以赛亚书 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
26:1 Siōng-tè hō͘ I ê Chú-bîn Tek-sèng
Tng hit ji̍t, tī Iô-tah tē, lâng it-tēng chhiùⁿ chit-ê koa, kóng: Goán ū kian-kò͘ ê siâⁿ. I ē ēng kiù-un li̍p-chò siâⁿ chhiûⁿ, chò gōa-têng siâⁿ.
26:2 Tio̍h khui chiahê mn̂g, hō͘ siú sìn-si̍t ê gī ê jîn-bîn ē-tàng chìn-ji̍p.
26:3 Kian-sim óa-khò Lí ê lâng, Lí ē pó-siú i cha̍p-hun pêng-an, in-ūi i ū óa-khò Lí.
26:4 Lín tio̍h óa-khò Siōng-chú ti̍t-kàu éng-oán, in-ūi chì-koân Siōng-chú sī éng-oán ê chio̍h-pôaⁿ.
26:5 I hō͘ tiàm tī koân ê só͘-chāi ê lâng kah koân ê siâⁿ chò chi̍t-ē soe-pāi-.khì; I ē kā i chhia-tó tī tē-.ni̍h, lo̍h kàu tîn-ai.
26:6 Kha ē kā i thún-ta̍h, to̍h-sī sànchhiah lâng ê kha, khùn-khó͘ ê lâng ê kha-pō͘.
26:7 Gī lâng ê lō͘ sī chèng-ti̍t; chèng-ti̍t ê Chú, Lí it-tēng ē siu pêⁿ gī lâng ê lō͘ .
26:8 Siōng-chú ah, goán tī Lí sím-phòaⁿ ê lō͘ thèng-hāu Lí; goán ê sim him-bō͘ Lí ê miâ kah kì-liām Lí.
26:9 Góa ēng góa ê sim mê-kan him-bō͘ Lí, mā ēng góa ê sim-sîn thiⁿ-kng chá-khí chhōe Lí; in-ūi Lí sím-phòaⁿ sè-chiūⁿ ê sî, tē-chiūⁿ ê jîn-bîn chiū ē ha̍k-si̍p gī.
26:10 Ēng un-hūi khoán-thāi pháiⁿ lâng, i iû-goân m̄ ha̍k-si̍p gī; tī chèng-ti̍t ê só͘-chāi, i ē kiâⁿ put-gī, mā bô chù-ì Siōng-chú ê ui-giâm.
26:11 Siōng-chú ah, Lí ê chhiú gia̍h koân, in iû-goân m̄-khòaⁿ; in ē khòaⁿ tio̍h Lí ūi tio̍h jîn-bîn ê jia̍t-sim lâi kiàn-siàu, koh ū hóe sio-bia̍t Lí ê tùi-te̍k.
26:12 Siōng-chú ah, Lí ē chù-tiāⁿ goán tit tio̍h pêng-an, in-ūi goán só͘ chò it-chhè ê tāichì, lóng sī Lí kā goán chiâⁿ ê.
26:13 Siōng-chú — goán ê Siōng-tè ah, Lí í-gōa, bat ū pa̍t-ê chú kā goán koán-hat; chóng-.sī, goán beh to̍k-to̍k óa-khò Lí, kì-liām Lí ê miâ.
26:14 In sí-liáu it-tēng bē tàng koh-oa̍h, in ê im-hûn bē koh khí-.lâi; in-ūi Lí lîm-kàu in, kā in châu-bia̍t, hō͘ in ê miâ lóng siau-sit-.khì.
26:15 Siōng-chú ah, Lí ke-thiⁿ jîn-bîn, hō͘ kok-ka heng-ōng; Lí tit tio̍h êng-kng, koh khui-khoah chit-ê tē sì-bīn ê tē-kài.
26:16 Siōng-chú ah, in tī hoān-lān tiong chhōe Lí; Lí ê kéng-kài lîm-kàu in sin chiūⁿ, in chiū choan-sim tùi Lí kî-tó.
26:17 Chhin-chhiūⁿ chabó͘ lâng hoâi-īn beh seⁿ ê sî, chiū kiáu-ká, tī thòng-khó͘ ê sî, chiū tōa-siaⁿ hoah. Siōng-chú ah, goán tī Lí ê bīn-chêng mā sī ánne.
26:18 Goán mā bat hoâi-īn, bat kiáu-ká, só͘ seⁿ ê kèng-jiân chhin-chhiūⁿ hong. Goán tī tē-.ni̍h m̄ bat kiâⁿ siáⁿ-mi̍h chín-kiù ê tāichì; sè-chiūⁿ ê jîn-bîn mā bô poa̍h lo̍h-.khì.
26:19 Lí ê sí-lâng ē koh oa̍h! Góa chiahê sin-si ē koh khí-.lâi! Tó tī tîn-ai ê lâng, lín tio̍h cheng-sîn khí-lâi chhiùⁿ koa; in-ūi Siōng-tè ê lō͘-chúi chhin-chhiūⁿ chhài-se téng-bīn ê lō͘-chúi, tē mā ē kau chhut im-hûn.
26:20 Sím-phòaⁿ kah Ho̍k-heng
Góa ê jîn-bîn, lín tio̍h ji̍p-khì ba̍t-pâng, koaiⁿ lí ê mn̂g, bih chi̍t-sî-á, thèng-hāu Siōng-tè ê siū-khì kòe-.khì.
26:21 In-ūi Siōng-chú tùi I ê só͘-chāi chhut-.lâi, ē hêng-hoa̍t tē-chiūⁿ ê jîn-bîn ê chōe-ok; tē mā ē lō͘-chhut i só͘-ū ê hoeh, bô koh jia-khàm siū thâi ê lâng.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。