箴言 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
12:1 Hoaⁿ-hí siū kàu-tok ê lâng ì-ài tì-sek; oàn-hūn chek-pī ê lâng to̍h-sī chengseⁿ.
12:2 Hó lâng ē tit tio̍h Siōng-chú ê un-tián; Siat kúi-kè ê lâng ē hō͘ Siōng-chú tēng chōe.
12:3 Lâng bē tàng tùi pháiⁿ lâi kiàn-li̍p; gī lâng ê kin-pún éng bē iô-tāng.
12:4 Châi-tek ê chabó͘ lâng sī tiōng-hu ê bián-liû; pāi-ke ê chabó͘ lâng chhin-chhiūⁿ hō͘ tiōng-hu ê kut hiú-nōa.
12:5 Gī lâng ê liām-thâu sī kong-pêⁿ; pháiⁿ lâng ê kè-bô͘ sī kúi-chà.
12:6 Pháiⁿ lâng ê ōe sī teh tng-tán beh hāi lâng; chèng-ti̍t lâng ê chhùi ē kiù lâng.
12:7 Pháiⁿ lâng ē tó-hoāi kui tī bô; gī lâng ê chhù ē khiā chāi.
12:8 Lâng ē chiàu i ê tì-hūi tit tio̍h oló; sim-lāi o͘-pe̍h siūⁿ ê lâng ē siū biáu-sī.
12:9 Hō͘ lâng khòaⁿ-khin ê lâng iáu koh ū lô͘-po̍k, khah iâⁿ kakī chū-tōa bô bí-niûⁿ thang chia̍h.
12:10 Gī lâng koan-sim i chengseⁿ ê oa̍h-miā; pháiⁿ lâng ê liân-bín mā sī chân-jím.
12:11 Chèng-choh chhân-hn̂g ê lâng ē ū bí-niûⁿ kàu-gia̍h; kau-pôe bô hē-lo̍h ê lâng sī bû-ti.
12:12 Pháiⁿ lâng him-bō͘ put-gī ê lâng ê lô-bāng; gī lâng ê kin-thâu seⁿ-chhut kóe-chí.
12:13 Chhùi-tûn ê kòe-sit sī pháiⁿ ê lô-bāng; chí ū gī lâng ē thoat-lī hoān-lān.
12:14 Lâng in-ūi chhùi só͘ kiat ê kóe-chí ē tit tio̍h hok-khì móa-móa; lâng chiàu i chhiú só͘ chò ê tit tio̍h pò-siúⁿ.
12:15 Gōng lâng khòaⁿ kakī ê lō͘ chò chèng-ti̍t; chí ū tì-hūi ê lâng thiaⁿ lâng khó͘-khǹg.
12:16 Gōng lâng ê m̄-kam-goān ē sûi-sî hián-chhut; thong-ta̍t ê lâng ún-ba̍t kakī ê kiàn-siàu.
12:17 Kóng si̍t-ōe ê lâng hián-bêng kong-gī; lāmsám kiàn-chèng ê lâng hián-chhut kúi-chà.
12:18 Kóng-ōe sò-sèng ê lâng chhin-chhiūⁿ to teh chha̍k lâng; tì-hūi lâng ê chhùi-chi̍h ē i hó lâng.
12:19 Sêng-si̍t ê chhùi éng-oán kian-kò͘; pe̍h-chha̍t ê chi̍h chí-put-kò tòng chi̍t-sî-á.
12:20 Tô͘-bô͘ pháiⁿ tāi ê lâng sim chûn kúi-chà; khǹg lâng hô-hó ê lâng ē tit tio̍h hoaⁿ-hí.
12:21 Gī lâng bē tú tio̍h chai-hāi; pháiⁿ lâng ē tú tio̍h chin chē chai-hō.
12:22 Pe̍h-chha̍t ê chhùi-tûn sī Siōng-chú só͘ thó-ià; chò tāichì sêng-si̍t ê lâng sī I só͘ hoaⁿ-hí.
12:23 Thong-ta̍t ê lâng am-khàm tì-sek; gōng lâng ê sim hián-chhut gû-gōng.
12:24 In-khîn lâng ê chhiú ē chiáng-koân; pîntōaⁿ lâng ē chò lâng ê khó͘-kang.
12:25 Lâng ê sim nā chhau-hoân ē hō͘ i lóe-chì; chi̍t kù hó ōe ē-tàng hō͘ i hoaⁿ-hí.
12:26 Gī lâng ín-chhōa i ê chhù-piⁿ kiâⁿ chiàⁿ lō͘; pháiⁿ lâng ê lō͘ hō͘ lâng sit-bê.
12:27 Pîn-tōaⁿ lâng bô piak phah-la̍h só͘ tit tio̍h ê bah; in-khîn ê lâng ē tit tio̍h pó-kùi ê châi-bu̍t.
12:28 Tī kong-gī ê lō͘ ū oa̍h-miā; i ê tō-lō͘ pēng bô sí-bông.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。