以赛亚书 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
1:1 Tng O͘-chi-a, Iô-thàm, A-khà-chuh, Hi-che-kia chò Iô-tah ông ê sî, A-mô͘-su ê kiáⁿ I-sá-iah só͘ tit tio̍h koan-hē Iô-tah kah Ê-lú-sa-lèm ê be̍k-sī.
1:2 Siōng-tè Khián-chek I ê Chú-bîn
Thiⁿ ah, tio̍h thiaⁿ! Tē ah, tio̍h àⁿ hīⁿ-khang! In-ūi Siōng-chú ū kóng: " Góa bat iúⁿ-chhī kiáⁿ-jî, pôe-ióng in tōa-hàn, in kèng-jiân pōe-ge̍k Góa.
1:3 Gû bat i ê chú-lâng, lî-á bat i ê chú-lâng ê chô, chóng-.sī, I-su-la-el m̄ bat, Góa ê jîn-bîn bē hiáu siūⁿ. "
1:4 Hāi ah! Hoān-chōe ê kok, chōe-ok ê jîn-bîn, kiâⁿ pháiⁿ ê chéng-lūi kah pāi-hoāi ê kiáⁿ-jî! In lī-khui Siōng-chú, khòaⁿ-khin I-su-la-el ê sèng ê, kah I chheⁿ-so͘, oa̍t tńg-sin lī-khui khì.
1:5 Lín tiāⁿtiāⁿ pōe-ge̍k, kám sī ài koh siū phah? Lín ê móa thâu-khak í-keng thàng-thiàⁿ, móa-sim í-keng soe-jio̍k.
1:6 Tùi lín ê kha-té kàu thâu-khak téng, bô kah chi̍t tè hó phôe-bah — lóng sī khang-chhùi, o͘-chheⁿ-chéng kah sin siong-hûn; lóng bē siu chhùi, pau bē ba̍t, mā bô ēng iû chu-jūn.
1:7 Lín ê tē í-keng pha-hng, lín ê siâⁿ siū hóe sio-húi; lín ê chhân-hn̂g tī lín ê bīn-chêng hō͘ gōa-pang lâng chhim-thun; í-keng pha-hng, chhin-chhiūⁿ hō͘ gōa-pang lâng só͘ pāi-hoāi ê.
1:8 Chí-ū lâu Si-óng siâⁿ, chhin-chhiūⁿ phû-tô hn̂g ê chháu-liâu, koe-á-chhân ê chháu-liâu, siū ûi-khùn ê siâⁿ.
1:9 Nā m̄-sī bān-kun ê Siōng-chú kā lán lâu tām-po̍h chhun lo̍h-.lâi ê jîn-bîn, lán chá to̍h chhin-chhiūⁿ So͘-tóm, chhin-chhiūⁿ Am-mo͘-la̍h ánne siū siau-bia̍t.
1:10 Lín chiahê So͘-tóm ê koaⁿ-tiúⁿ, tio̍h thiaⁿ Siōng-chú ê ōe; lín Am-mo͘-la̍h ê jîn-bîn, tio̍h àⁿ hīⁿ-khang lâi thiaⁿ lán ê Siōng-chú ê kà-sī.
1:11 Siōng-chú kóng, " Lín hiàn hiah chē chè-mi̍h hō͘ Góa ū siáⁿ-mi̍h lī-ek? Kang mî-iûⁿ ê sio-chè kah pûi ê chengseⁿ ê iû, Góa í-keng ū kàu-gia̍h. Gû-káng ê hoeh, iûⁿ-á ê hoeh kah soaⁿ-iûⁿ-káng ê hoeh, Góa mā lóng bô kah-ì.
1:12 Lín lâi tiâu-kìⁿ Góa, siáⁿ lâng tùi lín thó chit-ê, lâi thún-ta̍h Góa ê īⁿ?
1:13 M̄-thang koh hiàn khang-khang ê lé-mi̍h! Phang-liāu sī Góa só͘ thó-ià ê; múi goe̍h ê chhe-it, An-hioh-ji̍t kah tiàu-chi̍p ê chū-hōe, lóng sī teh kiâⁿ pháiⁿ; lín koh siú giâm-siok-hōe, Góa si̍t-chāi jím bē tiâu.
1:14 Lín ta̍k goe̍h ê chhe-it kah cheh-kî, Góa ê sim oàn-hūn, khòaⁿ i chò tāng-tàⁿ, hō͘ góa taⁿ bē khí.
1:15 Lín gia̍h-khí chhiú lâi, Góa beh am ba̍k-chiu m̄-khòaⁿ lín; lín ū chin chē kî-tó, Góa mā m̄-thiaⁿ; lín ê chhiú chhiong-móa thâi lâng ê hoeh.
1:16 Lín tio̍h kā kakī sé chheng-khì, tùi Góa ê ba̍k-chiu chêng tû-khì lín só͘ kiâⁿ ê pháiⁿ, thêng-chí lín ê chò pháiⁿ!
1:17 Ha̍k-si̍p kiâⁿ hó, chhōe kong-pêⁿ, chín-kiù siū ap-chè ê lâng, thè ko͘-jî sin-oan, ūi kóaⁿ-hū piān-hō͘. "
1:18 Siōng-chú kóng, " Lín lâi, lán lâi chò-hóe piān-lūn! Lín ê chōe sûi-jiân chhin-chhiūⁿ chu-âng, i ē piàn-chò pe̍h kah chhin-chhiūⁿ seh; sûi-jiân âng chhin-chhiūⁿ ian-chi, ē piàn-chò pe̍h kah chhin-chhiūⁿ iûⁿ-mn̂g.
1:19 Lín nā kam-sim chun-thàn, chiū ē tit tio̍h tē-chiūⁿ ê hó mi̍h thang chia̍h;
1:20 lín nā m̄ chun-thàn, tian-tò pōe-ge̍k, chiū ē siū to-kiàm thun-bia̍t. In-ūi Góa sī Siōng-chú, Góa chhin-chhùi ánne kóng. "
1:21 Siâ-ok ê Siâⁿ
Hāi ah! Tiong-sìn ê siâⁿ piàn-chò chhiong-ki, chá-chêng chhiong-móa kong-pêⁿ, kong-gī tiàm hit lāi-bīn, hiān-kim sī hiong-chhiú teh tòa.
1:22 Lí ê gîn piàn-chò che-tái; lí ê chiú thàu chúi.
1:23 Lí ê koaⁿ-tiúⁿ hoān-hoat kah chha̍t tàu-tīn, ta̍k-ê ài beh chiap-siū lâng ê o͘-se, siàu-siūⁿ siā-lé; in bô ūi tio̍h ko͘-jî sin-oan, kóaⁿ-hū ê àn-kiāⁿ bē tàng kàu tī i ê bīn-chêng.
1:24 In-ūi ánne, Chú — bān-kun ê Siōng-chú, I-su-la-el ê tōa-lêng-.ê kóng, " Ho͘h! Góa beh tû-khì Góa ê siû-te̍k, hō͘ kakī khah ē pêng-an, Góa beh tùi Góa ê tùi-te̍k pò-siû!
1:25 Góa beh koh hē chhiú tī lí ê sin chiūⁿ, toàn-liān lí só͘-ū ê che-tái, tû-chheng lí ê cha̍p-chit.
1:26 Góa beh koh siat-li̍p lí ê sím-phòaⁿ-koaⁿ, chhin-chhiūⁿ goân-khí-thâu ê sî, koh siat-li̍p lí ê bô͘-sū, chhin-chhiūⁿ chá-chêng. Jiân-āu, lí ē hông kiò-chò kong-gī ê siâⁿ, tiong-sìn ê siâⁿ. "
1:27 Si-óng ē in-ūi kong-pêⁿ tit tio̍h kiù-sio̍k; hiahê tò tńg-.lâi ê lâng ē in-ūi kong-gī tit tio̍h kiù-sio̍k.
1:28 Pōe-ge̍k kah hoān chōe ê lâng ē chò chi̍t-ē pāi-hoāi; pàng-sak Siōng-chú ê lâng it-tēng siū siau-bia̍t.
1:29 Hiahê lâng ē in-ūi lín só͘ hoaⁿ-hí ê siōng chhiū lâi làu-khùi, lín ē in-ūi só͘ kéng ê hn̂g lâi kiàn-siàu.
1:30 In-ūi lín ē chhin-chhiūⁿ hio̍h ta-.khì ê siōng chhiū, ē chhin-chhiūⁿ bô chúi ê hn̂g.
1:31 Ū koân-sè ê lâng ē chhin-chhiūⁿ môa-sut, i ê só͘ chò chhin-chhiūⁿ hóe-chheⁿ; in lóng chò chi̍t-ē to̍h, bô lâng thang kā i phah hoa.
各圣经译本着作权如版权说明。
本画面由信望爱资讯中心之CBOL计画产生,欢迎连结,无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人,来荣耀他自己的名。