耶利米书 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
12:1 I-é-lí-miah Chit-gî Siōng-chú
Siōng-chú ah, góa kah Lí piān-lūn ê sî, Lí sī kong-gī; chóng-.sī, góa iáu ài kah Lí lí-lūn; pháiⁿ lâng ê lō͘ ná ē heng-thong? Tōa kiâⁿ kúi-chà ê ná ē tit tio̍h pêng-an?
12:2 Lí chai-pôe in, in mā tèng-kin, tōa châng koh kiat kóe-chí. Chiàu in ê chhùi kóng, Lí sī kīn; chiàu in ê sim siūⁿ, Lí sī hn̄g.
12:3 Siōng-chú ah, Lí chai góa, Lí khòaⁿ tio̍h góa, chhì-liān góa lâi ǹg Lí ê sim. Kiû Lí kā in thoa chhut-.lâi, chhin-chhiūⁿ beh siū thâi ê iûⁿ, kā i hun-pia̍t chhut-lâi thèng-hāu siū thâi ê ji̍t.
12:4 Chit-ê tē pi-ai, choân kok ê chháu kah chhài lóng ta-.khì, ē kàu tang-sî? Ūi tio̍h tòa tī hia ê jîn-bîn ê pháiⁿ, chengseⁿ, poe-chiáu lóng bia̍t-bông. In-ūi in kóng: I bô khòaⁿ tio̍h goán ê kiat-kio̍k.
12:5 Siōng-chú kóng: Lí kah kiâⁿ lō͘ ê lâng chò-hóe cháu, siōng-chhiáⁿ ē ià-siān, ná ē-tàng kah bé cháu sio jiok? Lí tī pêng-an ê tē, sûi-jiân an-ún, tī Iol-tàn hô piⁿ ê chhiū-nâ ē án-chóaⁿ?
12:6 In-ūi liân lí ê hiaⁿ-tī, liân lí ê lāu-pē ê ke, lóng ēng kan-chà teh khoán-thāi lí. In mā tī lí ê āu-bīn tōa-siaⁿ kiò, sûi-jiân tùi lí kóng hó ōe, lí mā m̄ thang siong-sìn in.
12:7 Siōng-chú Ūi tio̍h I ê Chú-bîn Iu-siong
Siōng-chú kóng: Góa lī-khui Góa ê chhù, pàng-sak Góa ê sán-gia̍p, kā Góa sim só͘ thiàⁿ ê kau tī tùi-te̍k chhiú tiong.
12:8 Góa ê sán-gia̍p tùi Góa lâi kóng, chhin-chhiūⁿ chhiū-nâ lāi ê sai, i chhut siaⁿ lâi kong-kek Góa, in-ūi ánne, Góa oàn-hūn i.
12:9 Góa ê sán-gia̍p tùi Góa lâi kóng, kám chhin-chhiūⁿ ū pan-tiám ê eng-chiáu? Hiahê eng-chiáu kám bô tī sì-kho͘-ûi teh kong-kek i? Lín tio̍h khì chū-chi̍p chhân-iá ê pah-siù, hō͘ i lâi thun-chia̍h hit chiah eng-chiáu.
12:10 Chin chē bo̍k-chiá húi-hoāi Góa ê phû-tô hn̂g, thún-ta̍h Góa ê hūn-gia̍h, hō͘ góa hó-hó ê hūn-gia̍h piàn-sêng pha-hng ê khòng-iá.
12:11 In hō͘ tē pha-hng; tē-it-ē pha-hng, chiū tùi Góa ai-kiû; choân tē pha-hng, in-ūi bô lâng khòa-ì.
12:12 Chân-sat ê lâi-kàu khòng-iá tiong it-chhè kng liu-liu koân ê só͘-chāi; Siōng-chú ê to tùi tē ê chit pêng kàu tē ê hit pêng, choân-pō͘ châu-bia̍t. Kiàn-nā ū hia̍t-khì ê, lóng bô pêng-an.
12:13 In chèng be̍h, siu-sêng chhì-phè; lô-khó͘ mā lóng bô lī-ek. In-ūi Siōng-chú ê tōa siū-khì, in ē ūi tio̍h in ê lông-sán-bu̍t lâi kiàn-siàu.
12:14 Siōng-chú Tùi I-su-la-el Keh-piah Kok ê Èng-ín
Kóng tio̍h só͘-ū ê pháiⁿ chhù-piⁿ, to̍h-sī hāi tio̍h góa hō͘ góa ê I-su-la-el jîn-bîn sêng-chiap ê sán-gia̍p ê. Siōng-chú ū ánne kóng, " Lí khòaⁿ, Góa beh kā in kóaⁿ-chhut in ê tē, koh beh kā Iô-tah ke tùi in tiong-kan kóaⁿ chhut-.lâi.
12:15 Góa kā in kóaⁿ-chhut-lâi í-āu, Góa ē tò tńg-lâi kā in liân-bín, chhōa in tò tńg-.lâi, ta̍k lâng kui i ê pún-gia̍p, ta̍k lâng kui i ê pún só͘-chāi.
12:16 In nā khéng in-khîn ha̍k-si̍p Góa ê chú-bîn ê tō-lō͘, kí Góa ê miâ chiùchōa kóng, ' Siōng-chú sī oa̍h ê', chhin-chhiūⁿ in chá-chêng kà-sī Góa ê chú-bîn kí Ba-al lâi chiùchōa ánne, in chiū ē tī Góa ê chú-bîn ê tiong-kan tit tio̍h kiàn-li̍p.
12:17 In nā m̄-thiaⁿ, Góa chiū beh kā in kóaⁿ-chhut hit kok, kóaⁿ chhut-lâi kā in bia̍t-tiāu. Che sī Siōng-chú kóng ê. "
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。