箴言 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
14:1 Tì-hūi ê chabó͘ lâng ta̍k-ê kiàn-li̍p kakī ê ke; gōng ê chabó͘ lâng chhin-chhiú thiah-húi ka-têng.
14:2 Chiàu chèng-ti̍t lâi kiâⁿ ê lâng kèng-ùi Siōng-chú; to̍k-to̍k chò tāichì hêng-ge̍k ê lâng biáu-sī Siōng-chú.
14:3 Gōng lâng ê chhùi lāi ū kiau-ngō͘-ê koái-á; to̍k-to̍k tì-hūi lâng ê chhùi-tûn ē pó-sioh kakī.
14:4 Chhù nā bô gû, gû-tiâu chiū khang-khang; gû nā ū khùi-la̍t, seng-sán siu-sêng chiū ē chin chē.
14:5 Chin-si̍t ê kiàn-chèng bô kóng pe̍h-chha̍t; ké ê kiàn-chèng kóng pe̍h-chha̍t ōe.
14:6 Bú-bān ê lâng beh chhōe tì-hūi, mā chhōe bē tio̍h; chhong-bêng ê lâng ē chin kín tit tio̍h tì-sek.
14:7 Kiâⁿ kàu gōng lâng ê bīn-chêng, chiū ē khòaⁿ tio̍h i ê chhùi-tûn bô tì-sek.
14:8 Thong-ta̍t ê lâng ū tì-hūi thang bêng-pe̍k i ê lō͘; gōng lâng ê gōng to̍h-sī kúi-chà.
14:9 Gōng lâng lia̍h hoān chōe chò kún-chhiò; chèng-ti̍t lâng ê tiong-kan ū hô-pêng.
14:10 Ta̍k lâng ê sim ē chai kakī ê kan-khó͘; i ê hoaⁿ-hí, gōa-lâng mā bô hūn.
14:11 Pháiⁿ lâng ê chhù ē tó-hoāi; chèng-ti̍t lâng ê pò͘-pêⁿ ē heng-ōng.
14:12 Ū chi̍t tiâu lō͘ lâng khòaⁿ-chò sī chèng-ti̍t, kàu bóe ē chiâⁿ-chò sí-bông ê lō͘.
14:13 Lâng teh chhiò ê sî, sim mā ū iu-būn; khoài-lo̍k ê kiat-kio̍k mā ē piàn-chò pi-siong.
14:14 Sim pōe-ge̍k ê lâng ē tùi i ê só͘ kiâⁿ lâi tit tio̍h pò-èng; hó lâng mā ē tùi i kakī ê só͘ kiâⁿ lâi tit tio̍h pò-siúⁿ.
14:15 Gōng-ti̍t ê lâng bô chi̍t kù ōe m̄-sìn; thong-ta̍t ê lâng ta̍k-pō͘ kín-sīn.
14:16 Tì-hūi ê lâng kín-sīn koh lī-khui pháiⁿ tāi; gōng lâng óa-khò kakī lâi hòng-chhiòng.
14:17 Khoài siū-khì ê lâng chò tāichì gû-gōng; kè-bô͘ pháiⁿ tāi ê lâng ē tú tio̍h oàn-hūn.
14:18 Gōng-ti̍t ê lâng sêng-chiap gû-gōng chò sán-gia̍p; thong-ta̍t ê lâng tit tio̍h tì-sek chò bián-liû.
14:19 Pháiⁿ lâng phak tī hó lâng ê bīn-chêng; chōe-jîn phak tī gī lâng ê mn̂g-kháu.
14:20 Sàn-chhiah lâng liân chhù-piⁿ to oàn-hūn i; hó-gia̍h lâng pêng-iú chin chē.
14:21 Khòaⁿ-khin chhù-piⁿ ê lâng ū chōe; liân-bín sànchhiah ê lâng ū hok-khì.
14:22 Kè-bô͘ pháiⁿ tāi kám bē kiâⁿ-ji̍p bê-lō͘? Kè-bô͘ hó sū ē tit tio̍h liân-bín kah sêng-si̍t.
14:23 Ta̍k khoán ê lô-khó͘ lóng ū lī-ek; chhùi-tûn kóng chin chē ōe ē tì-kàu sànchhiah.
14:24 Tì-hūi lâng ê chîⁿ-châi ē chò in ê bián-liû; gōng lâng ê gōng kàu bóe mā sī gōng.
14:25 Chin-si̍t ê kiàn-chèng kiù lâng ê sèⁿ-miā; kóng pe̍h-chha̍t ê lâng sī kúi-chà.
14:26 Kèng-ùi Siōng-chú ê lâng ū kian-kò͘ ê óa-khò; i ê kiáⁿ-jî ū tô-siám ê só͘-chāi.
14:27 Kèng-ùi Siōng-chú to̍h-sī oa̍h-miā ê chúi-chôaⁿ, ē hō͘ lâng lī-khui sí-bông ê lô-bāng.
14:28 Jîn-bîn chē sī kok-ông ê êng-kng; jîn-bîn chió ê kun-ông ē tì-kàu soe-pāi.
14:29 Bē khoài siū-khì ê lâng ū tōa chhong-bêng; sò-sèng ê lâng ē hián-chhut tōa gû-gōng.
14:30 Sim lāi pêng-chēng sī jio̍k-thé ê oa̍h-miā; oàn-tò͘ ē hō͘ kut-thâu hiú-nōa.
14:31 Tùi sànchhiah lâng khek-po̍k sī teh siat-to̍k Chhòng-chō-chú; liân-bín khiàm-khoeh ê lâng sī chun-kèng Chú.
14:32 Pháiⁿ lâng tī i só͘ kiâⁿ ê pháiⁿ ē tú tio̍h bia̍t-bông; gī lâng kàu sí iáu ū ǹg-bāng.
14:33 Tì-hūi an-jiân tiàm tī chhong-bêng lâng ê sim-lāi; gōng lâng ê pak-lāi hō͘ lâng khòaⁿ hiān-hiān.
14:34 Kong-gī hō͘ pang-kok ko-seng; chōe-ok hō͘ jîn-bîn siū lêng-jio̍k.
14:35 Ēng tì-hūi chò tāichì ê chhe-ēng ē tit tio̍h ông ê un-hūi; chí ū pāi-ke ê lâng ē tú tio̍h siū-khì.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。