出埃及记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
4:1 Mô͘-se ìn kóng, " Lí khòaⁿ, in ē m̄ siong-sìn góa, mā m̄-thiaⁿ góa ê ōe, in-ūi in ē kóng, ' Siōng-chú m̄ bat tùi lí hián-hiān. '"
4:2 Siōng-chú tùi i kóng, " Tī lí chhiú-.ni̍h ê sī siáⁿ-mi̍h? " Mô͘-se kóng, " Sī koái-á. "
4:3 Siōng-chú kóng, " Hiat lo̍h-khì tē-.ni̍h. " Mô͘-se chi̍t ē kā koái-á hiat lo̍h-.khì, koái-á chiū piàn-chò chôa; Mô͘-se chiū cháu-siám hit bóe chôa.
4:4 Siōng-chú tùi Mô͘-se kóng, " Chhun lí ê chhiú khì lia̍h i ê bóe. " Mô͘-se chiū chhun chhiú khì lia̍h, chôa tī i ê chhiú tiong koh piàn-chò koái-á.
4:5 Án-ne thang hō͘ in sìn Siōng-chú — in ê chó͘-sian ê Siōng-tè, A-bu-la-hàm ê Siōng-tè, Í-sak ê Siōng-tè, Iâ-kop ê Siōng-tè, ū tùi lí hián-hiān. "
4:6 Siōng-chú koh tùi i kóng, " Kā lí ê chhiú hē tī lí ê heng chêng. " Mô͘-se chiū kā chhiú hē tī heng chêng, thiu chhut-.lâi ê sî, lí khòaⁿ, i ê chhiú chiū seⁿ thái-ko, pe̍h kah chhin-chhiūⁿ seh.
4:7 Siōng-chú koh kóng, " Lí koh kā chhiú hē tī lí ê heng chêng. " Mô͘-se kā i ê chhiú hē tī heng chêng, thiu chhut-.lâi ê sî, lí khòaⁿ, í-keng ho̍k-goân kah choân seng-khu ê bah bô koh-iūⁿ.
4:8 Siōng-chú kóng, " Siat-sú in bô beh sìn lí, mā bô beh sìn thâu chi̍t-ê sîn-jiah, chiū ē sìn tē-jī-ê sîn-jiah.
4:9 Hit nn̄g-ê sîn-jiah in nā lóng m̄-sìn, mā m̄-thiaⁿ lí ê ōe, lí tio̍h tùi hô-.ni̍h iúⁿ chúi, tò tī ta tē, lí tùi hô-.ni̍h só͘ iúⁿ ê chúi ē tī ta tē piàn-chò hoeh. "
4:10 Mô͘-se tùi Siōng-chú kóng, " Chú ah, góa pêng-sî m̄-sī ē kóng-ōe ê lâng, tùi Lí kā Lí ê lô͘-po̍k kóng-ōe liáu-āu mā sī ánne, góa sī chhùi-chi̍h tun ê lâng. "
4:11 Siōng-chú tùi i kóng, " Chhòng-chō lâng ê chhùi ê sī siáⁿ lâng? Hō͘ lâng é-káu, chhàu-hīⁿ-lâng, ba̍k-chiu kim, chheⁿmê-.ê, sī siáⁿ lâng? Kám m̄-sī Góa — Siōng-chú? "
4:12 Taⁿ chò lí khì, Góa ē siúⁿ-sù hō͘ lí kháu-châi, kà-sī lí só͘ eng-kai kóng ê. "
4:13 Mô͘-se kóng, " Chú ah, Lí kah-ì chhe siáⁿ lâng, chiū chhe i khì! "
4:14 Siōng-chú tùi Mô͘-se siū-khì, kóng, " Kám m̄-sī ū lí ê a-hiaⁿ — Lē-bī lâng A-lông? Góa chai i sī ē kóng-ōe ê lâng. Τaⁿ i chhut-lâi kā lí gêng-chiap, i chi̍t-ē khòaⁿ tio̍h lí, sim-lāi chiū hoaⁿ-hí.
4:15 Lí tio̍h tùi i kóng, kā só͘ eng-kai kóng ê ōe thoân hō͘ i; Góa mā ē siúⁿ-sù hō͘ lí kah i ū kháu-châi, mā ē kà-sī lín só͘ eng-kai kiâⁿ ê tāichì.
4:16 A-lông ē thè lí tùi jîn-bîn kóng-ōe, i ē tùi lí chún-chò chhùi, lí ē tùi i chún-chò Siōng-tè.
4:17 Lí ê chhiú tio̍h gia̍h chi̍t ki koái-á, ēng i lâi kiâⁿ sîn-jiah. "
4:18 Mô͘-se Tńg-lâi Ai-gi̍p
Αń-ne Mô͘-se chiū khì, tńg-khì i ê tiūⁿ-lâng E-thu-ló hia, kā i kóng, " Kiû lí iông-ín góa tńg-.khì, khòaⁿ góa tī Ai-gi̍p ê hiaⁿ-tī, khòaⁿ in iáu tī-.leh á-bô. " E-thu-ló kā Mô͘-se kóng, " Lí thang an-jiân khì à. "
4:19 Siōng-chú tī Mí-tiân tùi Mô͘-se kóng, " Lí tńg-khì Ai-gi̍p, in-ūi ài hāi lí ê sèⁿ-miā ê lâng lóng sí à. "
4:20 Mô͘-se chhōa i ê bó͘ kah nn̄g-ê kiáⁿ, hō͘ in khiâ lî-á, tńg-khì Ai-gi̍p tē. Mô͘-se chhiú-.ni̍h gia̍h Siōng-chú ê koái-á.
4:21 Siōng-chú tùi Mô͘-se kóng, " Lí tńg-khì Ai-gi̍p ê sî, tio̍h chù-ì kā Góa só͘ kau tī lí ê chhiú ê só͘-ū kî-sū lóng kiâⁿ tī Hôa-láu ê bīn-chêng. Chóng-.sī, Góa ē hō͘ i ê sim ngē, i mā bô beh pàng chiahê jîn-bîn khì.
4:22 Lí tio̍h kā Hôa-láu kóng, ' Siōng-chú ū ánne kóng: I-su-la-el sī Góa ê kiáⁿ, to̍h-sī Góa ê tōa-kiáⁿ.
4:23 Góa bat tùi lí kóng: tio̍h tháu-pàng Góa ê kiáⁿ thang lâi ho̍k-sāi Góa, lí mā m̄-chún i khì. Lí khòaⁿ, Góa beh thâi-sí lí ê kiáⁿ, to̍h-sī lí ê tōa-kiáⁿ. '"
4:24 Mô͘-se tī lō͘-.ni̍h, tī kheh-tiàm, Siōng-chú tú tio̍h i, beh hō͘ i sí.
4:25 Mô͘-se ê bó͘ Chi̍p-pho-la̍h chiū the̍h chi̍t tè lāi-chio̍h, koah i ê kiáⁿ ê iông-bu̍t ê phôe, hiat tī Mô͘-se ê kha chêng, kóng, " Lí sī góa ēng kat-lé ê hoeh ōaⁿ-.lâi ê tiōng-hu. "
4:26 Siōng-chú chiū pàng Mô͘-se soah, bô kā i thâi-sí. Cha-bó͘ lâng kóng, " Lí sī góa hoeh ê tiōng-hu, in-ūi kat-lé ê iân-kò͘. "
4:27 Siōng-chú kā A-lông kóng, " Lí khì khòng-iá gêng-chiap Mô͘-se. " I chiū khì, tī Siōng-chú ê soaⁿ tú tio̍h Mô͘-se, chiū kā i chim.
4:28 Mô͘-se kā Siōng-chú chhe i só͘ kóng ê ōe kah hoan-hù i kiâⁿ ê sîn-jiah, lóng tùi A-lông kóng.
4:29 Mô͘-se kah A-lông chiū khì chio-chi̍p I-su-la-el lâng ê chèng tiúⁿ-ló.
4:30 A-lông kā Siōng-chú tùi Mô͘-se só͘ kóng ê ōe lóng kóng chhut-.lâi, koh tī jîn-bîn ê bīn-chêng kiâⁿ hiahê sîn-jiah.
4:31 Jîn-bîn chiū siong-sìn, in thiaⁿ tio̍h Siōng-chú chiàu-kò͘ I-su-la-el lâng, koh khòaⁿ tio̍h in ê kan-khó͘, chiū àⁿ thâu kèng-pài.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。