出埃及记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
5:1 Mô͘-se kah A-lông Khì Kìⁿ Ai-gi̍p Ông
Āu-lâi, Mô͘-se kah A-lông ji̍p-.khì, kā Hôa-láu kóng, " I-su-la-el ê Siōng-tè — Siōng-chú ánne kóng, ' Tio̍h chún Góa ê chú-bîn lī-khui, thang hō͘ in tī khòng-iá ūi Góa siú cheh. '"
5:2 Hôa-láu kóng, " Siōng-chú sī siáⁿ lâng hō͘ góa tio̍h thiaⁿ I ê ōe, chún I-su-la-el lâng lī-khui? Góa m̄ bat Siōng-chú, mā m̄-chún I-su-la-el lâng lī-khui. "
5:3 In kóng, " Hi-bú-lâi lâng ê Siōng-tè tú tio̍h goán, kiû lí chún goán khì khòng-iá kiâⁿ saⁿ kang ê lō͘-thêng, khì chè-sū Siōng-chú — goán ê Siōng-tè, khióng-kiaⁿ I ē ēng un-e̍k, to-kiàm lîm-kàu goán. "
5:4 Ai-gi̍p ông tùi in kóng, " Mô͘-se kah A-lông, lín ná ē beh hō͘ jîn-bîn tam-gō͘ in ê kang-chok? Lín tio̍h kín khì chò lín eng-kai chò ê kang! "
5:5 Hôa-láu kóng, " Lí khòaⁿ, chit só͘-chāi ê jîn-bîn chitmá chin chē, lín kèng-jiân beh kiò in mài chò-kang. "
5:6 Tng hit ji̍t, Hôa-láu hoan-hù jîn-bîn ê tok-kang kah in ê thâu-ba̍k, kóng,
5:7 " Lín m̄ thang chiàu kū ēng chháu hō͘ chiahê jîn-bîn chò chng-á, tio̍h hō͘ in kakī khì khioh chháu.
5:8 In í-chêng chò chng ê sò͘-gia̍h, lín iû-goân hō͘ in ánne chò, m̄ thang sió-khóa kiám-chió, in-ūi in pîntōaⁿ, só͘-í in tōa-siaⁿ âu-kiò, ' Chún goán khì chè-sū goán ê Siōng-tè. '
5:9 Lín tio̍h ēng khah tāng ê kang hō͘ in chò, hō͘ in lô-khó͘, m̄ thang thiaⁿ in kóng bô-iáⁿ ê ōe. "
5:10 Jîn-bîn ê tok-kang kah in ê thâu-ba̍k chhut-khì kā jîn-bîn kóng, " Hôa-láu ánne kóng, ' Góa bô boeh koh khioh chháu hō͘ lín.
5:11 Lín khòaⁿ tó-ūi ū chháu, chiū kakī khì hia khioh. Chóng-.sī, lín ê kang-gia̍h lóng bē tàng kiám-chió. '"
5:12 Chiū ánne, jîn-bîn sì-sòaⁿ khì choân Ai-gi̍p tē, khioh chháu-á-iù lâi chò chng ê chháu-liāu.
5:13 Tok-kang pek in kóng, " Lín múi ji̍t tio̍h chò oân lín ê kang kah í-chêng ū chháu bô koh-iūⁿ. "
5:14 Hôa-láu ê tok-kang phah i só͘ phài koán-lí I-su-la-el lâng ê thâu-ba̍k, kóng, " Lín cha-hng kah kin-á-ji̍t ná ē bô chò oân lín ê kang, to̍h-sī bô chiàu chá-chêng ê sò͘-gia̍h chò chng? "
5:15 I-su-la-el lâng ê thâu-ba̍k lâi tùi Hôa-láu kiû-kiò, kóng, " Ná ē ánne tùi-thāi lí ê lô͘-po̍k?
5:16 Bô koh ēng chháu hō͘ lí ê lô͘-po̍k, koh kā goán kóng, ' Tio̍h chò chng! ' Lí khòaⁿ, lí ê lô͘-po̍k hông phah, kî-si̍t sī lí kakī ê jîn-bîn ê kòe-sit. "
5:17 Hôa-láu kóng, " Lín pîntōaⁿ! Lín pîntōaⁿ! Só͘-í, lín kóng, ' Chún goán khì chè-sū Siōng-tè. '
5:18 Taⁿ lín khì chò-kang! Goán m̄ hō͘ lín chháu, chóng-.sī, chng tio̍h chiàu-gia̍h lâi kau. "
5:19 I-su-la-el lâng ê thâu-ba̍k thiaⁿ tio̍h kóng " Múi-ji̍t chò chng ê gia̍h bē tàng kiám-chió ", chiū chai hāi à.
5:20 In lī-khui Hôa-láu chhut-.lâi, tú tio̍h Mô͘-se kah A-lông khiā tī in ê thâu-chêng, chiū tùi in kóng,
5:21 " Goān Siōng-chú kàm-chhat lín, sím-phòaⁿ lín, in-ūi lín hō͘ goán tī Hôa-láu kah i ê jîn-sîn bīn-chêng ū chhàu-miâ, ēng to hē tī in ê chhiú lâi thâi goán. "
5:22 Mô͘-se Tùi Siōng-chú Bâi-oàn
Mô͘-se tò tńg-khì Siōng-chú hia, kóng, " Chú ah, Lí ná ē pháiⁿ khoán-thāi chiahê jîn-bîn? Ná ē chhe góa?
5:23 In-ūi tùi góa khì kìⁿ Hôa-láu, hōng Lí ê miâ lâi kóng ê sî, i chiū pháiⁿ khoán-thāi chiahê jîn-bîn, Lí mā lóng bô kiù Lí ê chú-bîn. "
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。