chit-ê siâⁿ, beh kàng chai-hō, m̄ kàng hok-khì; chit-ê siâⁿ beh kau tī Ba-bú-lông ông ê chhiú, i ē ēng hóe kā i sio. "
21:11 Sím-phòaⁿ Iô-tah ê Ông-ka
Siōng-chú hoan-hù I-é-lí-miah tùi Ta-bi̍t ê āu-tāi — Iô-tah ông ê ke kóng,
21:12 " Lín ta̍k chá-khí tio̍h kiâⁿ kong-pêⁿ, chín-kiù siū chhiúⁿ-kiap ê lâi thoat-lī kiông-pō ê lâng ê chhiú, khióng-kiaⁿ Góa ê siū-khì ē in-ūi lín só͘ kiâⁿ ê pháiⁿ lâi hoat-chok, chhin-chhiūⁿ hóe to̍h khí-.lâi, sīm-chì bô lâng ū hoat-tō͘ phah-hoa.
21:13 Tòa tī soaⁿ-kok, pêng-goân kah chio̍h-pôaⁿ téng ê jîn-bîn, lín kóng, ' Siáⁿ lâng ē lo̍h-lâi kong-kek goán? Siáⁿ lâng ē ji̍p-lâi goán tòa ê só͘-chāi? ' Lí khòaⁿ, Góa kah lín chò tùi-te̍k. "
21:14 Siōng-chú koh kóng, " Góa beh chiàu lín chò tāichì ê kiat-kó lâi kā lín hêng-hoa̍t; Góa mā beh hō͘ hóe to̍h tī i ê chhiū-nâ lāi, sio-húi i ê sì-kho͘-ûi. "
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。