耶利米书 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
1:1 Biān-iá-mín tē A-ná-thot siâⁿ ê chè-si tiong, Hil-kí-iah ê kiáⁿ I-é-lí-miah ê ōe kì tī ē-té:
1:2 Tng Iô-tah ông Am-móng ê kiáⁿ Io-si-iah chē-ūi ê cha̍p-saⁿ nî, Siōng-chú ê ōe lîm-kàu I-é-lí-miah.
1:3 Koh tī Iô-tah ông Io-si-iah ê kiáⁿ E-hō͘-iá-kim chē-ūi ê sî, it-ti̍t kàu Iô-tah ông Io-si-iah ê kiáⁿ Che-ti-kiah cha̍p-it nî ê lō͘-bóe, tī gō͘-goe̍h kan, Ê-lú-sa-lèm lâng siū lia̍h ê sî, Siōng-chú ê ōe lîm-kàu I-é-lí-miah.
1:4 I-é-lí-miah Bông Soán-tiàu
Siōng-chú ê ōe lîm-kàu góa, kóng,
1:5 " Góa bōe chhòng-chō lí tī lāu-bú pak-tó͘ lāi ê chìn-chêng, Góa bat lí; lí bōe chhut thai ê chìn-chêng, Góa kā lí hun-pia̍t chò sèng; siat-li̍p lí chò lia̍t kok ê sian-ti. "
1:6 Góa chiū kóng, " Hāi ah! Chì-koân Siōng-chú ah, lí khòaⁿ, góa bē hiáu kóng, in-ūi góa sī gín'á. "
1:7 Chóng-.sī, Siōng-chú tùi góa kóng, " Lí m̄ thang kóng ' Góa sī gín'á'. Góa kiàn-nā ū chhe lí, lí tio̍h khì; Góa kiàn-nā ū hoan-hù lí, lí tio̍h kóng.
1:8 Lí m̄-bián kiaⁿ in, in-ūi Góa kah lí tông-chāi, Góa ē kiù lí. Che sī Siōng-chú kóng ê. "
1:9 Siōng-chú chiū chhun I ê chhiú lâi bong góa ê chhùi. Siōng-chú kā góa kóng, " Lí khòaⁿ, Góa ū kā Góa ê ōe hē tī lí ê chhùi.
1:10 Lí khòaⁿ, kin-á-ji̍t Góa tī lia̍t pang lia̍t kok ê téng-bīn siat-li̍p lí, sī ūi tio̍h beh poe̍h-chhut, beh thiah-húi, beh pāi-hoāi, beh chhia-tó, beh kiàn-li̍p, beh chai-pôe. "
1:11 Nn̄g-ê Ī-siōng
Siōng-chú ê ōe koh lîm-kàu góa kóng, " I-é-lí-miah, lí khòaⁿ tio̍h siáⁿ-mi̍h? " Góa ìn kóng, " Góa khòaⁿ tio̍h hēng chhiū ê chi̍t ki. "
1:12 Siōng-chú chiū tùi góa kóng, " Lí só͘ khòaⁿ ê sī tio̍h; Góa teh chim-chiok Góa ê ōe lâi kā i chiâⁿ. "
1:13 Siōng-chú ê ōe tē-jī pái lîm-kàu góa kóng, " Lí khòaⁿ tio̍h siáⁿ-mi̍h? " Góa ìn kóng, " Góa khòaⁿ tio̍h chi̍t-ê tiáⁿ teh kún, i ê bīn tùi pak pêng ǹg kòe-.lâi. "
1:14 Siōng-chú chiū tùi góa kóng, " Ē ū chai-hō tùi pak-hong hoat-chhut, lîm-kàu tòa tī chit só͘-chāi só͘-ū ê jîn-bîn. "
1:15 Siōng-chú kóng, " Lí khòaⁿ, Góa beh tiàu pak-hong lia̍t kok ê chèng cho̍k; in ē lâi, ta̍k-ê lóng tī Ê-lú-sa-lèm chiahê siâⁿ mn̂g-kháu an chō-ūi, sì-kho͘-ûi kong-kek siâⁿ chhiûⁿ, mā beh kong-kek Iô-tah só͘-ū ê siâⁿ.
1:16 Kóng tio̍h chiahê jîn-bîn it-chhè ê pháiⁿ, to̍h-sī lī-khui Góa, ǹg pa̍t-ê sîn-bêng sio hiuⁿ; kūi-pài in ê chhiú só͘ chò ê, Góa beh kóng-khí Góa ê phòaⁿ-toàn lâi kā in kong-kek.
1:17 Só͘-í, lí tio̍h hâ io, khí-.lâi, kā Góa só͘ hoan-hù lí só͘-ū ê ōe kā in kóng; ' M̄-thang in-ūi in lâi kiaⁿ-hiâⁿ, chiah bián-tit Góa hō͘ lí tī in ê bīn-chêng lâi kiaⁿ-hiâⁿ.
1:18 Lí khòaⁿ, in-ūi Góa kin-á-ji̍t hō͘ lí chiâⁿ-chò kian-kò͘ ê siâⁿ, chò thih-thiāu, chò tâng-chhiûⁿ, lâi tí-tòng choân tē, í-ki̍p Iô-tah ê lia̍t ông, kùi-cho̍k, chè-si kah chit só͘-chāi ê chèng lâng.
1:19 In beh kong-kek lí, chóng-.sī, bē tàng iâⁿ lí; in-ūi Góa kah lí tông-chāi, ē kā lí chín-kiù. Che sī Siōng-chú kóng ê. "
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。