箴言 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
13:1 Tì-hūi ê kiáⁿ thiaⁿ lāu-pē ê kàu-tok; bú-bān ê lâng m̄-thiaⁿ chek-pī.
13:2 Lâng in-ūi chhùi só͘ kiat ê kóe-chí beh hióng-siū hok-khì; kan-chà ê lâng ē tú tio̍h kiông-pō.
13:3 Iok-sok chhùi-chi̍h ê lâng ē-tàng pó-choân i ê oa̍h-miā; sûi-piān khui chhùi ê lâng ē tì-kàu bia̍t-bông.
13:4 Pîn-tōaⁿ lâng ê sim him-bō͘ mā tit bē tio̍h siáⁿ-mi̍h; in-khîn ê lâng ē tit tio̍h sim-móa ì-chiok.
13:5 Gī lâng thó-ià pe̍h-chha̍t ōe; pháiⁿ lâng ū chhàu-miâ koh kiàn-siàu.
13:6 Kong-gī pó-hō͘ kiâⁿ chèng-ti̍t ê lâng; siâ-ok pāi-hoāi hoān chōe ê lâng.
13:7 Ū lâng kakī chng-chò hó-gia̍h, kî-si̍t bô pòaⁿ-hāng; ū lâng kakī chng-chò sànchhiah, kî-si̍t ū chin chē châi-bu̍t.
13:8 Lâng ê chîⁿ-châi ē-tàng kā i sio̍k-hôe oa̍h-miā; m̄ koh, sànchhiah lâng m̄ kiaⁿ lâng ê tōa-siaⁿ khióng-hat.
13:9 Gī lâng ê kng ē bêng-liāng; pháiⁿ lâng ê teng ē sit-.khì.
13:10 Kiau-ngō͘ kantaⁿ ē ín-khí sio-cheⁿ; hō͘-siong chham-siông ê lâng ū tì-hūi.
13:11 M̄-sī tùi lô-khó͘ lâi tit tio̍h ê chîⁿ-châi ē siau-sit; tùi lâu kōaⁿ-lâi chek-chū ê chîⁿ-châi ē ná ke-thiⁿ.
13:12 Só͘ kî-thāi ê nā kú bô si̍t-hiān, chiū ē tì-sú sim thàng-thiàⁿ; só͘ ì-ài ê nā chi̍t-ē kàu, chiū kahná oa̍h-miā ê chhiū.
13:13 Biáu-sī tō-lí ê lâng kakī chū chhú bia̍t-bông; kèng-ùi kài-bēng ê lâng ē tit tio̍h pò-siúⁿ.
13:14 Tì-hūi lâng ê kàu-tō sī oa̍h-miā ê chúi-chôaⁿ, ē hō͘ lâng lī-khui sí-bông ê lô-bāng.
13:15 Siān-liông ê chhong-bêng hō͘ lâng tit tio̍h un-tián; kan-chà lâng ê lō͘ sī khâm-khia̍t.
13:16 Thong-ta̍t ê lâng lóng ēng tì-hūi chò tāichì; to̍k-to̍k gōng lâng teh soan-iông kakī ê gû-gōng.
13:17 Pháiⁿ ê sù-chiá hām-lo̍h chai-hō; tiong-sìn ê khim-chhe ē hō͘ lâng kiān-khong.
13:18 Khì-choa̍t kàu-tok ê lâng ē tú tio̍h sànchhiah kah lêng-jio̍k; goān-ì siū chek-pī ê lâng ē tit tio̍h êng-kng.
13:19 Só͘ ì-ài ê tāichì sêng-kong, sim chiū hoaⁿ-hí; gōng lâng m̄-goān lī-khui pháiⁿ tāi.
13:20 Kah tì-hūi ê lâng chò-hóe kiâⁿ ē chiâⁿ-chò tì-hūi; kah gû-gōng ê lâng chò-phōaⁿ ē siū sún-siong.
13:21 Chai-eh ē jiok pháiⁿ lâng; m̄ koh, gī lâng ē tit tio̍h pò-siúⁿ.
13:22 Hó lâng lâu sán-gia̍p hō͘ kiáⁿ-sun; pháiⁿ lâng só͘ chek-chū ê chîⁿ-châi ē kui gī lâng.
13:23 Sàn-chhiah lâng chèng-choh ē tit tio̍h chin chē bí-niûⁿ, mā ē in-ūi put-gī lâi tú tio̍h bia̍t-bông.
13:24 M̄-kam ēng chhê-á koán-kà kiáⁿ-jî ê lâng si̍t-chāi bô teh thiàⁿ kiáⁿ; nā-sī thiàⁿ kiáⁿ, chiū ē chiàu-sî chek-tok.
13:25 Gī lâng tit tio̍h chia̍h lâi sim-móa ì-chiok; pháiⁿ lâng ê pak-tó͘ it-tēng ē iau.
各圣经译本着作权如版权说明。
本画面由信望爱资讯中心之CBOL计画产生,欢迎连结,无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人,来荣耀他自己的名。