箴言 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
28:1 Pháiⁿ lâng bô lâng jiok mā teh cháu; to̍k-to̍k gī lâng hó-táⁿ chhin-chhiūⁿ sai.
28:2 In-ūi tē-hng ū chōe-kò, kun-ông chiū chin chē; ū bêng-lí kah tì-sek ê kun-ông, kok chiū ē kú-tn̂g an-tēng.
28:3 Sàn-chhiah ê lâng khi-hū sànchhiah lâng, ná chhin-chhiūⁿ chò tōa-chúi ê hō͘ kā ngó͘-kok chhiong bô-.khì.
28:4 Pàng-sak lu̍t-hoat ê lâng oló pháiⁿ lâng; chóng-.sī, chip-siú lu̍t-hoat ê lâng kah pháiⁿ lâng sio-cheⁿ.
28:5 Pháiⁿ lâng bô bêng-pe̍k kong-gī, m̄ koh, cháu-chhōe Siōng-chú ê lâng lóng bêng-pe̍k.
28:6 Sàn-chhiah lâi kiâⁿ chèng-ti̍t, iâⁿ-kòe chò tāichì oan-khiau ê hó-gia̍h lâng.
28:7 Kín-sīn siú lu̍t-hoat ê lâng sī tì-hūi ê kiáⁿ; kah tham-chia̍h ê lâng chò-phōaⁿ sī teh lêng-jio̍k lāu-pē.
28:8 Pàng tāng-lāi lâi hoat-châi ê lâng, sī teh kā liân-bín sànchhiah lâng ê lâng chek-chū châi-hù.
28:9 Hīⁿ-khang oa̍t-cháu, m̄-thiaⁿ lu̍t-hoat ê lâng, liân i ê kî-tó mā sī khó-ò͘ⁿ.
28:10 Bê-he̍k chèng-ti̍t lâng kiâⁿ pháiⁿ lō͘ ê lâng, ē poa̍h lo̍h-khì kakī ê hām-kheⁿ; to̍k-to̍k oân-choân ê lâng ē sêng-chiap hó ê sán-gia̍p.
28:11 Hó-gia̍h lâng kakī khòaⁿ-chò sī ū tì-hūi, to̍k-to̍k chhong-bêng ê sànchhiah lâng kā i khòaⁿ chhut-chhut.
28:12 Gī lâng tek-chì ū tōa êng-kng; pháiⁿ lâng heng-khí, lâng chiū cháu-khì bih.
28:13 Am-khàm kakī chōe-ok ê lâng bē heng-thong; to̍k-to̍k jīn chōe lâi hóe-kái ê lâng ē tit tio̍h liân-bín.
28:14 Tiāⁿ-tiāⁿ chûn kiaⁿ-ùi Siōng-chú ê lâng ū hok-khì; ngē i ê sim ê lâng ē hām-lo̍h chai-hō.
28:15 Pō-gio̍k ê kun-ông koán-hat sànchhiah ê jîn-bîn, ná chhin-chhiūⁿ hm̄-hm̄ háu ê sai kah teh chhōe chia̍h ê hîm.
28:16 Bû-ti ê kun-ông chin chē kiâⁿ pō-gio̍k; oàn-hūn tham-châi ê kun-ông ē chia̍h tn̂g hòe-siū.
28:17 Tam-tng thâi lâng ê chōe ê lâng ē cháu ji̍p-khì chhim kheⁿ, lâng m̄ thang kā i chó͘-tòng.
28:18 Chò tāichì chèng-ti̍t ê lâng ē tit tio̍h chín-kiù; chò tāichì oan-khiau ê lâng ē sûi-sî poa̍h-tó.
28:19 Chèng-choh chhân-hn̂g ê lâng ē ū bí-niûⁿ kàu-gia̍h; kau-pôe bô hē-lo̍h ê lâng ē ke̍k sànchhiah.
28:20 Sìn-si̍t ê lâng ē tit tio̍h chin chē hok-khì; siūⁿ beh hoat hoâiⁿ-châi ê lâng bē bián-tit ē siū hêng-hoa̍t.
28:21 Khòaⁿ lâng tōa-sè ba̍k ê lâng sī m̄-hó; in-ūi chi̍t tè piáⁿ lâi hoān-hoat ê lâng mā sī m̄-hó.
28:22 Lâng tàng-sng koh siūⁿ beh hoat hoâiⁿ-châi, siūⁿ bē kàu sànchhiah ē lîm-kàu i.
28:23 Kā lâng chek-pī āu-lâi tit tio̍h lâng hoaⁿ-hí, pí ēng chi̍h phô͘-tháⁿ ê lâng tit tio̍h khah chē lâng ê hoaⁿ-hí.
28:24 Thau-the̍h lāu-pē á-.sī lāu-bú ê mi̍h, koh kóng, " Che m̄-sī chōe ", chit khoán lâng sī kah kiông-tō kâng lūi.
28:25 Tham-sim ê lâng ē khí sio-cheⁿ; m̄ koh óa-khò Siōng-chú ê lâng ē tit tio̍h hong-sēng.
28:26 Óa-khò kakī sim-su ê lâng sī gōng ê lâng; chiàu tì-hūi lâi kiâⁿ ê lâng ē tit tio̍h chín-kiù.
28:27 Chín-chè sànchhiah ê lâng bē tì-kàu khiàm-khoeh; chóng-.sī, tèⁿ-chò bô khòaⁿ-.tio̍h ê lâng ē siū chiù-chó͘.
28:28 Pháiⁿ lâng heng-khí, lâng chiū siám khì bih; in nā bia̍t-bông, gī lâng chiū ē ke-thiⁿ chin chē.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。