耶利米书 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
20:1 I-é-lí-miah kah Pa-si-hul Chè-si Khí Chhiong-tu̍t
Chè-si Im-mel ê kiáⁿ Pa-si-hul, chò koán Siōng-chú ê tiān ê thâu-lâng,
20:2 I thiaⁿ tio̍h I-é-lí-miah thoân chiahê ōe, Pa-si-hul chiū phah I-é-lí-miah sian-ti, ēng chhâ-kê kā i kê tī Biān-iá-mín téng ê mn̂g, chit-ê mn̂g tī Siōng-chú ê tiān lāi.
20:3 Keh ji̍t, Pa-si-hul khui chhâ-kê, tháu-pàng I-é-lí-miah. I-é-lí-miah chiū tùi i kóng, " Siōng-chú m̄-sī kiò lí ê miâ chò Pa-si-hul, to̍h-sī kiò lí Ma-gol-mi-sa-bí（ Chù, Hi-bú-lâi bûn ê im-tha̍k, ì-sù sī " Sì-kho͘-ûi tit lâng kiaⁿ ". ）
20:4 In-ūi Siōng-chú ánne kóng, ' Lí khòaⁿ, Góa beh hō͘ lí chò lí pún-sin kah lí chèng pêng-iú kiaⁿ-hiâⁿ ê goân-in; in ē tó tī tùi-te̍k ê to hā, lí ē chhin-ba̍k khòaⁿ-.tio̍h. Góa beh kā Iô-tah lâng lóng kau tī Ba-bú-lông ông ê chhiú, i ē kā in lia̍h khì-kàu Ba-bú-lông, ēng to kā in thâi.
20:5 Jî-chhiáⁿ Góa beh kā chit-ê siâⁿ só͘-ū ê châi-bu̍t kah lô-khó͘ só͘ tit tio̍h ê kah it-chhè ê pó-pòe, í-ki̍p Iô-tah hiahê ông ê pó-bu̍t, lóng kau tī in ê tùi-te̍k ê chhiú; tùi-te̍k ē kā in chhiúⁿ-toa̍t, ē kā in lia̍h khí-.lâi, ah in khì-kàu Ba-bú-lông.
20:6 Lí chit-ê Pa-si-hul, lí kah it-chhè tiàm lí chhù lāi ê lâng, lóng ē hō͘ lâng lia̍h-.khì; lí kah lí ê chèng pêng-iú, to̍h-sī lí tùi in thoân ké-ōe ê, lóng ē hông lia̍h khì-kàu Ba-bú-lông, sí tī hia, bâi-chòng tī hia. '"
20:7 I-é-lí-miah Bâi-oàn Siōng-chú
Siōng-chú ah, Lí bat bián-kióng góa, góa mā hō͘ lí bián-kióng; Lí pí góa khah ū la̍t, lâi iâⁿ góa. Góa kui ji̍t chiâⁿ-chò chhiò-ōe, lâng lóng kā góa hì-lāng.
20:8 Góa ta̍k pái khui chhùi ê sî, chiū chhut ai-siong ê siaⁿ, góa tōa-siaⁿ hoah, kiông-pō! Chhiúⁿ-kiap! In-ūi Siōng-chú ê ōe kui ji̍t chiâⁿ-chò góa ê lêng-jio̍k kah khau-sé.
20:9 Góa nā kóng góa bô beh koh thê-khí Siōng-chú, mā bô beh koh thok I ê miâ lâi kóng, tī góa ê sim-lāi chiū ū chhin-chhiūⁿ teh to̍h ê hóe, koaiⁿ ba̍t tī góa ê kut lāi; góa chiū jím bē tiâu, bē tàng kakī khòng-chè.
20:10 Góa thiaⁿ tio̍h chin chē lâng ê húi-pòng, sì-kho͘-ûi lóng sī kiaⁿ-hiâⁿ. Góa ti-kí ê pêng-iú, to̍h-sī teh tng-tán góa poa̍h-tó ê, kóng: Tio̍h kò i, goán mā beh kò i! Kiám-chhái i siū ín-iú, lán chiū ē iâⁿ i, tùi i pò-siû.
20:11 Chóng-.sī, Siōng-chú kah góa tông-chāi, chhin-chhiūⁿ chin thang kiaⁿ ê ióng-sū. Só͘-í, pek-hāi góa ê ē poa̍h-tó, bē tàng iâⁿ; in ē tōa-tōa kiàn-siàu to̍h-sī siū éng bô bē kì-.tit ê làu-khùi, in-ūi in chò tāichì bô tì-hūi.
20:12 Bān-kun ê Siōng-chú ah, Lí sī chhì-liān gī lâng, kàm-chhat lâng ê sim-su ì-liām ê, kiû Lí hō͘ góa khòaⁿ tio̍h Lí tùi in pò-siû, in-ūi góa kā góa ê àn-kiāⁿ pín-bêng tī Lí ê bīn-chêng.
20:13 Lín tio̍h ǹg Siōng-chú chhiùⁿ koa, oló Siōng-chú! In-ūi I kiù sànchhiah lâng ê sèⁿ-miā thoat-lī pháiⁿ lâng ê chhiú.
20:14 Góa chhut-sì ê ji̍t, goān hit-ê ji̍t-chí siū chiù-chó͘; góa ê lāu-bú seⁿ góa ê ji̍t, goān hit-ê ji̍t-chí bô tit tio̍h hok-khì.
20:15 Lâng pò góa ê lāu-pē kóng, " Lí ū seⁿ chapo͘ kiáⁿ! " Hō͘ i chin hoaⁿ-hí ê; goān hit-ê lâng siū chiù-chó͘.
20:16 Goān hit-ê lâng chhin-chhiūⁿ Siōng-chú só͘ chhia-tó ê hiahê siâⁿ, mā bô hō͘-hóe ê; goān i chá-khí sî thiaⁿ tio̍h ai-chhám ê siaⁿ, ji̍t-tiong-tàu thiaⁿ tio̍h hoah-hiàm ê siaⁿ.
20:17 In-ūi I bô tùi thai-.ni̍h hō͘ góa sí, hō͘ góa ê lāu-bú chò góa ê bōng, i ē tiāⁿtiāⁿ tōa pak-tó͘.
20:18 Góa ná ē chhut thai lâi tú tio̍h lô-khó͘ iu-siong, hō͘ góa ê nî-ji̍t in-ūi kiàn-siàu lâi siau-bia̍t?
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。