传道书 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
6:1 Góa khòaⁿ tio̍h ji̍t-kng ê ē-bīn ū chi̍t hāng chai-hō hō͘ lâng ū tāng-tàⁿ,
6:2 Chiū-sī ū lâng tit tio̍h Siōng-tè siúⁿ-sù i chîⁿ-châi, hó-gia̍h kah chun-kùi, tì-sú i ê sim só͘ ì-ài ê bô khiàm kah pòaⁿ-hāng. Chóng-.sī, Siōng-tè bô hō͘ i hióng-siū, tian-tò hō͘ gōa-lâng lâi hióng-siū; che mā sī khang-hi, mā sī tōa pi-kio̍k.
6:3 Lâng siat-sú seⁿ chi̍t pah-ê kiáⁿ, koh chia̍h tn̂g hòe-siū, m̄ koh, keng-kòe chin chē nî, i ê sim bô tit tio̍h hióng-hok lâi boán-chiok, koh bô tit tio̍h bâi-chòng; chiàu góa kóng, hit-ê bô kàu goe̍h lâi tūi-lo̍h ê thai mā pí i khah hó.
6:4 I tī khang-hi lâi, tī o͘-àm khì, i ê miâ siū o͘-àm khàm ba̍t.
6:5 Jî-chhiáⁿ i bô khòaⁿ tio̍h ji̍t-thâu, mā lóng bô ti-kak, m̄ koh, chit-ê pí hit-ê khah pêng-an.
6:6 Hitê lâng sûi-jiân oa̍h kàu chi̍t chheng nî , koh-chài chi̍t chheng nî, chóng-.sī, bô hióng-hok; chèng lâng kám m̄-sī lóng kui khì kāng chi̍t-ê só͘-chāi?
6:7 Lâng ê lô-lo̍k lóng sī ūi tio̍h saⁿ tǹg, sim khiok bô ti chiok.
6:8 Tì-hūi ê lâng pí gû-gōng ê lâng ū siáⁿ-mi̍h khah iâⁿ? Sàn-chhiah lâng tī chèng lâng ê bīn-chêng chai só͘ thang kiâⁿ ê, ū siáⁿ-mi̍h khah iâⁿ?
6:9 Ba̍k-chiu só͘ khòaⁿ ê iâⁿ-kòe sim-lāi ê khong-su bōng-sióng. Che mā sī khang-hi, mā sī lia̍h-hong.
6:10 Chá-chêng só͘-ū ê í-keng chá to̍h ū hō i ê miâ, chai i sī lâng, mā bē tàng kah hit-ê pí i khah ū la̍t ê lâi sio-cheⁿ.
6:11 Í-keng ū chin chē tāichì ke-thiⁿ khang-hi, tùi lâng ū siáⁿ-mi̍h lī-ek?
6:12 Lâng it-seng hi-tō͘ kong-im, chhin-chhiūⁿ hêng-iáⁿ kòe-.khì. Siáⁿ lâng ē chai siáⁿ-mi̍h tāichì tùi i it-seng ū lī-ek? In-ūi siáⁿ lâng ē kā lâng kóng i kòe-sin liáu-āu, tī ji̍t-kng ê ē-bīn ū hoat-seng siáⁿ-mi̍h tāichì?
各圣经译本着作权如版权说明。
本画面由信望爱资讯中心之CBOL计画产生,欢迎连结,无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人,来荣耀他自己的名。