箴言 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
20:1 Po̍h chiú ē tì-kàu bú-bān, kāu chiú ē ín-khí soan-hoa; in-ūi chiú lâi chō-sêng chhò-gō͘ sī bô tì-hūi.
20:2 Ông ê ui-hong chhin-chhiūⁿ sai hm̄-hm̄ háu, jiá i siū-khì ê lâng sī teh hāi kakī ê sèⁿ-miā.
20:3 Lī-khui sio-cheⁿ ê lâng ū êng-kng, to̍k-to̍k gōng lâng ài oan-ke.
20:4 Pîn-tōaⁿ ê lâng tī kôaⁿ-thiⁿ ê sî bô beh chèng-choh, kàu siu-koah ê sî, i kiû-khit mā tit bô pòaⁿ-hāng.
20:5 Lâng sim-lāi ê kè-bô͘ ná chhin-chhiūⁿ chhim ê chúi, chí ū bêng-lí ê lâng chiah ē-tàng kā i chhiû chhut-.lâi.
20:6 Kóng kakī jîn-chû ê lâng chin chē, m̄ koh, tiong-si̍t ê lâng chin oh tit tio̍h.
20:7 Chiàu chèng-ti̍t lâi kiâⁿ ê gī lâng, i ê kiáⁿ-sun ū hok-khì.
20:8 Ông chē tī sím-phòaⁿ ê ūi, ēng i ê ba̍k-chiu kàm-chhat só͘-ū ê pháiⁿ.
20:9 Siáⁿ lâng ē-tàng kóng, " Góa í-keng chheng-khì góa ê sim, góa ê chōe í-keng sé-tû "?
20:10 Sú-iōng bô kāng ê chhìn-thûi á-.sī chin-táu, lóng sī Siōng-chú só͘ thó-ià.
20:11 Liân gín'á ê hêng-ûi mā ē hián-bêng i ê pún-sèng, ē-tàng khòaⁿ-chhut i ê só͘ chò sī sèng-kiat á-.sī chèng-ti̍t.
20:12 Ē thiaⁿ ê hīⁿ-khang kah ē khòaⁿ ê ba̍k-chiu, chit nn̄g hāng lóng sī Siōng-chú só͘ chō.
20:13 M̄-thang tham-bîn, chiah bián tì-kàu sànchhiah; tio̍h thí-khui lí ê ba̍k-chiu, chiah ū kàu-gia̍h ê bí-niûⁿ.
20:14 Bé mi̍h ê lâng hiâm kóng, " M̄-hó, m̄-hó! ", bé tńg-khì liáu-āu chiah kakī khoa-kháu kóng " Hó! ".
20:15 Sûi-jiân ū kim kah pó-chio̍h chin chē, chóng-.sī, ū tì-sek ê chhùi-tûn chiah sī kùi-khì ê tin-pó.
20:16 Ūi chheⁿ-hūn lâng tam-pó, tio̍h the̍h hit lâng ê saⁿ lâi tí-ah; thè gōa-lâng chò pó-chèng, tio̍h kakī tam-tng chek-jīm.
20:17 Ēng môa-phiàn tit tio̍h ê chia̍h-mi̍h, lâng lia̍h-chò sī chu-bī; chóng-.sī, āu-lâi i ē móa chhùi choân soa.
20:18 Chham-siông ē hō͘ ta̍k hāng kè-ōe sêng-kong; nā beh kau-chiàn tio̍h ēng hó ê kè-chhek.
20:19 Sì-kè kóng lâng ê tn̂g-té ē lāu-sia̍p lâng ê pì-bi̍t; m̄ thang kau-kiat kāu-ōe ê lâng.
20:20 Chiù-chó͘ lāu-pē á-.sī lāu-bú ê lâng, i ê teng ē tī ke̍k o͘-àm ê tiong-kan hoa-khì.
20:21 Khí-thâu chin kín tit tio̍h ê sán-gia̍p, kàu lō͘-bóe bô it-tēng sī i ê hok-khì.
20:22 Lí m̄ thang siūⁿ kóng, góa beh pò-èng pháiⁿ lâng; tio̍h thèng-hāu Siōng-chú, I ē kiù lí.
20:23 Chhìn-thûi bô sio-kāng sī Siōng-chú só͘ thó-ià, ké ê thian-phêng mā sī m̄-hó.
20:24 Lâng ê kha-pō͘ sī Siōng-chú teh tiāⁿ tio̍h, lâng kám ē chai i kakī ê lō͘?
20:25 Lâng sûi-piān kóng, " Che sī sèng-mi̍h ", hē goān liáu-āu chiah cha-mn̄g, che soah chiâⁿ-chò i kakī ê lô-bāng.
20:26 Tì-hūi ê ông kā pháiⁿ lâng pòa tiāu, ēng chhia-lián kā i kauh kòe.
20:27 Lâng ê sim-sîn sī Siōng-chú ê teng, kàm-chhat lâng ê sim-pak.
20:28 Jîn-chû kah sìn-si̍t pó-choân kok-ông; i ê chō-ūi mā in-ūi jîn-chû lâi kian-kò͘.
20:29 Ióng-kiāⁿ sī siàu-liân lâng ê êng-kng; pe̍h thâu-mn̂g to̍h-sī lāu lâng ê thé-biān.
20:30 Ēng piⁿ phah siong lâi tû-khì lâng ê chōe-ok; hit-ê siong ē ji̍p-khì lâng ê sim-pak.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。