Chit-ê tùi E-tóm lâi, tùi Bo-chu-la̍h kàu, sin chhēng âng saⁿ, saⁿ-khò͘ ko-kùi, ū tōa khùi-la̍t, tōa pō͘ teh kiâⁿ ê sī siáⁿ lâng? Sī Góa, sī chiàu kong-gī kóng-ōe, ū tōa khùi-la̍t, ē kiâⁿ chín-kiù ê Siōng-chú. 63:2 " Lí ê saⁿ-khò͘ ná ē ū âng sek, lí ê saⁿ-khò͘ ná ē chhin-chhiūⁿ ta̍h chiú-khut ê? " 63:3 Siōng-chú ìn kóng, " Góa kakī chi̍t-ê ta̍h chiú-khut; chèng lâng ê tiong-kan bô chi̍t-ê lâng kah Góa tông-chāi. Góa siū-khì kā in ta̍h, tōa siū-khì kā in thún-ta̍h. In ê hoeh chōaⁿ tī Góa ê saⁿ, koh hō͘ Góa só͘-ū ê saⁿ-khò͘ bô chheng-khì. 63:4 In-ūi pò-siû ê ji̍t tī Góa ê sim-lāi, Góa kiù-sio̍k Góa ê chú-bîn ê nî í-keng kàu. 63:5 Góa khòaⁿ, m̄ koh khòaⁿ bô pang-chān ê; Góa tio̍h-kiaⁿ kah gāng-.khì, in-ūi bô lâng kā Góa hû-chhî. Só͘-í, Góa kakī ê chhiú kā Góa kiâⁿ chín-kiù; Góa ê tōa siū-khì kā Góa hû-chhî. 63:6 Góa siū-khì, ta̍h lia̍t pang; tōa siū-khì, hō͘ in chùi-chùi, hō͘ in ê hoeh lâu tī tē-.ni̍h. " 63:7
Siōng-chú Un-thāi I-su-la-el
Góa beh chiàu Siōng-chú só͘-ū siúⁿ-sù hō͘ lán ê, lâi kóng-khí Siōng-chú ê chû-ài kah Siōng-chú ê miâ-siaⁿ, í-ki̍p I ǹg I-su-la-el ê chú-bîn só͘ si ê tōa in, to̍h-sī chiàu I ê liân-bín kah hong-sēng ê chû-ài siúⁿ-sù hō͘ in ê. 63:8 In-ūi I kóng, " In chin-chiàⁿ sī Góa ê chú-bîn, bô kiâⁿ hi-ké ê kiáⁿ-jî "; só͘-í, I chiâⁿ-chò in ê Kiù-chú. 63:9 Tī in it-chhè ê khó͘-lān tiong, I mā kah in tâng siū khó͘-lān, koh ū I bīn-chêng ê sù-chiá kā in chín-kiù; I ēng chû-ài kah liân-bín kā in kiù-sio̍k; tī kó͘-chá ê ji̍t-chí tiāⁿtiāⁿ kā in phō, kā in khòaⁿ-kò͘. 63:10 Chóng-.sī, in pōe-ge̍k, hō͘ I ê Sèng Sîn iu-būn; I chiū tian-tò chò in ê tùi-te̍k, pún-sin lâi kā in kong-kek. 63:11 Jiân-āu, jîn-bîn chiū ē kì-tit kó͘-chá Mô͘-se ê ji̍t, kóng: Chhōa in kah I choân-kûn ê bo̍k-chiá tùi hái-.ni̍h chhut-.lâi ê tī tó-ūi? Kā I ê Sèng Sîn hē tī in tiong-kan ê tī tó-ūi? 63:12 Hō͘ I êng-kng ê chhiú tī Mô͘-se ê chiàⁿ chhiú hêng-tōng, tī in ê bīn-chêng kā chúi hun-khui, koh ūi tio̍h kakī li̍p éng-oán ê miâ, 63:13 chhōa in keng-kòe hái tiong chhin-chhiūⁿ bé kiâⁿ tī khòng-iá, hō͘ in ê kha bô that tio̍h ê tī tó-ūi? 63:14 Siōng-chú ê Sèng Sîn hō͘ in tit tio̍h an-hioh, chhin-chhiūⁿ ánne, chengseⁿ lo̍h kàu soaⁿ-kha; ánne, Lí mā chhōa Lí ê chú-bîn, ūi tio̍h kakī kiàn-li̍p êng-kng ê miâ. 63:15
Kiû Chō͘ ê Kî-tó
Kiû Lí tùi thiⁿ àⁿ lo̍h-lâi khòaⁿ, tùi Lí sèng-kiat êng-kng ê só͘-chāi khòaⁿ. Lí ê jia̍t-sim kah Lí tōa koân-lêng-.ê só͘ chò tī tó-ūi? Lí thiàⁿ-thàng ê sim-tn̂g kah liân-bín tùi góa thêng-chí. 63:16 Sûi-jiân A-bu-la-hàm m̄ bat goán, I-su-la-el m̄-jīn goán, chóng-.sī, Lí sī goán ê pē. Siōng-chú ah, Lí sī goán ê pē, tùi bān-kó͘ í-lâi, Lí ê miâ kiò-chò " Kiù-sio̍k goán ê Chú ". 63:17 Siōng-chú ah, Lí ná ē hō͘ goán kiâⁿ phian-siâ, lī-khui Lí ê lō͘, hō͘ goán ê sim ngē, bô kèng-ùi Lí? Kiû Lí ūi tio̍h Lí ê lô͘-po̍k, ūi Lí ê sán-gia̍p — kok chi-cho̍k ê iân-kò͘, tò tńg-.lâi. 63:18 Lí Sèng ê chú-bîn put-kò sī chiām-sî tit tio̍h chit-ê sán-gia̍p; goán ê tùi-te̍k í-keng thún-ta̍h Lí ê sèng-só͘. 63:19 Goán chhin-chhiūⁿ tùi kó͘-chá m̄ bat hō͘ Lí tī-lí ê lâng, chhin-chhiūⁿ m̄ bat ēng Lí ê miâ lâi chheng-ho͘ ê.