耶利米书 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
17:1 Iô-tah ê Chōe-ok kah Têng-hoa̍t
Siōng-chú kóng, " Iô-tah ê chōe sī ēng thih-pit, ēng soān-chio̍h pit-bóe kì ê, to̍h-sī khek tī in ê sim ê pi, tôaⁿ ê kak.
17:2 In ê kiáⁿ-jî hoâi-liām in tī koân soaⁿ téng, chheⁿ-chhùi chhiū piⁿ ê tôaⁿ kah ngó͘-siōng.
17:3 Góa chhân-iá ê soaⁿ, góa beh in-ūi lí tī sì-kho͘-ûi só͘ hoān ê chōe, kā lí ê hòe-bu̍t, châi-pó kah soaⁿ-thâu ê tôaⁿ, lóng hō͘ lâng chhiúⁿ-.khì;
17:4 Jî-chhiáⁿ lí ūi tio̍h pún-sin, beh kā góa só͘ siúⁿ-sù ê sán-gia̍p pàng hē-.leh. Góa mā beh hō͘ lí tī só͘ m̄ bat ê tē ho̍k-sāi lí ê tùi-te̍k; in-ūi lín kek góa siū-khì ê hóe, it-ti̍t to̍h kàu éng-oán. "
17:5 Siōng-chú Kàu-tō ê Ōe
Siōng-chú ánne kóng: Kiàn-nā óa-khò lâng, ēng jio̍k-thé chò i ê chhiú, i ê sim lī-khui Siōng-chú ê, hit khoán lâng tio̍h siū chiù-chó͘.
17:6 In-ūi i ē chhin-chhiūⁿ khòng-iá ê tō͘-siông, hok-khì kàu ê sî, i khòaⁿ bē tio̍h, i ē tiàm tī soa-bô͘ ta-sò ê só͘-chāi, bô lâng tòa ê kiâm tē.
17:7 Óa-khò Siōng-chú, lia̍h Siōng-chú chò i só͘ óa-khò ê hit khoán lâng ū hok-khì.
17:8 I ē chhin-chhiūⁿ chúi piⁿ só͘ chai ê chhiū, soan i ê kin tī hô piⁿ, iām-joa̍h kàu mā bô kiaⁿ, hio̍h iû-goân chheⁿ-chhùi, tī ta-sò ê nî, lóng bô chhau-hoân, koh kiat kóe-chí bô soah.
17:9 Lâng ê sim pí bān-mi̍h khah kúi-chà, pháiⁿ kàu ke̍k-thâu, siáⁿ lâng ē chai?
17:10 Góa — Siōng-chú sī kàm-chhat lâng ê sim; chhì-giām lâng ê pak-lāi ê, beh chiàu ta̍k lâng só͘ kiâⁿ ê kah i chò tāichì ê kiat-kó, lâi kā i pò-èng.
17:11 Lâng bô chiàu chèng-tō tit tio̍h chîⁿ, chhin-chhiūⁿ chià-ko͘ pū m̄-sī i kakī seⁿ ê nn̄g; kàu tiong-liân, hit-ê chîⁿ lóng ē lī-khui i, i ê kiat-kio̍k chiâⁿ-chò gû-gōng.
17:12 Goán ê sèng-só͘ sī êng-kng ê pó-chō, tùi khí-thâu to̍h an-tì tī koân ê só͘-chāi.
17:13 I-su-la-el só͘ ǹg-bāng ê Siōng-chú ah, kiàn-nā khì-sak Lí ê, lóng ē kiàn-siàu. Kiàn-nā lī-khui Lí ê, in ê miâ ē kì tī thô͘-kha, in-ūi in khì-sak Siōng-chú oa̍h-chúi ê goân-thâu.
17:14 I-é-lí-miah Kiû Siōng-chú Pang-chō͘
Siōng-chú ah, kiû Lí i-tī góa, góa chiū tit tio̍h i hó; chín-kiù góa, góa chiū tit tio̍h kiù; in-ūi Lí sī góa só͘ oló ê.
17:15 Lí khòaⁿ, lâng tùi góa kóng: Siōng-chú ê ōe tī tó-ūi? Taⁿ tio̍h hō͘ I ê ōe lâi si̍t-hiān!
17:16 Kóng tio̍h góa, góa bô kóaⁿ-kín khì-sak bo̍k-chiá ê chit, m̄ tòe Lí, chai-hō kàu ê ji̍t, m̄-sī góa só͘ ài; che sī Lí só͘ chai, góa ê chhùi só͘ kóng ê, lóng tī Lí ê bīn-chêng.
17:17 M̄-thang chò hō͘ góa kiaⁿ-hiâⁿ ê; tng hoān-lān ê ji̍t. Lí chò góa tô-siám ê só͘-chāi.
17:18 Hō͘ hiahê pek-hāi góa ê lâng kiàn-siàu, m̄ thang hō͘ góa kiàn-siàu; hō͘ in kiaⁿ-hiâⁿ, m̄ thang hō͘ góa kiaⁿ-hiâⁿ; hō͘ chai-hō ê ji̍t lîm-kàu in, ēng ka-pōe ê húi-hoāi lâi kā in húi-hoāi.
17:19 Lūn Siú An-hioh-ji̍t
Siōng-chú tùi góa ánne kóng, " Lí khì khiā tī chèng lâng ê mn̂g, to̍h-sī Iô-tah lia̍t ông tùi hia ji̍p, tùi hia chhut ê, koh khiā tī Ê-lú-sa-lèm chiahê mn̂g,
17:20 tùi in kóng, ' Lín chiahê Iô-tah ông kah Iô-tah kûn-chiòng, kah só͘-ū tòa tī Ê-lú-sa-lèm ê jîn-bîn, só͘-ū tùi chiahê mn̂g chhut-ji̍p ê, lóng tio̍h thiaⁿ Siōng-chú ê ōe.
17:21 Siōng-chú ánne kóng: Lín tio̍h kakī kín-sīn, m̄ thang tī An-hioh-ji̍t taⁿ tàⁿ, mā m̄ thang ūn mi̍h-kiāⁿ ji̍p-khì Ê-lú-sa-lèm chiahê siâⁿ mn̂g;
17:22 mā m̄ thang tī An-hioh-ji̍t tùi chhù lāi taⁿ tàⁿ chhut-.khì, bô-lūn siáⁿ-mi̍h kang lóng m̄ thang chò, to̍k-to̍k tio̍h lia̍h An-hioh-ji̍t chò sèng-ji̍t, chiàu Góa pêng-sî hoan-hù lín ê chó͘-sian ê.'
17:23 Chóng-.sī, in m̄ chun-thàn, m̄ àⁿ hīⁿ-khang lâi thiaⁿ, to̍h-sī ngē in ê ām-kún, tì-sú bô beh thiaⁿ ōe, bô beh siū kà-sī.
17:24 Siōng-chú kóng, " Lín nā chù-ì chun-thàn Góa, tī An-hioh-ji̍t bô taⁿ siáⁿ-mi̍h tàⁿ ji̍p-khì chit-ê siâⁿ mn̂g, to̍k-to̍k lia̍h An-hioh-ji̍t chò sèng-ji̍t, tī hit ji̍t lóng bô chò siáⁿ-mi̍h kang;
17:25 chiū ū kun-ông, ông-chhin, chē Ta-bi̍t ê pó-chō ê, in kah in ê ông-chhin, kah Iô-tah lâng, kah tòa tī Ê-lú-sa-lèm ê jîn-bîn, á-.sī chē chhia, á-.sī khiâ bé, ji̍p chit-ê siâⁿ mn̂g, jî-chhiáⁿ chit-ê siâⁿ ē lâu kàu éng-oán.
17:26 Μā ē ū lâng tùi Iô-tah chiahê siâⁿ kah Ê-lú-sa-lèm sì-kho͘-ûi ê só͘-chāi, tùi Biān-iá-mín tē, pêng-goân, soaⁿ-tē kah lâm-hong ê tē lâi, lóng tòa sio-chè, ta̍k chióng ê chè, sò͘-chè, kah jú-hiuⁿ, kah siā-un-chè, lâi-kàu Siōng-chú ê tiān.
17:27 Lín nā m̄ chun-thàn Góa, m̄ lia̍h An-hioh-ji̍t chò sèng-ji̍t, iû-goân tī An-hioh-ji̍t taⁿ tàⁿ ji̍p Ê-lú-sa-lèm ta̍k-ê mn̂g; Góa beh tī ta̍k-ê mn̂g khí hóe; chit-ê hóe mā ē sio-húi Ê-lú-sa-lèm ê kiong-tiān, bē tàng phah-hoa.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。